ការប្រឆាំងភេរវកម្មជាប្រធានសំខាន់ក្នុងកិច្ចប្រជុំរដ្ឋមន្ត្រីការបរទេសអាស៊ានខែក្រោយ

អន្តរជាតិ

ការប្រឆាំងភេរវកម្មជាប្រធានសំខាន់ក្នុងកិច្ចប្រជុំរដ្ឋមន្ត្រីការបរទេសអាស៊ានខែក្រោយ

21, Jul 2017 , 5:06 pm

រូបភាព

ដោយ: ថ្មីៗ

កិច្ចប្រជុំរដ្ឋមន្ត្រីការបរទេសអាស៊ានខែសីហានៅហ្វីលីពីននឹងផ្តោតសំខាន់លើការពង្រឹងកិច្ចសហប្រតិបត្តិការប្រឆាំងភេរវកម្មនៅក្នុងតំបន់។ តំណាងអាស៊ាននឹងផ្លាស់ប្តូរមតិយោបល់គ្នាដើម្បីឈានទៅពង្រឹងកិច្ចសហប្រតិបត្តិការប្រឆាំងភេរវកម្ម ស្របពេលដែលតំបន់ទាំងមូលរងគ្រោះកាន់តែខ្លាំងដោយសារចលនាភេរវកម្មផងនោះ។

ការប្រឆាំងភេរវកម្មនឹងក្លាយជាប្រធានបទអាទិភាពគ្របដណ្តប់កិច្ចប្រជុំរដ្ឋមន្ត្រីការបរទេសអាស៊ានខែក្រោយ ដែលវានឹងត្រួសត្រាសផ្លូវសម្រាប់ការពង្រឹងកិច្ចសហការប្រឆាំងភេរវកម្មនេះ។ នេះជាការបញ្ជាក់របស់រដ្ឋមន្ត្រីការបរទេសឥណ្ឌូណេស៊ីលោកស្រី Retno LP Marsudi ក្នុងវេទិកាកិច្ចសន្ទនាអាស៊ាននាក្រុងហ្សាការតានាថ្ងៃពុធ ទី ១៩ ខែកក្កដា។

យោងតាមសារព័ត៌មាន The Jakarta Post ប្រមុខការទូតឥណ្ឌូណេស៊ីបានបញ្ជាក់ថា ជំនួបនៅពេលខាងមុខនេះផ្តល់ឱកាសសម្រាប់បណ្តារដ្ឋមន្ត្រីការបរទេសអាស៊ានពិភាក្សាគ្នា និងពិគ្រោះយោបល់គ្នាស្វែងរកយន្តការចាំបាច់ដើម្បីប្រឆាំងភេវរកម្មក្នុងតំបន់។ កិច្ចប្រជុំនឹងត្រូវរៀបចំពីថ្ងៃ ២ដល់ថ្ងៃ ៨ខែសីហាខាងមុខ។

លោកស្រីបានបង្ហើបផងដែរថា ក្នុងកិច្ចប្រជុំខាងមុខអាចនឹងមានកិច្ចប្រជុំត្រីភាគី ឥណ្ឌូណេស៊ី ម៉ាឡេស៊ី និងហ្វីលីពីនពាក់ព័ន្ធការប្រឆាំងភេរវកម្មនេះផងដែរ។ កាលពីចុងខែមិថុនាកន្លងទៅ ប្រទេសអាស៊ានទាំងបីបានចាប់ផ្តើមកិច្ចសហប្រតិបត្តិការល្បាតសមុទ្ររួមគ្នា ដើម្បីប្រឆាំងចលនាឧក្រិដ្ឋឆ្លងដែន ជាពិសេសក្រុមសកម្មប្រយុទ្ធដែលជាបណ្តាញក្រុមដែស្ហ (Daesh) ឬក្រុមរដ្ឋឥស្លាមដែលរត់ឆ្លងពីក្រុងម៉ារ៉ាវី (Marawi) ស្ថិតនៅកោះមិនដាណាវភាគខាងត្បូងនៃប្រទេសហ្វីលីពីនផង។

លោកស្រី Marsudi បានបន្ថែមថា យន្តការត្រីភាគីនេះរួមបញ្ចូលទាំងការចែករម្លែករបាយការណ៍ចារកម្ម និងផ្តល់អនុសាសន៍ទៅវិញទៅមកដើម្បីបង្កើនប្រសិទ្ធភាពប្រឆាំងភេរវកម្ម។ ហើយយន្តការនេះអាចនឹងត្រូវពង្រីកទំហំនៃកិច្ចសហប្រតិបត្តិការដោយមានរួមបញ្ចូលប្រទេសថៃ និងសិង្ហបុរីផងដែរ។ ការជជែកគ្នាពាក់ព័ន្ធបញ្ហានេះនឹងត្រូវរៀបចំឡើនៅពេលប្រជុំខាងមុខ។

ការប្រឆាំងភេរវកម្មក្លាយជាប្រធានបទក្តៅ និងសំខាន់សម្រាប់អាស៊ាននាពេលបច្ចុប្បន្នព្រោះតំបន់ទាំងមូលកំពុងស្ថិតក្រោមការគំរាមកំហែងខ្លាំងពីសំណាក់ក្រុមភេរវជន។ ដូចឃើញស្រាប់ការបន្តប្រយុទ្ធគ្នារវាងក្រុមកងកម្លាំងរដ្ឋាភិបាល និងក្រុមភេរវជន Maute បណ្តាញក្រោយភេរវជនដែស្ហនៅក្រុង ម៉ារ៉ាវី បានឈានដល់រយៈពេលពីរខែហើយនោះ។ មនុស្សប្រហែល ៥៦៥នាក់បានស្លាប់បាត់បង់ជីវិត ក្នុងនោះមានក្រុមភេរវជន ៤២១ នាក់ ទាហាន ៩៩នាក់ និងប្រជាជន ៤៥នាក់ផងដែរ។

លោកស្រីប្រមុខការទូតឥណ្ឌូណេស៊ីខាងលើបានហៅការវាយប្រហារភេរវកម្មនៅក្រុងម៉ារ៉ាវី ថាជាស្នូរជួងដាស់សមាជិកអាស៊ានទាំងអស់ដើម្បីពង្រឹងកិច្ចសហប្រតិបត្តិការដោះស្រាយបញ្ហាសន្តិសុខនេះរួមគ្នា។ លោកស្រីបានបន្ថែមផងដែរថា ប្រទេសផ្សេងៗទៀតក៏មិនអាចបន្តនៅស្ងៀមមិនអើពើចំពោះការប្រឆាំងភេរវកម្មនេះដែរ៕