អន្តរជាតិ
ចលនាបាតុកម្មផុសផុលស្វាគមន៍ ការស្បថចូលកាន់តំណែងរបស់លោក ត្រាំ
× ថ្ងៃស្បថចូលកាន់តំណែងរបស់ លោក ដូណាល់ ត្រាំ មកដល់ទៅហើយ តែអ្វីដែលគួរឲ្យភ្ងាក់ផ្អើលចលនាបាតុកម្មប្រឆាំងលោកកើតឡើងផុសផុលនៅក្រុង ញូវយ៉ក និងនៅក្រុងវ៉ាស៊ីនតោនទៅវិញ។ នៅក្រុងញូវយ៉ក គេឃើញអភិបាល រួមជាមួយបណ្តាសកម្មជនសិទ្ធិមនុស្ស និងតួសម្តែងល្បីៗផ្សេងទៀតដឹកនាំចលនាបាតុកម្មនេះ។
គ្មានការស្វាគមន៍ការស្បថចូលកាន់តំណែងរបស់លោក ដូណាល់ ត្រាំ នៅញូវយ៉កឡើយ។ ប្រជាជនក្រុងញូវយ៉កច្រើនក្រុមបែរជាជួបជុំគ្នាដើម្បីបាតុកម្មប្រឆាំងប្រធានាធិបតីទី ៤៥របស់សហរដ្ឋអាមេរិកទៅវិញ ដោយពួកគេអះអាងថា គេមិនពេញចិត្តលោក ត្រាំឡើយ។
នៅក្រុងញូវយ៉ក ចលនាបាតុកម្មនោះត្រូវរៀបចំឡើយនៅក្បែររបស់អាគាររបស់លោក ដូណាល់ ត្រាំ។ យោងតាមសារព័ត៌មាន The Independent អភិបាលក្រុងញូវយ៉កលោក Bill de Blasio ស្ថិតក្នុងចំណោមអ្នកចូលរួមបាតុកម្ម ហើយគេឃើញមានវត្តមានសកម្មជនសិទ្ធិមនុស្ស និងតារាសម្តែងល្បីៗជាច្រើនទៀតដូចជា Reverend Al Sharpton, Mark Ruffalo, Michael Moore, Shailene Woodley, Rosie Perez, Alec Baldwin ជាដើមផង។
ក្រៅក្រុងញូវយ៉ក បាតុកម្មក៏ត្រូវគេរៀបចំឡើងនៅក្រុងវ៉ាស៊ីនតោនដែរ ដើម្បីបង្ហាញការមិនពេញចិត្តអនាគតប្រធានាធិបតិអាមេរិកដែរ។ គោលបំណងសំខាន់របស់ពួកគេគឺ រារាំងដូណាល់ ត្រាំ មិនឲ្យស្បថចូលកាន់តំណែងបានតាមកំណត់។
បើតាមសារព័ត៌មាន The Hill ក្រុមមួយទៀតមានឈ្មោះថា DisruptJ20 បានរៀបចំគម្រោងអស់ច្រើនសប្តាហ៍មកហើយដើម្បីធ្វើយ៉ាងណារារាំងពិធីស្បថចូលកាន់តំណែងដោយរៀបចំបិទផ្លូវ និងធ្វើបាតុកម្មតវ៉ាសទ្រង់ទ្រាយធំ។
តាមពិតទៅ ពួកគេមិនពេញចិត្តអនាគតប្រធានាធិបតីរបស់ខ្លួនឡើយ។ កន្លងមកប្រធានាធិបតីរូបនេះ បានប្រើប្រាស់សម្តីចម្អាសចម្អូង និងរើសអើងភេទ ក៏ដូចជាពូជសាសន៍នោះបានបង្កឲ្យមានការខឹងសម្បារក្នុងចំណោមប្រជាជនអាមេរិកជាពិសេសសហគមន៍សិទ្ធិមនុស្ស, សិទ្ធិស្ត្រី, សិទ្ធិអ្នកស្រលាញ់ភេទដូចគ្នា និងក្រុមសកម្មជនជាដើម។
ក្រៅពីចលនាបាតុកម្ម សមាជិកបក្សប្រជាធិបតេយ្យ និងសមាជិកបក្សសាធារណរដ្ឋខ្លះពហិការចូលរួមក្នុងពិធីស្បថចូលកាន់តំណែងរបស់លោក ដូណាល់ ត្រាំ នៅថ្ងៃសុក្រទី ២០មករា។ អតីតប្រធានាធិបតី George H. W Bush និងភរិយាក៏មិនបានអញ្ជើញចូលរួមពិធីនេះដែរ ហើយលោកបានផ្ញើសារជូនពរនិងសូមអភ័យទោសលោក ដូណាល់ ត្រាំ រួចហើយដែរ៕
Tag:
ដូណាល់ ត្រាំ
ញូវយ៉ក
វ៉ាស៊ីនតោន
© រក្សាសិទ្ធិដោយ thmeythmey.com