អន្តរជាតិ
អាមេរិក៖កំប្រុកមួយក្បាលធ្វើឲ្យមនុស្សជាង៤៥០០០នាក់គ្មានអគ្គិសនីប្រើប្រាស់១ម៉ោង
× មនុស្សប្រមាណ៤៥០០០នាក់ ដែលរស់នៅសហគមន៍ជាង១០ក្នុងក្រុង San Diego សហរដ្ឋអាមេរិក គ្មានអគ្គិសនីប្រើប្រាស់ជាង១ម៉ោង កាលពីថ្ងៃទី២៥ ខែកក្កដា ដោយសារតែកូនកំប្រុកមួយក្បាលខាំដាច់ខ្សែបណ្តាញមួយនៅតំបន់ North Park។ នេះបើតាមការផ្សាយរបស់សារព័ត៌មាន The San Diego Union-Tribune។
លោកស្រី Helen Gao អ្នកនាំពាក្យអាជ្ញាធរអគ្គិសនី San Diego Gas & Electric បានប្រកាសពីមូលហេតុនៃការដាច់ចរន្តអគ្គិសនីកាលពីវេលាម៉ោង១២ និង៣០នាទីថ្ងៃត្រង់ ដែលធ្វើឲ្យមនុស្សប្រមាណ៤៥០០០នាក់គ្មានអគ្គិសនីប្រើប្រាស់។ តាមការស្រាវជ្រាវ គេបានរកឃើញថា កូនកំប្រុកជាដើមហេតុដែលនាំឲ្យមានការកាត់ផ្តាច់ចរន្ត។
ទីតាំងដែលបានដាច់នោះ មានផ្ទះ សាលារៀន និងអាគារពាណិជ្ជកម្មនានា ដូចជា Balboa Park, Chollas Creek, City Heights, Hillcrest, Kearny Mesa, Kensington, Mission Hills, Normal Heights, North Park, Oak Park, Old Town, Talmadge, Tierrasanta និង University Heights ជាដើម។
យោងតាមរបាយការណ៍ស្តីពីការផ្គត់ផ្គង់ដែលផ្សាយដោយ Eaton Blackout Tracker កំប្រុកគឺជាសត្វដែលបង្កឲ្យមានការដាច់ចរន្តអគ្គិសនីច្រើនជាងគេនៅសហរដ្ឋអាមេរិក កាលពីឆ្នាំ២០១៦ ដោយមានរហូតដល់៧៣ករណី។ បក្សីស្ថិតនៅលំដាប់ទីពីរ ដែលបានបង្កឲ្យដាច់ភ្លើង៣៨ករណី ២៧ករណីមិនមានប្រភពច្បាស់លាស់ រីឯសត្វដែលជាដើមហេតុផ្សេងៗទៀតរួមមាន សត្វរ៉ាគូន (raccoon) ១០ករណី សត្វពស់ ៩ករណី សត្វឆ្មា សត្វ Rodent និង សត្វ Beaver ៕
© រក្សាសិទ្ធិដោយ thmeythmey.com