ក្នុងខែមីនានេះ កុមារប្រមាណ ៦ម៉ឺននាក់ សម្រាកព្យាបាលនៅមន្ទីរពេទ្យគន្ធបុប្ផា

ជាតិ

ព័ត៍មានសុខភាព

ក្នុងខែមីនានេះ កុមារប្រមាណ ៦ម៉ឺននាក់ សម្រាកព្យាបាលនៅមន្ទីរពេទ្យគន្ធបុប្ផា

29, Mar 2017 , 7:59 am

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ ក្នុងខែមីនានេះ មន្ទីរពេទ្យគន្ធបុប្ផាបានទទួលព្យាបាលកុមារកម្ពុជា ចំនួន ៦១៤៤៧នាក់ នៅរាជធានីភ្នំពេញ និងខេត្តសៀមរាប។ ជាមួយគ្នានេះ កុមារកម្ពុជាជាង ១ម៉ឺននាក់ មានជំងឺធ្ងន់ធ្ងរ និងជិត ២ពាន់នាក់ផ្សេងទៀត បានទទួលការវះកាត់នៅក្នុងមន្ទីរពេទ្យគន្ធបុប្ផា។

មន្ទីរពេទ្យគន្ធបុប្ផា ទាំងនៅរាជធានីភ្នំពេញ និងខេត្តសៀមរាប ក្នុងខែមីនា ឆ្នាំ២០១៧នេះ បានទទួលព្យាបាលកុមារចំនួន ៦១៤៤៧នាក់ មកពិនិត្យព្យាបាល។ ដោយក្នុងនោះ មន្ទីរពេទ្យគន្ធបុប្ផា ខេត្តសៀមរាប បានទទួលព្យាបាលកុមារឈឺចំនួន ២០៦៦២នាក់ និងកុមារជំងឺធ្ងន់ៗប្រមាណ ៥៣១១នាក់។ ម្យ៉ាងទៀត កុមារដែលមានជំងឺរលាកខួរក្បាលធ្ងន់ធ្ងរ ចំនួន ៩៤នាក់ ក៏បានមកព្យាបាលនៅមន្ទីរពេទ្យគន្ធបុប្ផាសៀមរាបផងដែរ។ ចំណែកផ្នែកវះកាត់ បានវះកាត់ចំនួន ៨៥៣ករណី និងវះកាត់បេះដូងបានចំនួន ២៦នាក់។

ដោយឡែក មន្ទីរពេទ្យគន្ធបុប្ផារាជធានីភ្នំពេញ បានទទួលព្យាបាលកុមារប្រមាណ ៤០៧៨៥នាក់ និងកុមារមានជំងឺធ្ងន់ ចំនួន ៦២៩៥នាក់។ សម្រាប់ជំងឺរលាកខួរក្បាលធ្ងន់ធ្ងរ មន្ទីរពេទ្យគន្ធបុប្ផាភ្នំពេញ បានទទួលព្យាបាល កុមារចំនួន ៥៨នាក់ និងការវះកាត់ចំនួន ១០៣៦ករណី។

បើតាមតួលេខនៅលើទំព័រហ្វេសប៊ុកផ្លូវការរបស់លោក បេអាត រិចឆ្នឺរ ស្ថាបនិកនិងជាប្រធានមន្ទីរពេទ្យគន្ធបុប្ផា កាលពីថ្ងៃទី២៥ មីនានេះ បញ្ជាក់ថា គ្រួសារអ្នកជំងឺភាគច្រើន មានជីវភាពទីទ័លក្រ ខ្លះក្រីក្រខ្លាំង ហេតុនេះហើយ ទើបរាល់ការព្យាបាលទាំងអស់ មិនគិតថ្លៃ សម្រាប់អ្នកជំងឺគ្រប់គ្នា។ បន្ថែមលើនេះ ក្នុងរបាយការណ៍នេះ លើកឡើងថា កុមារដែលមានជំងឺធ្ងន់ៗបំផុត នឹងពុំមានសំណាងល្អទេ បើពុំបានសម្រាកព្យាបាលនៅមន្ទីរពេទ្យ។

គួរបញ្ជាក់ថា មន្ទីរពេទ្យគន្ធបុប្ផា មិនមានបុគ្គលិកណាម្នាក់ ឆ្លៀតធ្វើការក្រៅម៉ោង នៅគ្លីនិកឯកជនឡើយ។ ជាពិសេស មិនមានបុគ្គលិកណាម្នាក់នៅក្នុងមន្ទីរពេទ្យគន្ធបុប្ផា ទារប្រាក់ពីគ្រួសារអ្នកជំងឺឡើយ៕