ភ្នំពេញ៖ កាលពីថ្ងៃទី២២ ខែឧសភាកន្លងទៅ ធនាគារ ស៊ីអាយអីមប៊ី ភីអិលស៊ី (CIMB) បានប្រារព្ធពិធីសម្ពោធជាផ្លូវការ ទីស្នាក់ការកណ្តាលដែលមានទីតាំងនៅជាន់ទី៨ នៃអគារ Exchange Square ជាប់ស្ថានទូតសហរដ្ឋអាមេរិក ដែលជាតំបន់ទីប្រជុំជន នៃរាជធានីភ្នំពេញ ។
ព្រឹត្តិការណ៍នេះ មានការចូលរួមជាអធិបតី ពីសំណាក់ លោកជំទាវ អ៊ុក ម៉ាលី ទេសាភិបាលរងធនាគារជាតិនៃកម្ពុជា ក្រុមប្រឹក្សាភិបាល និងគណៈគ្រប់គ្រងរបស់ធនាគារ CIMB ព្រមទាំងភ្ញៀវកិត្តិយសដែលជាអតិថិជនរបស់ធនាគារ សរុបប្រមាណ ៦០នាក់ ។
ថ្លែងក្នុងពិធីសម្ពោធដ៏ឱឡារិកនេះ Dato’ Shaarani Ibrahim ប្រធានក្រុមប្រឹក្សាភិបាលរបស់ធនាគារ CIMB បានកត់សម្គាល់ថា៖ «យើងបន្តអបអរសាទរ ភាពរីកចម្រើនដ៏គួរឲ្យកត់សម្គាល់ ជាមួយនឹងការបើកសម្ពោធទីស្នាក់ការកណ្តាលថ្មី របស់ស៊ីអាយអិមប៊ី ក្នុងប្រទេសកម្ពុជា។ ការវិវត្តន៍ទៅមុខនេះ គឺមិនត្រឹមតែជាសញ្ញានៃការរីកចម្រើនឥតឈប់ឈររបស់ធនាគារ ស៊ីអាយអិមប៊ី នៅកម្ពុជាប៉ុណ្ណោះទេ តែវាក៏ឆ្លុះបញ្ចាំងនូវការប្តេជ្ញាចិត្តរបស់យើងជានិច្ច ក្នុងការផ្តល់នូវលក្ខខណ្ឌ និងស្តង់ដារការងារល្អបំផុត សម្រាប់បុគ្គលិកទាំងអស់របស់ ធនាគារ» ។
មិនតែប៉ុណ្ណោះ លោកប្រធានក្រុមប្រឹក្សាភិបាល បានបន្ថែមទៀតថា៖ បរិយាកាសអំណោយផលនៃការិយាល័យថ្មីនេះ នឹងជួយលើកកម្ពស់ការអភិវឌ្ឍន៍សមត្ថភាពផ្ទាល់ខ្លួនរបស់យើង ស្របតាមការប្តេជ្ញាចិត្តរបស់ស៊ីអាយអិមប៊ី គ្រុប ក្នុងការវិនិយោគលើធនធានមនុស្ស និង ហេដ្ឋារចនាសម្ព័ន្ធរបស់ខ្លួន ដើម្បីចាប់យកកំណើនលូតលាស់បន្ថែមទៀត និងបំពេញតម្រូវការអតិថិជនកាន់តែល្អប្រសើរ។
ជាមួយគ្នានេះ លោកជំទាវ អ៊ុក ម៉ាលី ទេសាភិបាលរងធនាគារជាតិនៃកម្ពុជា ក៏បានថ្លែងអបអរសាទរផងដែរ ចំពោះការខិតខំប្រឹងប្រែង និងការប្តេជ្ញាខ្ពស់របស់ធនាគារ CIMB ក្នុងការសម្រេចបាននូវសមិទ្ធផលល្អប្រសើរ នាពេលកន្លងមក។ លោកជំទាវ បន្តទៀតថា