ឈិនឡូនដែលនាំកម្ពុជាមេដាយមាសតែ១គត់នៅសិង្ហបុរី រំពឹងសម្រេចផលបន្ថែមទៀតនៅម៉ាឡេស៊ី

កីឡាជាតិ

ជាតិ

ឈិនឡូនដែលនាំកម្ពុជាមេដាយមាសតែ១គត់នៅសិង្ហបុរី រំពឹងសម្រេចផលបន្ថែមទៀតនៅម៉ាឡេស៊ី

28, Jul 2017 , 7:59 am

រូបភាព

លោក ទូច សុភៈ អគ្គលេខាធិការសហព័ន្ធកីឡាសីដក់ និងឈិនឡូនកម្ពុជាពេលផ្តល់បទសម្ភាសឲ្យសារព័ត៌មានថ្មីៗ

ដោយ:

ថ្នាក់ដឹកនាំសហព័ន្ធកីឡាសីដក់ និងឈិនឡូនកម្ពុជា នៅតែរំពឹងទទួលបានលទ្ធផលល្អពីកីឡាស៊ីហ្គេមលើកទី២៩នៅប្រទេសម៉ាឡេស៊ីនាខែសីហា ខាងមុខ ទោះបីមិនបានចូលរួមវិញ្ញាសាដែលខ្លួនធ្លាប់ឈ្នះមេដាយមាសនៅស៊ីហ្គេមនៅសិង្ហបុរីឆ្នាំ២០១៥។ ការរំពឹងបែបនេះ ក្រោយកីឡាករទាំង៨ដែលត្រូវចូលរួម បានចេញទៅហ្វឹកហាត់ពង្រឹងសមត្ថភាពនៅប្រទេសម្ចាស់ដើមមីយ៉ាន់ម៉ារយៈពេល២ខែ។ ម្យ៉ាងពួកគេទាំងនេះ ភាគច្រើនជាក្រុមកីឡាករដែលឈ្នះមេដាយមាសពីស៊ីហ្គេមនៅសិង្ហបុរី។

ការចេញទៅហ្វឹកហាត់ពង្រឹងសមត្ថភាពរយៈពេល២ខែនៅប្រទេសម្ចាស់ដើមមីយ៉ាន់ម៉ា របស់កីឡាករទាំង៨រូបបានធ្វើឲ្យ លោក ទូច សុភៈ អគ្គលេខាធិការសហព័ន្ធកីឡាសីដក់ និងឈិនឡូនកម្ពុជាមានក្តីរំពឹងថា វិញ្ញាសាឈិនឡូនដែលឈ្នះមេដាយមាសនៅសិង្ហបុរីនាឆ្នាំ២០១៥ នឹងទទួលបានលទ្ធផលល្អម្តងទៀតក្នុងព្រឹត្តិការណ៍កីឡាស៊ីហ្គេមនៅម៉ាឡេស៊ីក្នុងខែសីហា ខាងមុខ។ ម្យ៉ាងកីឡាករទាំង៨នាក់នេះ សុទ្ធតែកីឡាករជើងចាស់ដែលឈ្នះមេដាយមាសនៅសិង្ហបុរី លើកលែកតែម្នាក់ប៉ុណ្ណោះ។

កីឡាករ អ៊ឹង ណារិទ្ធិ, រៀម សុខភីរម្យ, ជាតិ ខេមរិន្ទ, ឈន សុខុម, ណាង សុភាព, ហេង រ៉ាវុត, ទ្រឹង លី និងកីឡាករ សុភៈ ចននី រួមជាមួយគ្រូបង្វឹក ជាតិ ខេមរា និងគ្រូជំនួយ ឈួន ប៉ុណ្ណារ៉ា បានចេញទៅហ្វឹកហាត់ត្រៀមនៅមីយ៉ាន់ម៉ាតាំងពីថ្ងៃទី១០ មិថុនា ហើយគ្រោងមកកម្ពុជានៅថ្ងៃទី១០ ខែសីហា។ សម្រាប់ការចេញទៅហ្វឹកហាត់នៅក្រៅប្រទេសនេះ គឺភាគីមីយ៉ាន់ម៉ាបានផ្តល់ទាំងការស្នាក់នៅ និងម្ហូបអាហារ ពោលគឺក្រសួងអប់រំ យុវជន និងកីឡាចេញតែថ្លៃសំបុត្រយន្តហោះទៅមកតែប៉ុណ្ណោះ។

