គ.ជ.ប ប្តូរដោះស្រាយបណ្តឹងបញ្ជីឈ្មោះពីសវនាការជាសាធារណៈ មកអសាធារណៈវិញ

ជាតិ

គ.ជ.ប ប្តូរដោះស្រាយបណ្តឹងបញ្ជីឈ្មោះពីសវនាការជាសាធារណៈ មកអសាធារណៈវិញ

20, Jan 2017 , 9:17 am

រូបភាព

ដោយ:

ភ្នំពេញ៖ ក្រុមប្រឹក្សាជំនុំជម្រះគណៈកម្មាធិការជាតិរៀបចំការបោះឆ្នោត (គ.ជ.ប) បានសម្រេចថានឹង ដោះស្រាយពាក្យបណ្តឹងលើបញ្ជីចុះឈ្មោះបោះឆ្នោត តាមវិធីអសាធារណៈវិញ ពីការធ្វើពុំបើកសវនាការដែលគេបានអនុវត្តន៍កន្លងមក ដើម្បីដោះស្រាយសំណុំរឿងឲ្យទាន់ពេលវេលា។

លោក ហង្ស ពុទ្ធា អ្នកនាំពាក្យ និងជាសមាជិកក្រុមប្រឹក្សាជំនុំជម្រះ គ.ជ.ប បានប្រាប់អំពីមូលហេតុដែលនាំឲ្យ គ.ជ.ប ប្តូរនីតិវិធីពិនិត្យនេះ គឺដោយសារ សំណុំរឿងដែលគណបក្សសង្គ្រោះជាតិប្តឹងមក គ.ជ.ប មានអង្គហេតុដូចគ្នាៗដែលពុំចាំបាច់បើកសវនាការសាកសួរដេញដោលដើមបណ្តឹង សាក្សី និងចុងចម្លើយ ដូចសវនាការមុនៗទេ។ លោកបញ្ជាក់ថា ការធ្វើសវនការជាអសាធារណៈ ឬសង្ខេបនេះ គឺនឹងពិនិត្យតែលើអង្គច្បាប់នៃសំណុំរឿងប៉ុណ្ណោះ។

អ្នកនាំពាក្យរូបនេះបានឲ្យដឹងថា មកទល់ពេលនេះមានសំណុំរឿងជាង ១០០ ដែលភាគច្រើនពាក់ព័ន្ធនឹងការតវ៉ាឲ្យលុបឈ្មោះអ្នកបានចុះឈ្មោះចេញបញ្ជីបោះឆ្នោត ដែលនឹងត្រូវចំណាយពេលយូរដើម្បីដោះស្រាយកាលណាត្រូវសួរដេញដោលគ្រប់ភាគីពាក់ព័ន្ធក្នុងពាក្យបណ្តឹង។ ដើម្បីដោះស្រាយឲ្យទាន់ពេលវេលានោះ ក្រុមប្រឹក្សាជំនុំជម្រះ គ.ជ.ប សម្រេចពិនិត្យតែអង្គច្បាប់រួចតែម្តង ដោយផ្អែកតាមច្បាប់ស្ដីពីការរៀបចំ និងការប្រព្រឹត្តទៅ នៃគណៈកម្មាធិការជាតិរៀបចំការបោះឆ្នោត។

នៅពេលអ្នកសារព័ត៌មានសួរថា តើនីតិវិធីសវនាការអសាធារណៈនឹងប៉ះពាល់ប្រយោជន៍ដើមបណ្តឹងឬទេ? លោក ហង្ស ពុទ្ធា និយាយថា វាមិនប៉ះពាល់នោះទេ ពីព្រោះក្រុមប្រឹក្សាជំនុំជម្រះសមាសភាពចំនួន ៩នាក់ រួមទាំងរូប លោក នឹងពិនិត្យពិភាក្សា និងផ្ទៀងផ្ទាត់ទិន្នន័យជាមួយស្ថាប័នពាក់ព័ន្ធយ៉ាងត្រឹមត្រូវដដែល។