ការសម្ពោធទីស្នាក់ការកណ្តាលថ្មីនេះ បានឆ្លុះបញ្ចាំងពីភាពរីកចម្រើនរបស់ធនាគារ ជាបន្តបន្ទាប់ តាមរយៈការទទួលបានទំនុកចិត្តពីសាធារណជន ការទទួលបានប្រាក់ចំណេញ និងមានធនធានមនុស្សប្រកបដោយគុណវុឌ្ឍិ ព្រមទាំងឆន្ទៈរបស់ធនាគារ ក្នុងការខិតខំប្រឹងប្រែងលើកកម្ពស់ប្រសិទ្ធភាពការងារ ដើម្បីឆ្លើយតបតាមតម្រូវការរបស់អតិថិជន ឲ្យបានកាន់តែប្រសើរ។
គួរបញ្ជាក់ផងដែរ ធនាគារ CIMB បានដំណើរការអាជីវកម្មរបស់ខ្លួន ក្នុងឆ្នាំ២០១០ ដោយសាខាចំនួន២ នៅក្នុងរាជធានីភ្នំពេញ និងមានបុគ្គលិកប្រមាណ ៥០នាក់តែប៉ុណ្ណោះ។ ក្នុង រយៈពេល៧ឆ្នាំ កន្លងមកនេះ ធនាគារ ស៊ីអាយអិមប៊ី ភីអិលស៊ី បានរីកចម្រើនឡើង ពីមួយឆ្នាំ ទៅមួយឆ្នាំ ហើយមានចំនួនបុគ្គលិកកើនឡើង រហូតដល់ជាង ៣០០នាក់ ព្រមទាំងបានពង្រីកបណ្តាញសាខា រហូតទៅដល់ ១២កន្លែង រួមជាមួយការិយាល័យកណ្តាល ដែលក្នុងនោះមាន ៨សាខា នៅរាជធានីភ្នំពេញ និង ៤សាខាទៀត នៅតាមបណ្តាខេត្តសំខាន់ៗ ទូទាំងប្រទេសកម្ពុជា។
អំពីធនាគារ ស៊ីអាយអិមប៊ី ភីអិលស៊ី
ធនាគារ ស៊ីអាយអិមប៊ី ភីអិលស៊ី ជាផ្នែកមួយនៃស៊ីអាយអិមប៊ី គ្រុប ដែលបានចាប់ផ្តើមប្រតិបត្តិការ នៅថ្ងៃទី១៩ ខែវិច្ឆិកា ឆ្នាំ២០១០ ដោយបានបើកសាខាពាណិជ្ជទី១ នៅចំកណ្តាលរាជធានីភ្នំពេញ។ បច្ចុប្បន្ន ធនាគារមានសាខាចំនួន ១១កន្លែង នៅក្នុងខេត្តរាជធានីសំខាន់ៗទាំង៥ រួមមានរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកំពង់ចាម និងខេត្តបាត់ដំបង។ ជាមួយនឹងអតិថិជនសរុបប្រមាណ ១៩,០០០នាក់ ធនាគារ ស៊ីអាយអិមប៊ី មានផ្តល់ជូនសេវាកម្ម និងផលិតធនាគារដ៏ទូលំទូលាយ រួមមានសេវាកម្មហិរញ្ញវត្ថុបុគ្គល សេវាកម្មធនាគារពាណិជ្ជ ព្រមទាំងសេវាកម្មសាជីវកម្ម និងប្រតិបត្តិការធនាគារផងដែរ។
