អន្តរជាតិ
ត្រាំ ថាសមាជិកណាតូព្រមបង្កើនការចំណាយលើវិស័យយោធា តាមការចង់បានរបស់លោក
× ក្រោយជួបពិភាក្សាជាមួយមេដឹកនាំណាតូនៅព្រុចសែល ប្រធានាធិបតី ដូណាល់ ត្រាំ ប្រកាសថា សមាជិកណាតូសម្រេចចិត្តបង្កើនការចំណាយលើវិស័យការពារជាតិផ្ទាល់ខ្លួនតាមការចង់បានរបស់អាមេរិកហើយ។ តាំងពីយូរមកហើយ ដូណាល់ ត្រាំ តែងតែត្អូញត្អែរជុំវិញការចំណាយមិនគ្រប់ចំនួនកំណត់របស់សមាជិកណាតូ ព្រោះបន្ទុកធ្ងន់វាស្ថិតនៅលើអាមេរិក។
«ប្រទេសសមាជិកបក្សសម្ព័ន្ធណាតូជាច្រើនបានយល់ពេលបង្កើនការចំណាយរបស់ខ្លួន តាមដែលពួកគេគួរធ្វើ។ លុយចាប់ផ្តើមហូរចេញមកហើយ។ ណាតូណានឹងកាន់តែខ្លាំងជាងមុននៅពេលខាងមុខ»។ នេះជាសាររបស់លោក ដូណាល់ ត្រាំ បង្ហោះតាមប្រព័ន្ធទំនាក់ទំនងសង្គម Twitter របស់ខ្លួននៅថ្ងៃសៅរ៍ក្រោយមានជំនួបដ៏តានតឹងមួយជាមួយមេដឹកនាំណាតូនៅព្រុចសែល។
កាលពីថ្ងៃព្រហស្បតិ៍ ប្រធានាធិបតី ត្រាំ ព្យាយាមត្អូញត្អែរជាថ្មីពាក់ព័ន្ធការចំណាយលុយលើវិស័យការពាររបស់សមាជិកណាតូ ហើយលោកថែមទៀតនិយាយថា សមាជិកណាតូនេះជំពាក់លុយអាមេរិកច្រើនដោយបន្តជ្រកក្រោមការពារសន្តិសុខរបស់សហរដ្ឋអាមេរិកក្រោមក្របខណ្ឌណាតូ។
«ក្នុងរយៈពេលប្រាំបីឆ្នាំនេះសហរដ្ឋអាមេរិកចំណាយលុយច្រើនជាងគេសម្រាប់វិស័យការពារជាតិ ពោលគឺច្រើនជាងការចំណាយរបស់សមាជិកណាតូទាំងអស់រួមបញ្ចូលគ្នា»។ លោក ដូណាល់ ត្រាំ បានលើកឡើងដូច្នេះនៅចំពោះមុខមេដឹកនាំណាតូ។
គេដឹងច្បាស់ថា ការទៅចូលរួមកិច្ចប្រជុំកំពូលមេដឹកនាំណាតូលើកដំបូងនេះ លោក ដូណាល់ ត្រាំ គិតឃើញតែរឿងដាក់សម្ពាធឲ្យរដ្ឋណាតូបង្កើនការចំណាយរបស់ខ្លួនលើវិស័យការពារជាតិឲ្យគ្រប់ពីរភាគរយនៃផលិតផលក្នុងស្រុកសរុប។
តាមពិតទៅ ការប្តេជ្ញាបង្កើនការចំណាយនេះជារឿងផ្ទាល់ខ្លួនរបស់ប្រទេសសមាជិកនីមួយៗប៉ុណ្ណោះ។ វាជាការចំណាយលើការបង្កើនសមត្ថភាពយោធារៀងៗខ្លួន ហើយគេអាចនឹងឃើញថវិកាយោធាប្រចាំឆ្នាំរបស់ប្រទេសសមាជិកណាតូកើនឡើងគួរឲ្យកត់សម្គាល់នៅពេលខាងមុខ។
ដោយឡែក ក្នុងពេលផ្តល់សុន្ទរកថានៅព្រុចសែលសប្តាហ៍នេះ ប្រធានាធិបតី ដូណាល់ ត្រាំ បដិសេធបង្ហាញការប្តេជ្ញាចិត្តរបស់សហរដ្ឋអាមេរិកក្នុងការគោរពមាត្រា ៥ នៃសន្ធិសញ្ញាអាត្លង់ទិកខាងជើង ដែលចែងពីការការពារជាសមូហភាពចំពោះសម្ព័ន្ធមិត្តក្នុងពេលមានការវាយប្រហារណាមួយកើតឡើងនោះ។
ក្រៅពីចូលរួមកិច្ចប្រជុំមេដឹកនាំណាតូនៅព្រុចសែល ប្រធានាធិបតីអាមេរិករូបនេះក៏បានចូលរួមក្នុងកិច្ចប្រជុំក្រុមប្រទេសប្រាំពីរនៅអ៊ីតាលីដែរ។ ក្នុងកិច្ចប្រជុំប្រទេសប្រាំពីរ ដូណាល់ ត្រាំ នៅតែរក្សាជំហរខុសគេពេលដែលនិយាយដល់បញ្ហាប្រែប្រួលអាកាសធាតុ។
មិនបានប្រកាសគាំទ្រសន្ធិសញ្ញាក្រុងប៉ារីសស្តីពីការប្រែប្រួលអាកាសធាតុឆ្នាំ ២០១៥ទេ។ដូណាល់ ត្រាំ បញ្ជាក់ថា លោកនឹងសម្រេចចិត្តចុងក្រោយថា គួរបន្តគាំទ្រកិច្ចព្រមព្រៀងអាកាសធាតុនេះឬអត់ ពេលដែលលោកត្រឡប់ទៅកាន់ក្រុងវ៉ាស៊ីនតោនវិញ៕
© រក្សាសិទ្ធិដោយ thmeythmey.com