ក្នុងចំណោមកីឡាករទាំង៨នាក់ គឺមានតែកីឡាករ ឈន សុខុម ម្នាក់គត់ជាចំណូលថ្មី ដោយជំនួសកន្លែងកីឡាករ ជិន សុវណ្ណរិទ្ធ ដែលជាប់ភារកិច្ចរៀននៅក្រៅប្រទេស។ ចំណែកកីឡាករទាំង៧នាក់សុទ្ធតែជាកីឡាករដែលបានឈ្នះមេដាយមាសពីស៊ីហ្គេមនៅសិង្ហបុរីឆ្នាំ២០១៥។ បើយោងតាម លោក ទូច សុភៈ សម្រាប់វិញ្ញាសាឈិនឡូននៅឆ្នាំនេះ មានប្រទេសចូលរួមចំនួន៨ ពោលគឺលើកលែង ឥណ្ឌូនេស៊ី វៀតណាម និងទីម័រខាងកើត ខណៈឆ្នាំមុនមានប្រទេសចូលរួមចំនួន៦ គឺកម្ពុជា មីយ៉ាន់ម៉ា ថៃ ឡាវ ម៉ាឡេស៊ី និងហ្វីលីពីន។

លោកបានបញ្ជាក់ថា៖«សម្រាប់វិញ្ញាសាទី៣ដែលកម្ពុជាយើងទទួលបានមេដាយមេមាសនៅសិង្ហបុរី គឺភាគីម្ចាស់ផ្ទះម៉ាឡេស៊ីមិនអនុញ្ញាតឲ្យយើងចូលរួមនោះទេ។ ម្យ៉ាង ដោយសារយើងចង់ទុកឱកាសម្ចាស់ផ្ទះ និងហ្វលីនដែលជាម្ចាស់ផ្ទះនៅឆ្នាំ២០១៩។ អាស្រ័យហេតុនេះ ទើបយើងសម្រចចិត្តទៅហ្វឹកហាត់វិញ្ញាសាទី១ និងទី៤ដែលជាវិញ្ញាសាលំបាកវិញ»។

កត្តានេះបានធ្វើឲ្យ លោក ទូច សុភៈ មិនហ៊ានអះអាងទទួលបានមេដាយមាសឬយ៉ាងណានោះឡើយសម្រាប់ការចូលរួមលើកនេះ។ តែយ៉ាងណា លោក ប្តេជ្ញាថា នឹងខិតខំប្រឹងប្រែងឲ្យអស់ពីសមត្ថភាពដើម្បីឲ្យបានលទ្ធផលល្អដូចស៊ីហ្គេមនៅសិង្ហបុរី។

សម្រាប់ការប្រកួតកីឡាស៊ីហ្គេមលើកទី២៩ នៅប្រទេសម៉ាឡេស៊ីដែលចាប់ផ្តើមពីថ្ងៃទី១៩ ដល់ថ្ងៃទី៣១ សីហា ឈិនឡូននឹងបញ្ជូនកីឡាករ៨រូប គ្រូបង្វឹក១រូប និងគ្រូជំនួយ១រូប ដែលដឹកនាំដោយ លោក ទូច សុភៈ អគ្គលេខាធិការសហព័ន្ធ។ កីឡាករទាំងនេះប្រកួតលើវិញ្ញាសាទី១ និង៤ចុងក្រោយ៕