ប៉ុន្តែ ក្នុងករណីក្រុមប្រឹក្សាជំនុំជម្រះ គ.ជ.ប ពិនិត្យឃើញថា សំណុំរឿងថ្មីណាមួយ មានអង្គច្បាប់ និងអង្គហេតុផ្ទុយគ្នានោះ លោក ហង្ស ពុទ្ធា បញ្ជាក់ថា ក្រុមប្រឹក្សាជំនុំជម្រះនឹងកោះហៅភាគីពាក់ព័ន្ធ មាន ដើមបណ្តឹង សាក្សី ចុងចម្លើយ និងតំណាងក្រុមប្រឹក្សាឃុំសង្កាត់នៅមូលដ្ឋាន ចូលក្នុងសវនាការសាកសួរ ជាសាធារណៈវិញ។

«គ.ជ.ប ធ្វើការពិនិត្យ និងផ្ទៀតផ្ទាត់ពាក្យបណ្តឹងស្របតាមផ្លូវច្បាប់ត្រឹមត្រូវដែលបើកឱកាសឲ្យក្រុមប្រឹក្សាជំនុំជម្រះ គ.ជ.ប ដោះស្រាយពាក្យបណ្តឹងទាន់ពេលវេលា»។

បើតាមលោក ហង្ស ពុទ្ធា ចាប់ពីថ្ងៃទី ១៤ រហូតមកនេះ គ.ជ.ប បានទទួលពាក្យបណ្តឹងឲ្យលុបឈ្មោះអ្នកបានចុះឈ្មោះក្នុងបញ្ជីបោះឆ្នោតថ្មីយ៉ាងហោចជាង ១ពាន់នាក់ ហើយបណ្តឹងភាគច្រើនពីគណបក្សសង្គ្រោះជាតិ។

យ៉ាងណា មកទល់ពេលនេះដែរ គ.ជ.ប ពុំទាន់បានលុបឈ្មោះអ្នកចុះឈ្មោះណាម្នាក់ដែល ភ្នាក់ងារគណបក្សប្រឆាំងថាខ្លួនបានរកឃើញ និងស្គាល់ថា ពួកគេជាជនជាតិវៀតណាម ដោយផ្អែកលើភស្តុតាងចម្បង គឺពួកគេនិយាយខ្មែរមិនច្បាស់ ចេញពីបញ្ជីឈ្មោះបោះឆ្នោតថ្មី ក្នុងឆ្នាំ២០១៦ នេះទេ។ ក្រុមប្រឹក្សាជំនុំជម្រះ គ.ជ.ប បានបដិសេធភស្តុតាងដើមបណ្តឹងរហូត ដោយហេតុថា ពួកគេមានឯកសារបញ្ជាក់អត្តសញ្ញាណ សញ្ជាតិខ្មែរដែលអាចមានឈ្មោះក្នុងបញ្ជីបោះឆ្នោត ស្របតាមមាត្រា ៥១ នៃច្បាប់ស្តីពី ការបោះឆ្នោត ជ្រើសតាំងអ្នកតំណាងរាស្ត្រ។

ពាក់ព័ន្ធបញ្ហានេះដែរ លោកស្រី ម៉េង សុភារី ប្រធាននាយកដ្ឋានកិច្ចការបោះឆ្នោត និងនីតិកម្មនៃគណបក្សសង្គ្រោះជាតិ និយាយថាគណបក្សមិនពេញចិត្តនឹងចំណាត់ការរបស់ គ.ជ.ប ទេ។ លោកស្រី ធ្លាប់បាននិយាយថា គណបក្សសង្គ្រោះជាតិ បានរកឃើញជនជាតិវៀតណាមប្រមាណ ៥ពាន់នាក់ បានចុះឈ្មោះក្នុងបញ្ជីឈ្មោះបោះឆ្នោតឃុំ-សង្កាត់ ។

គួរបញ្ជាក់ផងដែរ ក្រោយបញ្ចប់ការចុះឈ្មោះបោះឆ្នោតថ្មី ប្រជាពលរដ្ឋខ្មែរ ចំនួន ៧,៨៧៣,១៩៤ ស្នើនឹង៨១ភាគរយ បានទៅចុះឈ្មោះបោះឆ្នោត ក្នុងចំណោមប្រជាពលរដ្ឋដែលមានអាយុគ្រប់បោះឆ្នោតចំនួន ៩,៦៦៤,២១៦ លាននាក់។ ចំនួនដែលចុះឈ្មោះបានក្នុងបញ្ជីថ្មីនេះ ថយចុះជិត ២លាននាក់ ធៀបទៅនឹង ៩លាន ២ សែននាក់ដែល គ.ជ.ប បានចុះឈ្មោះសម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ កាលពីឆ្នាំ២០១២ ៕