ស៊ីអាយអិមប៊ី គ្រុប គឺជាស្ថាប័នហិរញ្ញវត្ថុដ៏ធំបំផុតទីពីររបស់ប្រទេសម៉ាឡេស៊ី និងជាធនាគារសាកលនាំមុខគេមួយក្នុងតំបន់អាស៊ាន។ ធនាគារនេះមានផ្តល់ជូនសេវាកម្មធនាគារពាណិជ្ជ ធនាគារវិនិយោគ ធនាគារឥស្លាម ក៏ដូចជាផលិតផល និងសេវាកម្មគ្រប់គ្រងទ្រព្យសកម្ម និងធានារ៉ាប់រង។ មានទីស្នាក់ការកណ្តាលនៅក្រុងគូឡាឡាំពួ បច្ចុប្បន្ននេះ ស៊ីអាយអិមប៊ី គ្រុប មានវត្តមាននៅប្រទេសចំនួន ៩ ក្នុងចំណោមប្រទេសទាំង១០ ក្នុងតំបន់អាស៊ាន (ប្រទេសម៉ាឡេស៊ី ឥណ្ឌូនេស៊ី សិង្ហបុរី ថៃ កម្ពុជា ប្រ៊ុយណេ វៀតណាម ភូមា និងឡាវ)។ ក្រៅពីតំបន់អាស៊ាន ស៊ីអាយអិមប៊ី គ្រុប ក៏មានវត្តមាននៅប្រទេសចិន ហុងកុង ឥណ្ឌា ស្រីលង្កា តៃវ៉ាន់ កូរ៉េ សហរដ្ឋអាមេរិក និងចក្រភពអង់គ្លេស។
ស៊ីអាយអិមប៊ី គ្រុប មានបណ្តាញសាខាធំជាងគេនៅក្នុងតំបន់អាស៊ាន ជាមួយសាខាជាង ១ពាន់កន្លែង គិតត្រឹមថ្ងៃទី៣១ ខែមិថុនា ឆ្នាំ២០១។ ធនាគារវិនិយោគរបស់ស៊ីអាយអិមប៊ី គ្រុប ក៏ស្ថិតក្នុងចំណោមធនាគារវិនិយោគធំជាងគេបំផុត ក្នុងតំបន់អាស៊ីប៉ាស៊ីហ្វិក ដែលផ្តល់ការ វិភាគ ទៅលើផ្សារភាគហ៊ុនរបស់ក្រុមហ៊ុនជាង ១ពាន់ ក្រុមហ៊ុននៅក្នុងតំបន់។
ស៊ីអាយអិមប៊ី គ្រុប ដំណើរការអាជីវកម្ម តាមរយៈអង្គភាពចម្បងបី គឺធនាគារ ស៊ីអាយអិមប៊ី (CIMB Bank) ធនាគារវិនិយោគ ស៊ីអាយអិមប៊ី (CIMB Investment Bank) និងធនាគារ ស៊ីអាយអិមប៊ី ឥស្លាម (CIMB Islamic)។ ស៊ីអាយអិមប៊ី គ្រុប មានភាគហ៊ុន ៩៧,៩ភាគរយ នៅក្នុងធនាគារ ស៊ីអាយអិមប៊ី នៀហ្គា (Bank CIMB Niaga) នៅប្រទេសឥណ្ឌូនេស៊ី និង ៩៣,៧ភាគរយ នៅធនាគារ ស៊ីអាយអិមប៊ី ថៃ (CIMB Thai) នៅក្នុងប្រទេសថៃ។
ស៊ីអាយអិមប៊ី គ្រុប ត្រូវបានចុះបញ្ជីភាគហ៊ុននៅលើទីផ្សារមូលបត្រ ប៊ូរសា ម៉ាឡេស៊ី (Bursa Malaysia) តាមរយៈ ស៊ីអាយអិមប៊ី គ្រុប ហូលឌីង ប៊ឺហាដ (CIMB Group Holding Berhad)។ ស៊ីអាយអិមប៊ី គ្រុប មានមូលធនទីផ្សារ នៅលើទីផ្សារមូលបត្រ ប្រហែលជា ៣៨,១ ពាន់លាន រីងហ្គីតម៉ាឡេស៊ី គិតត្រឹមថ្ងៃទី ៣០ ខែមិថុនា ឆ្នាំ២០១។ ស៊ីអាយអិមប៊ី គ្រុប មានបុគ្គលិកសរុបជាង ៤ម៉ឺននាក់ នៅក្នុងប្រទេសចំនួន ១៦៕
(អត្ថបទពាណិជ្ជកម្ម)