រត់កាត់ឧបសគ្គចម្ងាយឆ្ងាយ១២៨គីឡូម៉ែត្រចេញដំណើរនៅម៉ោង១១យប់នេះ

កីឡាជាតិ

ជាតិ

រត់កាត់ឧបសគ្គចម្ងាយឆ្ងាយ១២៨គីឡូម៉ែត្រចេញដំណើរនៅម៉ោង១១យប់នេះ

20, Jan 2017 , 6:37 pm

រូបភាព

ដោយ:

ការរត់ប្រណាំងចម្ងាយឆ្ងាយ១២៨គីឡូម៉ែត្រកាត់ឧបសគ្គនៅលើទឹកដីអង្គរខេត្តសៀមរាបដែលជាវិញ្ញាសាស្នូលរបស់ព្រឹត្តិការណ៍ Ultra Trail Angkor លើកទី២នឹងចេញដំណើរនៅម៉ោង១១យប់ថ្ងៃទី២០ ខែមករា នេះ។ ចំណែកវិញ្ញាសា៣ផ្សេងទៀតចេញដំណើរនៅព្រឹកថ្ងៃទី២១ ខែមករា។ព្រឹត្តិការណ៍នេះមានអត្តពលិកចូលរួមប្រមាណជា៥០០នាក់មកពី៣៧ប្រទេសទូទាំងពិភពលោក។

វិញ្ញាសារត់ចម្ងាយ១២៨គីឡូម៉ែត្រកាត់ព្រៃប្រឹក្សាលតាវល្លិ៍ និងប្រាង្គប្រាសាទបុរាណជាពិសេសឆ្លងភាពងងឹតនៅលើទឹកដីអង្គរនៃខេត្តសៀមរាប នឹងចេញដំណើរនាវេលាម៉ោង១១យប់ថ្ងៃទី២០ ខែមករា នេះនៅចំណុចចាប់ផ្តើមទីលានជល់ដំរី។ អត្តពលិកដែលចូលរួមវិញ្ញាសានេះមិនត្រឹមតែរត់កាត់ព្រៃប្រឹក្សា និងប្រាង្គប្រាសាទនៅតំបន់អង្គរប៉ុណ្ណោះទេ គឺត្រូវរត់កាត់វាលស្រែ និងភូមិរបស់ប្រជាពលរដ្ឋ។ លើសពីអ្នករត់ត្រូវមានភ្លើងពិលម្នាក់មួយដើម្បីបំភ្លឹផ្លូវថែមទៀតផង។ ប៉ុន្តែអត្តពលិកទាំងនោះអាចឈប់សម្រាក និងពិសារអាហារនៅតាមដងផ្លូវ។

បើយោងតាមគណៈកម្មការរៀបចំការប្រកួតព្រឹត្តិការណ៍ Ultra Trail Angkor វិញ្ញាសារត់ចម្ងាយ១២៨គីឡូម៉ែត្រដែលជាវិញ្ញាសាសំខាន់គេនោះ អត្តពលិកទាំងអស់នឹងមកដល់គោលដៅនៅចន្លោះពីម៉ោង១០ទៅម៉ោង១២ព្រឹកថ្ងៃទី២១ ខែមករា។ ទោះបីជាវិញ្ញាសាមានលក្ខណលំបាកជាងគេក៏ដោយ ប៉ុន្តែវិញ្ញាសានេះគឺទាក់ទាញមនុស្សឲ្យចូលរួមច្រើនជាងគេ។ ហើយក្នុងចំណោមអត្តពលិកទាំងអស់គឺមានកីឡាការិនីស្ទើរពាក់កណ្តាលចូលរួម។

ដោយឡែក សម្រាប់វិញ្ញាសារត់ចម្ងាយ១៦គីឡូម៉ែត្រ, ៣២គីឡូម៉ែត្រ និង៦៤គីឡូម៉ត្រ នឹងចេញដំណើរនៅព្រឹកថ្ងៃទី២១ ខែមករា។ ក្រៅពីវិញ្ញាសាទាំងនេះក៏មានការដើរកម្សាន្តដើម្បីមនុស្សធម៌ចម្ងាយ៨គីឡូម៉ែត្រផងដែរ។ គួរបញ្ជាក់ថា ព្រឹត្តិការណ៍ Ultra Trail Angkor លើកទី២ដែលជាព្រឹត្តិការណ៍មនុស្សធម៌ ទទួលបានអត្តពលិកចូលរួមប្រមាណជា៥០០នាក់មកពី៣៧ប្រទេស ខណៈឆ្នាំមុនមានត្រឹមតែជិត៣០០នាក់មកពី២៦ប្រទេសចូលរួម៕