ជាតិ
រយៈពេល៥ខែដើមឆ្នាំ មនុស្ស ៤១នាក់ស្លាប់ និង ៤៤នាក់របួស ដោយសាររន្ទះបាញ់
× ភ្នំពេញ៖ ក្នុងរយៈពេល៥ខែដើមឆ្នាំ២០១៧នេះ មានមនុស្សចំនួន ៤១ នាក់ បានស្លាប់ និង ៤៤ នាក់ រងបួស ដោយសាររន្ទះបាញ់។ នេះបើតាមការបញ្ជាក់របស់នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី។
នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ លោក កែវ វី បានប្រាប់សារព័ត៌មានថ្មី ឲ្យដឹងថា៖ «រយៈពេល៥ខែដើមឆ្នាំនេះ បាតុភូតធម្មជាតិខ្យល់កន្ត្រាក់បានសម្លាប់មនុស្សចំនួន ២នាក់ និងរបួសចំនួន ៣៥នាក់។ ម្យ៉ាងទៀត បាតុភូតរន្ទះបាញ់វិញ បានសម្លាប់មនុស្សចំនួន ៤១នាក់ និងរបួស ៤៤នាក់ រួមទាំងងាប់គោក្របី ៤៦ក្បាល»។
លោក កែវ វី បានបញ្ជាក់ថា គ្រោះធម្មជាតិខ្យល់កន្ត្រាក់រយៈពេល៥ខែនេះ បានកើតឡើងចំនួន ៩៩លើក នៅខេត្តចំនួន ២០ បណ្ដាលឲ្យមនុស្សចំនួន ២នាក់ស្លាប់ និងរបួស ៣៥នាក់។ គ្រោះធម្មជាតិនេះ បានធ្វើឲ្យផ្ទះ ៣៣៩ខ្នងខូតខាត និងផ្ទះ ២៣៩៦ខ្នងផ្សេងទៀត របើកដំបូល។
ថ្លែងប្រាប់សារព័ត៌មានថ្មីៗ នាយកខុទ្ទកាល័យរូបនេះ លើកឡើងថា ៖ «តួលេខបាតុភូតរន្ទះបាញ់ ក្នុងឆ្នាំនេះ ប្រហាក់ប្រហែលនឹងឆ្នាំ២០១៦ ដែលរយៈពេលដូចគ្នាំ មានមនុស្សស្លាប់ ៤០នាក់ និងរបួស ៤៨នាក់ រួមទាំងគោក្របីចំនួន ២៩ក្បាល បានងាប់ដោយសាររន្ទះបាញ់»។
នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយរូបនេះ បានក្រើនរំលឹកដល់ប្រជាពលរដ្ឋឲ្យប្រុងប្រយ័ត្ន ចំពោះបាតុភូតធម្មជាតិនេះ និងចូលរួមបង្កាគ្រោះមហន្តរាយផ្សេងៗ ដែលកើតឡើងដោយយថាហេតុ។ លោក បន្តថា ចំពោះបាតុភូតធម្មជាតិផ្សេងៗ មន្ត្រីគ្រប់គ្រងគ្រោះមហន្តរាយ និងមន្ត្រីកម្លាំងប្រដាប់អាវុធ បានចុះពិនិត្យ និងត្រៀមកម្លាំងគ្រប់មធ្យោបាយ ដើម្បីត្រៀមជួយប្រជាពលរដ្ឋទៅកាន់ទីតាំងមានសុវត្ថិភាព៕
© រក្សាសិទ្ធិដោយ thmeythmey.com