ជាតិ
នយោបាយជាតិ
សម្តេច ស ខេង និងលោក ស៊ិក ប៊ុនហុក ហាមកម្លាំងប្រដាប់អាវុធយកតួនាទីដើរបំភ័យពេលដំណើរការបោះឆ្នោត
× គណៈបញ្ជាការសន្តិសុខអចិន្ត្រៃយ៍ និងគណៈកម្មាធិការរៀបចំការបោះឆ្នោត (គ.ជ.ប) បានចេញសេចក្ដីណែនាំរួមមួយស្តីពីការពង្រឹងវិន័យ តួនាទី ភារកិច្ច និងការទទួលខុសត្រូវរបស់កងយោធពលខេមរភូមិន្ទ និងនគរបាលជាតិ ចូលរួមក្នុងដំណើរការបោះឆ្នោតឃុំសង្កាត់ នាពេលខាងមុខ។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់នឹងប្រព្រឹត្តទៅនៅថ្ងៃទី៤ ខែមិថុនា។ ដើម្បីឲ្យការបោះឆ្នោតមានភាពរលូន និងភាពត្រឹមត្រូវយុត្តិធម៌ សម្តេច ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈបញ្ជាការសន្តិសុខអចិន្ត្រៃយ៍ បានចុះហត្ថលេខាលើសេចក្តីណែនាំរួមមួយជាមួយលោក ស៊ិក ប៊ុនហុក ប្រធានគណៈកម្មាធិការរៀបចំការបោះឆ្នោត (គ.ជ.ប) ចំពោះកងយោធពលខេមរភូមិន្ទ និងនគរបាលជាតិទាក់ទងនឹងភារកិច្ចដែលត្រូវបំពេញនៅគ្រប់ដំណាក់កាលនៃការបោះឆ្នោត។
តាមរយៈសេចក្តីណែនាំរួមចុះថ្ងៃទី២៤ ឧសភា ឆ្នាំ២០១៧ សម្តេច ស ខេង និងលោក ស៊ិក ប៊ុនហុក បានហាមដាច់ខាតការយកតួនាទី និងសិទ្ធិអំណាច ក្នុងនាមជាកងកម្លាំងប្រអាវុធរបស់ជាតិ ដើរបំផុសបំផុល បំផិតបំភ័យ និងគំរាមកំហែងគ្រប់រូបភាព បង្កឲ្យមានភាពរំជើបរំជួលបាត់សណ្ដាប់ធ្នាប់ និងរបៀបរៀបរយ ជាពិសេសមិនត្រូវប្រើអំណាច ឬឥទ្ធិពលទៅប្រព្រឹត្តសកម្មភាពណាមួយ ដើម្បីគាំទ្រ ឬប្រឆាំងនឹងបេក្ខជនឈរឈ្មោះបោះឆ្នោត តំណាង ឬភ្នាក់ងារ សកម្មជន និងអ្នកគាំទ្រគណបក្សនយោបាយណាមួយ។ គ្រប់សកម្មភាពប្រតិបត្តិការរបស់ខ្លួន គឺមិនត្រូវប្រើប្រាស់គ្រប់រូបភាពប្រដាប់អាវុធគគ្រឹគគ្រេងដែលនាំឲ្យ មានការភាន់ច្រឡំបង្កការភ្ញាក់ផ្អើលជ្រួលច្របល់ និងការភ័យខ្លាចដល់មហាជន។
ចំពោះសមាជិកនៃកងយោធពលខេមរភូមិន្ទ និងនគរបាលជាតិគ្រប់ជាន់ថ្នាក់ ដែលត្រូវបានចាត់ឲ្យបំពេញ ភារកិច្ចជាភ្នាក់ងារសន្ដិសុខបោះឆ្នោត ត្រូវយកចិត្តទុកដាក់ ការអនុវត្តឲ្យបានម៉ឺងម៉ាត់ តាមគោលការណ៍ច្បាប់ស្តីពីការបោះឆ្នោត បទបញ្ជា និងនិតិវិធីសម្រាប់ការបោះឆ្នោតជ្រើសរើសក្រុប្រឹក្សាសង្កាត់ អាណត្តិទី៤ ឆ្នាំ២០១៧ សេចក្ដីណែនាំ ក្រមសីលធម៌សម្រាប់យោធិននៃកងយោធពលខេមរភូមិន្ទ នគរបាលជាតិ និងភ្នាក់ងារសន្ដិសុខបោះឆ្នោត និងបទបញ្ជានានា រួមទាំងពង្រឹងវិស័យផ្ទៃក្នុងរបស់ខ្លួន។
ប្រធានគណៈបញ្ជាការសន្តិសុខអចិន្ត្រៃយ៍ និងប្រធាន គ.ជ.ប បានបញ្ជាក់បន្ថែមថា កងយោធពលខេមរភូមិន្ទ និងនគរបាលជាតិ គ្រប់រូបត្រូវមានករណីចាំបាច់ក្នុងការបង្កនូវបរិយាកាស នយោបាយល្អ ស្ងប់ស្ងាត់ និងដើម្បីរួមចំណែកយ៉ាងសកម្មផ្ដល់សន្តិសុខ សុវត្ថិភាព ការរក្សាសណ្ដាប់ធ្នាប់ និងរបៀបរៀបរយល្អ ដើម្បីការបោះឆ្នោតជ្រើសរើសក្រុមប្រឹក្សាឃុំ-សង្កាត់ មានដំណើរទៅប្រកបដោយសេរី ត្រឹមត្រូវ និងយុត្តិធម៌ គ្មានការបំផិតបំភ័យ ការកំរាមកំហែង និងហិង្សា៕
© រក្សាសិទ្ធិដោយ thmeythmey.com