ជាតិ
ក្រសួងមហាផ្ទៃ ថា សម្ដេច ស ខេង មិនបានសន្យាដោះលែងមន្ត្រីអាដហុក និងគជប ឡើយ
× ភ្នំពេញ៖ ក្រសួងមហាផ្ទៃ បដិសេធថា សម្ដេច ស ខេង មិនបានសន្យាដោះលែងមន្ត្រីអាដហុក និងគជប ដូចការចុះផ្សាយឡើយ។ ការបដិសេធរបស់ក្រសួងមហាផ្ទៃនេះ ធ្វើឡើងក្រោយពីប្រព័ន្ធផ្សព្វផ្សាយបានស្រង់សម្ដីសកម្មជនដីធ្លី ដែលទទូចឲ្យរដ្ឋាភិបាលដោះលែងអ្នកជាប់ឃុំទាំងនោះ តាមការសន្យា។
អ្នកនាំពាក្យខុទ្ទកាល័យសម្ដេច ស ខេង លោក ខៀវ សុភ័គ បានចាត់ទុកការលើកឡើងរបស់ក្រុមសកម្មជនដីធ្លីទាំងនោះ ជាការបំភ្លើសដោយគ្មានការពិត និងបំពុលបរិយាកាស ដែលធ្វើឲ្យសាធារណជនមានការភ័ន្តច្រឡំទៅនឹងអ្វីដែលសម្ដេច ស ខេង បានប្រាប់អ្នកសារព័ត៌មាននៅរដ្ឋសភា កាលពីថ្ងៃទី៧ ធ្នូ ឆ្នាំ២០១៦កន្លងមក។ លោក ខៀវ សុភ័គ ដែលអះអាងថា សម្ដេច ស ខេង មិនបានសន្យាដោះលែងអ្នកជាប់ឃុំទាំងនោះ បានស្រង់សម្ដីរដ្ឋមន្ត្រីក្រសួងមហាផ្ទៃ យ៉ាងដូច្នេះ៖«ខ្ញុំអត់បានជជែករឿងនេះទេ គឺឯកឧត្តម កឹម សុខា ជជែកជាមួយសម្ដេចតេជោ ហើយប្រហែលជាបើតាមខ្ញុំដឹងមុនដំណាច់ខែ១២នេះ (ធ្នូ ២០១៦) និងមានការដោះស្រាយករណីមន្ត្រីសិទ្ធិមនុស្ស ហើយនិងអគ្គលេខាធិការរងគជប»។
ជាមួយគ្នានេះអ្នកនាំពាក្យខុទ្ទកាល័យសម្ដេច ស ខេង រូបនេះ បានពន្យល់អត្ថន័យពាក្យ «បើតាមខ្ញុំដឹង» របស់សម្ដេច ស ខេង នោះយ៉ាងដូច្នេះថា៖« ពុំមែនមានន័យថា ជាការសន្យាទេ។ ម្យ៉ាងវិញទៀតនីតិវិធីតុលាការពុំទាន់ចប់ ដូចនេះពុំដឹងថាអ្នកទាំងអស់នោះមានទោស ឬអត់»។
ដោយសារតែមានការប៉ុនប៉ងជួបចរចាសុំឲ្យមានការដោះលែងមន្ត្រីអាដហុក និងគជប ពីសំណាកគណបក្សប្រឆាំងនោះ សម្ដេចនាយករដ្ឋមន្ត្រី ហ៊ុន សែន ក៏បានបង្ហាញពីបំណងនៃការលុបចោលនូវ តំណែងជាប្រធានក្រុមមតិភាគតិច និងប្រធានក្រុមតំណាងរាស្ត្រនៅក្នុងរដ្ឋសភា របស់ឯកឧត្តម កឹម សុខា ផងដែរ។
យ៉ាងណាក្តី អ្នកវិភាគ នៅតែយល់ឃើញថា ដោយសារតែបរាជ័យក្នុងការបំបែកគណបក្សសង្គ្រោះជាតិ ទើប សម្តេច ហ៊ុន សែន ដែលជាប្រធានគណបក្សប្រជាជនផងនោះ បង្ហើបគំនិតស្នើឲ្យមានការលុបតំណែងជាប្រធានមតិភាគតិច របស់ឯកឧត្តម កឹម សុខា ដែលមានឋានៈស្មើនាយករដ្ឋមន្ត្រី៕
Tag:
ស ខេង
អាដហុក
គជប
ក្រសួងមហាផ្ទៃ
© រក្សាសិទ្ធិដោយ thmeythmey.com