កីឡាជាតិ
ជាតិ
វត្តមានរបស់ ធារី ចន្ថាប៊ីន នឹងធ្វើឲ្យតំបន់កណ្តាលរបស់ក្លិបអគ្គីសនីកម្ពុជាកាន់តែរឺងមាំ
× បន្ទាប់ពីចូលលេងឲ្យក្លិបលីកលំដាប់ទី២របស់ថៃ Crabi FC បានពាក់កណ្តាលរដូវកាល ខ្សែបម្រើខ្មែរ-បារាំង ធារី ចន្ថាប៊ីន បានផ្ទេរមកលេងឲ្យក្លិបក្របខណ្ឌលីកកំពូលកម្ពុជាអគ្គិសនីកម្ពុជាក្រោមលក្ខខណ្ឌខ្ចីជើងត្រឹមបញ្ចប់រដូវកាល២០១៧។ លោក ប្រាក់ វុទ្ធី គ្រូបង្វឹកក្លិបអគ្គិសនីកម្ពុជាជឿជាក់ថា វត្តមានរបស់ ចន្ថាប៊ីន នឹងជួយឲ្យតំបន់កណ្តាលក្លិបនេះកាន់តែរឹងមាំថែមទៀត។
លោក ប្រាក់ វុទ្ធី គ្រូបង្គោលក្លិបអគ្គិសនីកម្ពុជាហាក់មានជំនឿយ៉ាងមុតមាំថា វត្តមានខ្សែបម្រើកូនកាត់ខ្មែរ-បារាំង ធារី ចន្ថាប៊ីន ក្នុងក្រុមអគ្គិសនីកម្ពុជា នឹងធ្វើឲ្យតំបន់ការពារក្រុមនេះកាន់តែមានភាពរឹងមាំជាងមុន។ លោកបន្តែមថា ចន្ថាប៊ីន ជាកីឡាករដែលមានកាយសប្បទានល្អ និងសមត្ថភាពខ្ពស់ ជាពិសេសតំបន់បម្រើ និងការពារ។
ក្នុងបទសម្ភាសជាមួយសារព័ត៌មានថ្មីៗលោក ប្រាក់ វុទ្ធី បានលើកពីសម្បត្តិរបស់ខ្សែបម្រើរូបនេះថា៖«ធារី ចន្ថាប៊ីន ជាកីឡាករមានកាយសប្បទានល្អ និងបច្ចេកទេសខ្ពស់ ហើយគាត់ជាកីឡាករមានគុណភាពខ្ពស់ដែលអាចធ្វើការបានល្អទាំងតំបន់កណ្តាល ការពារ និងប្រយុទ្ធ ដូន្នេះខ្ញុំរំពឹងថា គាត់នឹងជួយអគ្គិសនីកម្ពុជាបានច្រើននៅតំបន់កណ្តាល»។
តាមរយៈបទពិសោធហ្វឹកហាត់ និងលេងទាំងនៅក្នុងស្រុក និងក្រៅស្រុករបស់ ធារី ចន្ថាប៊ីន ធ្វើឲ្យគ្រូបង្គោលអគ្គិសនីកម្ពុជារំពឹងថា ក្រុមលោកនឹងមានទម្រង់លេង និងលទ្ធផលកាន់តែល្អ។
លោក ប្រាក់ វុទ្ធី បានបញ្ជាក់ថា សម្រាប់ការចូលរួមរបស់ ធារី ចន្ថាប៊ីន ក្នុងក្លិបអគ្គិសនីកម្ពុជាគឺក្រោមលក្ខខណ្ឌខ្ចីជើងត្រឹមបញ្ចប់រដូវកាលឆ្នាំ២០១៧ តែប៉ុណ្ណោះ ក្រោយពីនេះប្រហែល ចន្ថាប៊ីន អាចទៅរួមរស់ជាមួយក្លិប Krabi FC របស់ថៃវិញ។ លោកបានបន្តថា ការចូលរួមនេះដោយសារ ធារី ចន្ថាប៊ីន ចង់រក្សាការចូលរួមជាមួយក្រុមជម្រើសជាតិកម្ពុជា ក្រោយគេត្រូវបាន Krabi FC កាត់ឈ្មោះចេញពីជើងទី២។
ខ្សែបម្រើកូនកាត់ខ្មែរ-បារាំងវ័យ២៦ឆ្នាំរូបនេះ បានលេងឲ្យក្លិបភ្នំពេញអស់រយៈពេល៥ឆ្នាំពីឆ្នាំ២០១២ ដល់ឆ្នាំ២០១៦។ ក្រោយចាកចេញពីភ្នំពេញក្រោន នៅឆ្នាំ២០១៧ រូបគេបានផ្លាស់ទៅលេងជាមួយក្លិបក្របខណ្ឌលីកលំដាប់ទី២របស់ថៃ Krabi FC ហើយបច្ចុប្បន្នកំពុងលេងឲ្យក្លិបអគ្គិសនីកម្ពុជាក្រោមលក្ខខណ្ឌខ្ចីជើងពាក់កណ្តាល់រដូវកាល៕
Tag:
ធារី ចន្ថាប៊ីន
ប្រាក់ វុទ្ធី
អគ្គិសនីកម្ពុជា
© រក្សាសិទ្ធិដោយ thmeythmey.com