ជាតិ
ក្រោយការលើកលែងទោសជិតពីរខែ ឯ.ឧ កឹម សុខា មិនទាន់បានចុះមូលដ្ឋានតាមបំណងខ្លួន
× ភ្នំពេញ៖ ក្រោយពីទទួលបានការលើកលែងទោសពីព្រះមហាក្សត្រជិតពីរខែមកនេះ ឯកឧត្តម កឹម សុខា ប្រធានស្តីទីគណបក្សសង្គ្រោះជាតិ មិនទាន់បានចុះជួបអ្នកគាំទ្រនៅមូលដ្ឋាន តាមបំណងខ្លួនឡើយ ព្រោះរង់ចាំការដោះស្រាយបញ្ហាជាមួយគណបក្សប្រជាជនកម្ពុជា។
បំណងទី១ ដែលឯកឧត្តម កឹម សុខា ចង់បំពេញមុនគេ នៅពេលដែលលោកកំពុងឃុំខ្លួនឯងក្នុងទីស្នាក់ការគណបក្សនោះ គឺការចុះជួបពលរដ្ឋនៅតាមមូលដ្ឋាន។ ប្រធានស្តីទីគណបក្សសង្គ្រោះជាតិរូបនេះ ធ្លាប់បានប្រាប់ពីអារម្មណ៍ផ្ទាល់ខ្លួនថា រូបឯកឧត្តមពិតជានឹកប្រជាជននៅតាមបណ្តាខេត្ត និងចង់ទៅជួបអ្នកគាំទ្រទាំងនោះណាស់។ ការលើកឡើងរបស់ឯកឧត្តម កឹម សុខា បន្ទាប់ពីព្រះមហាក្សត្រ សម្រេចលើកលែងទោសកាលពីចុងឆ្នាំ២០១៦។
គិតមកដល់ពេលនេះ មានរយៈពេលជាង១ខែហើយ ដែលឯកឧត្តម កឹម សុខា មានសេរីភាពវិញ ប៉ុន្តែលោកមិនទាន់បានបំពេញការងារតាមមូលដ្ឋាន ជួបអ្នកគាំទ្រខ្លួន តាមក្តីបំណងឡើយ។ មូលហេតុដែលឯកឧត្តម កឹម សុខា មិនទាន់សម្រេចចិត្តចុះតាមមូលដ្ឋាននោះ គឺដោយសារតែរង់ចាំការជួបចរចាជាមួយគណបក្សប្រជាជនកម្ពុជា ស្វែងរកដំណោះស្រាយបញ្ហាប្រទេសជាតិជាមុនសិន។ នេះបើយោងតាមសំណេររបស់លោក អេង ឆៃអ៊ាង មន្ត្រីគណបក្សប្រឆាំង។
បើទោះជាមិនទាន់បានចុះតាមមូលដ្ឋានក្តី តែប្រធានស្តីទីបក្សប្រឆាំងរូបនេះ បានបំពេញការងារខ្លួន ដោយបើកកិច្ចប្រជុំជាមួយក្រុមការងារនៅក្នុងទីស្នាក់ការគណបក្ស , ចូលរួមសិក្ខាសាលាថ្នាក់ដឹកនាំគណបក្ស និងជួបពិភាក្សាការងារជាមួយបណ្ដាអង្គទូតនានាប្រចាំកម្ពុជា។ ជាពិសេសនោះ ការចូលរួមកិច្ចប្រជុំអនុម័តនៅក្នុងរដ្ឋសភាជាដើម។ នេះបើមើលទិដ្ឋភាពជាក់ស្ដែងដែលបានបង្ហោះនៅលើហ្វេសប៊ុករបស់ឯកឧត្តម កឹម សុខា។
តែយ៉ាងណាមន្ត្រីជាន់ខ្ពស់គណបក្សសង្គ្រោះជាតិលោក អេង ឆៃអ៊ាង បានលើកឡើងថា ប្រធានស្តីទី ឯកឧត្តម កឹម សុខា ទំនងជានឹងចុះជួបពលរដ្ឋតាមមូលដ្ឋានវិញនៅពេលខាងមុខនេះ ប្រសិនជាបរាជ័យក្នុងដោះស្រាយបញ្ហាជាមួយគណបក្សប្រជាជនកម្ពុជា។ «បើគណបក្សកាន់អំណាច គេមិនត្រូវការជួបចរចាជាមួយយើង យើងត្រូវនាំគ្នាទៅនិយាយជាមួយប្រជាពលរដ្ឋនៅតាមមូលដ្ឋាន»។ នេះជាសំណេររបស់លោក អេង ឆៃអ៊ាង ដែលបានស្រង់សម្ដីឯកឧត្តម កឹម សុខា នៅក្នុងកិច្ចប្រជុំថ្នាក់ដឹកនាំគណបក្សរាជធានី ខេត្ត នៅទីស្នាក់ការកណ្តាលគណបក្សនៅថ្ងៃទី២០ មករា ៕
© រក្សាសិទ្ធិដោយ thmeythmey.com