អន្តរជាតិ
មហាយក្សចិនគាំទ្រគម្រោងអភិវឌ្ឍន៍តំបន់ជម្លោះសមុទ្រចិនខាងត្បូងរួមជាមួយហ្វីលីពីន
× មហាយក្សចិនគាំទ្រគំនិតអភិវឌ្ឍរួមនិងទាញយកថាមពលជាមួយហ្វីលីពីននៅក្នុងជម្លោះសមុទ្រចិនខាងត្បូង។ ប៉ុន្តែមហាអំណាចនេះបានព្រមានជាមុនហើយថា រាល់សកម្មភាពឯកតោភាគីដែលពាក់ព័ន្ធការទាញយកប្រយោជន៍នៅតំបន់ជម្លោះអាចបង្កឲ្យមានបញ្ហា និងខូចខាតប្រយោជន៍រៀងខ្លួន។
ក្នុងដំណើរទស្សនកិច្ចពីរថ្ងៃទៅកាន់ហ្វីលីពីន សប្តាហ៍នេះ រដ្ឋមន្ត្រីការបរទេសចិនលោក វ៉ាង យី (Wang Yi) បានលើកឡើងថា លោកគាំទ្រគំនិតក្នុងការអភិវឌ្ឍតំបន់ជម្លោះសមុទ្រចិនខាងត្បូងរួមគ្នាជាមួយហ្វីលីពីន ដើម្បីឈានទៅរុករក និងទាញយកថាមពលក្នុងតំបន់ជម្លោះ។
យោងតាមទីភ្នាក់ងារព័ត៌មាន Reuters ការគាំទ្ររបស់ប្រមុខការទូតចិនគម្រោងអភិវឌ្ឍន៍តំបន់ជម្លោះរួមគ្នាជាមួយហ្វីលីពីននេះកើតឡើងបន្ទាប់ពីប្រធានាធិបតីហ្វីលីពីន រ៉ូឌ្រីហ្គោ ឌូទើតេ ប្រាប់អ្នកសារព័ត៌មានថា ហ្វីលីពីនរកឃើញដៃគូអភិវឌ្ឍ រុករក និងបូមយកប្រេងនៅតំបន់ជម្លោះសមុទ្រចិនខាងត្បូងហើយ។ ប៉ុន្តែប្រធានាធិបតីរូបនេះមិនបានបញ្ជាក់ឲ្យដឹងទេថា អ្នកណាជាដៃគូហ្វីលីពីននោះ។
កាលពីថ្ងៃ ១២ ខែកក្កដា ក្រសួងថាមពលហ្វីលីពីនប្រកាសថា ការខួងបូមយកប្រេងនៅតំបន់ Reed Bank ដែលត្រូវបានផ្អាកតាំងពីឆ្នាំ ២០១៤នោះ ប្រហែលជានឹងត្រូវចាប់ផ្តើមឡើងវិញនៅចុងឆ្នាំនេះ ហើយរដ្ឋាភិបាលក៏នឹងបើកឲ្យអ្នកវិនិយោគដេញថ្លៃគ្រប់គ្រងតំបន់ផ្សេងទៀតនៅខែធ្នូខាងមុខផង។
លោក វ៉ាង យី បានព្រមានផងដែរថា រាល់សកម្មភាពឯកតោភាគីនឹងបង្កើតបញ្ហាធំ និងធ្វើឲ្យខាតបង់ប្រយោជន៍ភាគីទាំងសងខាង។ លោកនិយាយដូច្នេះ៖ «នៅក្នុងដែនទឹកដែលមានជម្លោះ ប្រសិនបើភាគីណាមួយធ្វើសកម្មភាពឯកតោភាគីដើម្បីទាញយកប្រយោជន៍ ភាគីមួយទៀតនឹងធ្វើដូចគ្នា។ ហើយវាអាចបង្កើតរឿងស្មុគស្មាញក្នុងតំបន់ជម្លោះនោះ។ វាអាចបង្កើតឲ្យមានភាពតានតឹង ហើយចុងក្រោយគ្មានភាគីណាមួយអាចអភិវឌ្ឍនិងទាញយកប្រយោជន៍បានឡើយ»។
ថ្វីបើការចាប់ដៃគ្នាទាញយកប្រយោជន៍ពីតំបន់ជម្លោះជាអ្វីដែលចិននិងហ្វីលីពីនគាំទ្រក៏ដោយ គំនិតនេះជារឿងស្មុគស្មាញបំផុតមួយ ហើយវាជារឿងសើបផ្នែកនយោបាយមួយ។ ភាគីទាំងពីរទាមទារយកឧស្ម័ន និងប្រេងនៅក្នុងតំបន់ត្រួតស៊ីគ្នា ហើយកិច្ចព្រមព្រៀងចែករម្លែកផលប្រយោជន៍នេះបង្ហាញឲ្យឃើញរឿងពីរយ៉ាងផ្សេងគ្នា ពោលគឺ ការទទួលស្គាល់ភាពស្របច្បាប់នៃការទាមទារយកក្នុងតំបន់ជម្លោះ ឬជាការបោះបង់ចោលអធិបតេយ្យរបស់ខ្លួន។
ដោយឡែក ពាក់ព័ន្ធគម្រោងនេះ រដ្ឋមន្ត្រីការបរទេសហ្វីលីពីន Alan Peter Cayetano បានលើកឡើងថា សំណើអភិវឌ្ឍន៍ រុករកនិងទាញយករ៉ែនៅដែនទឹកដែលជាតំបន់ជម្លោះនោះចាប់ផ្តើមឡើងនៅឆ្នាំតាំងពីឆ្នាំ ១៩៨៦ ម្ល៉េះ ប៉ុន្តែចិននិងហ្វីលីពីនមិនអាចជំរុញឲ្យមានការអនុវត្តជាផ្លូវការឡើយ។
ក្នុងឆ្នាំ ២០១៤ ហ្វីលីពីនសម្រេចផ្អាកសកម្មភាបបូមប្រេងនិងឧស្ម័នរបស់ខ្លូន ដើម្បីរង់ចាំសាលក្រមដែលតុលាការមជ្ឈត្តការអចិន្ត្រៃយ៍អន្តជាតិសម្រេចពាក់ព័ន្ធសិទ្ធិរបស់ខ្លួនក្នុងជម្លោះសមុទ្រចិនខាងត្បូង។ តុលាការបានសម្រេចទាត់ចោលការទាមទាររបស់ចិនលើតំបន់ជម្លោះស្ទើរ ៩០ភាគរយ ប៉ុន្តែចិនទាត់ចោលសេចក្តីសម្រេចនោះ៕
Tag:
ចិន
វ៉ាង យី
ហ្វីលីពីន
សមុទ្រចិនខាងត្បូង
© រក្សាសិទ្ធិដោយ thmeythmey.com