ជាតិ
ក្រសួងដាក់ចេញចលនាប្រឡងប្រណាំង «បដិសណ្ឋារកិច្ចល្អ» ដើម្បីវាយតម្លៃកម្រិតសេវាកម្មទេសចរណ៍កម្ពុជា រូបលោក ថោង ខុន ពីហ្វេសប៊ុកក្រសួងទេចរណ៍
× ក្រសួងទេសចរណ៍ បានដាក់ចេញកម្មវិធី ចលនាប្រឡងប្រណាំងបដិសណ្ឋារកិច្ចល្អ ដើម្បីវាយតម្លៃលើកម្រិតផ្ដល់សេវាកម្មទេសចរណ៍នៅកម្ពុជា ឲ្យស្របតាមគោលនយោបាយរដ្ឋាភិបាល។
រដ្ឋមន្ត្រីក្រសួងទេសចរណ៍ លោក ថោង ខុន បាននិយាយថា ចលនាប្រឡងប្រណាំងបដិសណ្ឋារកិច្ចនេះ គឺជាការលើកម្ពស់ដល់វិស័យទេសចរណ៍ ក្នុងការរៀបចំផ្នែកសេវាកម្មឲ្យកាន់តែល្អ សម្រាប់ការទទួលភ្ញៀវជាតិ និងអន្តរជាតិ ស្របពេលដែលកម្ពុជាត្រៀមធ្វើជាម្ចាស់ផ្ទះ SEA Game ឆ្នាំ២០២៣ខាងមុខ។ បន្ថែមពីនេះលោក ថោង ខុន បានបញ្ជាក់ថា ក្រសួងទេសចរណ៍បានចុះកិច្ចព្រមព្រៀងជាមួយសាលាបណ្តុះបណ្តាលវិជ្ជាជីវៈទេសចរណ៍ចំនួន០៩ ដើម្បីជំរុញការបណ្តុះបណ្តាលនិងអភិវឌ្ឍជំនាញបដិសណ្ឋារកិច្ច ដល់ម្ចាស់អាជីវកម្មស្របតាមការវិវត្តថ្មីៗ នៃវិស័យទេសចរណ៍កម្ពុជា និងពិភពលោកនាពេលបច្ចុប្បន្ន។
បើតាមក្រសួងទេសចរណ៍ចលនាប្រឡងប្រណាំង បដិសណ្ឋាកិច្ចល្អសម្រាប់ច្រកទ្វារអន្តរជាតិលើកទី២នេះ មានចំនួន០៦ច្រកទ្វារអន្តរជាតិ គឺអាកាសយានដ្ឋានអន្តរជាតិភ្នំពេញ ,អាកាសយានដ្ឋានអន្តរជាតិសៀមរាប ,អាកាសយានដ្ឋានអន្តរជាតិក្រុងព្រះសីហនុ ,ច្រកទ្វារព្រំដែនអន្តរជាតិបាវិត ,ច្រកទ្វារព្រំដែនអន្តរជាតិប៉ោយប៉ែត និងច្រកទ្វារព្រំដែនអន្តរជាតិចាំយាម។ ក្រសួងបន្ថែមថា ភ្ញៀវទេសចរជាតិ និងអន្តរជាតិអាចផ្តល់ការវាយតម្លៃលើកម្រិតនៃភាពពេញចិត្តលើ សេវា Check in និងសេវា X-ray ទៅលើមន្ត្រីអន្តោប្រវេសន៍មន្ត្រីគយ និងចត្តាឡីសក្តិបាន។
កាលពីថ្ងៃទី២២ ខែមិថុនា ឆ្នាំ២០១៦កន្លងមក សម្ដេច ហ៊ុន សែន ធ្លាប់បានលើកឡើងដូច្នេះថា៖ «...ចលនាប្រឡងប្រណាំងបដិសណ្ឋារកិច្ចល្អ ជារបៀបវារៈថ្មីមួយរបស់ជាតិ (National Agenda) ដោយយើងត្រូវយល់ថា “បដិសណ្ឋារកិច្ចល្អ គឺជាកាតព្វកិច្ចរបស់យើងទាំងអស់គ្នា»។
ក្រសួងដាក់ចេញចលនាប្រឡងប្រណាំងបដិសណ្ឋារកិច្ចលើកទីពីរនេះ ដើម្បីវាយតម្លៃលើកម្រិតផ្ដល់សេវាកម្មទេសចរណ៍នៅកម្ពុជា សម្រាប់ទិសដៅឆមាសទី២ ឆ្នាំ២០១៧-២០១៨ខាងមុខ។ ជាពិសេសការត្រៀមខ្លួនទទួលភ្ញៀវទេសជាតិ និងអន្តរជាតិ ពី៧លាននាក់នៅឆ្នាំ២០២០ និង១១លាននាក់នៅឆ្នាំ២០២៥ផងដែរ។ នេះបើតាមលោក ថោង ខុន៕
ប្រតិបត្តិករទេសចរណ៍ដែលជាម្ចាស់អាជីវកម្មទេសចរណ៍មានកាតព្វកិច្ចក្នុងការចូលរួមប្រឡងប្រណាំង ក្នុងចលនាប្រឡងប្រណាំងបដិសណ្ឋារកិច្ចល្អ អាចចុះឈ្មោះលើប្រព័ន្ធ QR-Code និងវាយតម្លៃ តាមរយៈលីងនេះ៖(www.cambodiabesthospitality.org)
Tag:
ក្រសួងទេសចរណ៍
បដិសណ្ឋារកិច្ចល្អ
ប្រព័ន្ធQR-Code
© រក្សាសិទ្ធិដោយ thmeythmey.com