ជាតិ
ក្រសួងបរិស្ថាន កំពុងរកមូលហេតុដែលនាំឲ្យត្រីងាប់ច្រើនក្នុងដងស្ទឹងសែន
× មន្ត្រីក្រសួងបរិស្ថាន កំពុងស្រាវជ្រាវរកមូលហេតុ ដែលនាំឲ្យត្រីជាច្រើនក្បាលងាប់ នៅក្នុងដងស្ទឹងសែន ក្នុងទឹកដីខេត្តព្រះវិហារ។ រយៈពេលជាងមួយសប្ដាហ៍កន្លងមកនេះ ប្រជាពលរដ្ឋបានប្រទះឃើញត្រីងាប់ជាបន្តបន្ទាប់នៅក្នុងទឹកស្ទឹងសែន ដោយមិនទាន់ដឹងមូលហេតុឡើយ។
អ្នកនាំពាក្យក្រសួងបរិស្ថាន លោក ហេង ដារ៉េត បានឲ្យដឹងថា ក្រោយពីមានករណីត្រីងាប់រាប់ម៉ឺនក្បាលនេះ មន្ត្រីជំនាញបរិស្ថានខេត្តព្រះវិហារ បានចុះសិក្សាស្រាវជ្រាវ និងបានយកទឹកស្ទឹងសែននោះ មកត្រួតពិនិត្យក្នុងមន្ទីពិសោធន៍ហើយ ប៉ុន្តែមិនទាន់ដឹងលទ្ធផលយ៉ាងណានោះទេ។ បើតាមលោក ហេង ដារ៉េត នៅពេលនេះគណៈប្រតិភូរបស់ក្រសួង ក៏បានចុះទៅពិនិត្យមើលដោយផ្ទាល់ហើយដែរ ដើម្បីសិក្សារកមូលហេតុឲ្យច្បាស់លាស់ថា តើប្រភពដើមដែលបណ្ដាឲ្យត្រីងាប់នេះ វាកើតចេញមកពីបញ្ហាអ្វី?
ប្រជាពលរដ្ឋ ដែលរស់នៅក្នុងស្រុកចំនួនពីរ គឺស្រុកជ័យសែន និងស្រុករវៀង ខេត្តព្រះវិហារ បាននាំគ្នាអុំទូករើសត្រីដែលងាប់ទាំងនោះ យកទៅចម្អិនធ្វើជាអាហារ និងធ្វើប្រហុក ឬផ្អក ផងដែរ។ ត្រង់ចំណុចនេះលោក ហេង ដារ៉េត ក៏មិនទាន់អាចសន្និដ្ឋានថា ត្រីដែលពលរដ្ឋនាំគ្នាយកមកចម្អិនជាម្ហូបនេះ នឹងអាចប៉ះពាល់ដល់សុខភាពពួកគាត់ដែរ ឬយ៉ាងណានោះទេ ដោយរងចាំមើលលើការពិសោធន៍សិន។
អ្នកនាំពាក្យក្រសួងបរិស្ថានរូបនេះ បានបញ្ជាក់ដូច្នេះថា៖« ចំពោះត្រីដែលងាប់ហើយ ប្រជាពលរដ្ឋរើសយកទៅបរិភោគនោះ វាអាចមានការប៉ះពាល់ ដល់សុខភាព ឬយ៉ាងនោះក្រសួងមិនទាន់ហ៊ានសន្និដ្ឋានដែរ ដោយសារលទ្ធផលពិសោធន៍មិនចេញ ហើយក្រុមការងារ បរិស្ថានចុះទៅនោះ នឹងដងយកសំណាកទឹកស្ទឹងសែន ដើម្បី យកមកចូលមន្ទីរពិសោធន៍ ក្នុងការផ្ទៀងផ្ទាត់គ្នា »។
តែយ៉ាងណាអាជ្ញាធរខេត្តព្រះវិហារ ក៏បានហាមពលរដ្ឋមិនឲ្យរើសត្រីដែលងាប់ទាំងនោះយកមកធ្វើជាចំណីអាហារផងដែរ ដើម្បីបញ្ចៀសកុំឲ្យមានការប៉ះពាល់ដល់សុខភាព ។
ទាក់ទងនឹងករណីពុលត្រីងាប់រាប់ម៉ឺនក្បាលក្នុងស្ទឹងសែននេះ ត្រូវបានប្រជាពលរដ្ឋដាក់ការសង្ស័យថា បណ្ដាលមកពីរោង ចក្រស្ករអំពៅរបស់ក្រុមចិនឈ្មោះ រួយ ហ្វេង (Rouy Feng) បង្ហូរ កាកសំណល់មានជាតិពុលចូលទៅក្នុងស្ទឹងនេះ ពីព្រោះទឹកស្ទឹងសែនមានពណ៌ខ្មៅ ហើយមានក្លិនស្អុយ។ បើតាមប្រជាពលរដ្ឋទាំងនោះ កាលពីអំឡុងឆ្នាំ២០១៣ ធ្លាប់មានហេតុការណ៍ពុលត្រីងាប់នៅតាមដងស្ទឹងសែនម្ដងហើយ ព្រោះក្រុមហ៊ុនចិន បង្ហូរកាកសំណល់តាម «អូរព្រាល» រួចធ្លាក់ចូលមកស្ទឹងសែន៕
ប្រភពមកពីអគ្គស្នងការដ្ឋាននគរបាលជាតិ
Tag:
បរិស្ថាន
ត្រី
ព្រះវិហារ
© រក្សាសិទ្ធិដោយ thmeythmey.com