អន្តរជាតិ
ម៉ាឡេស៊ីបញ្ជូនជំនួយបន្ថែមទៅក្រុងម៉ារ៉ាវី ដើម្បីទប់ស្កាត់ប្រជាជនចុះចូលជាមួយក្រុមភេរវជន IS រូបភាព៖ Philippines Star
× ខណៈដែលការប្រយុទ្ធគ្នានៅក្រុងម៉ារ៉ាវី (Marawi) ប្រទេសហ្វីលីពីនបានឈានចូលដល់ខែទីបី ម៉ាឡេស៊ីព្រួយបារម្ភថាប្រជាជនភៀសខ្លួននឹងនាំគ្នាចុះចូលជាមួយក្រុមសកម្មប្រយុទ្ធរដ្ឋឥស្លាម។ ដូច្នេះហើយ ម៉ាឡេស៊ីសម្រេចបញ្ជូនជំនួយបន្ថែមជំហានទីពីរទៅហ្វីលីពីន និងជំរុញឲ្យហ្វីលីពីនពង្រឹងកិច្ចសហប្រតិបត្តិការចែកចាយបទពិសោធន៍ និងកិច្ចសហការផ្លាស់ប្ដូរព័ត៌មានចារកម្ម។
ម៉ាឡេស៊ីបានប្រកាសថា ខ្លួនសម្រេចផ្ដល់ជំនួយបន្ថែមដល់ប្រជាជនភៀសខ្លួនក្នុងតំបន់ម៉ារ៉ាវីដែលត្រូវការជំនួយចាំបាច់ ស្របពេលដែលការប្រយុទ្ធគ្នារវាងក្រុមភេរវជននិងទាហានរដ្ឋាភិបាលឈានដល់ចូលដល់ខែទៅបីហើយ។
រដ្ឋមន្ត្រីក្រសួងការពារជាតិម៉ាឡេស៊ី Hishammuddin Hussein បានលើកឡើងកាលពីថ្ងៃអង្គារទី២៥ខែកក្កដា ប្រជាជននៅតំបន់ម៉ារ៉ាវីត្រូវការជំនួយផ្នែកសុខាភិបាល និងទឹកស្អាត។ ដូច្នេះហើយ ជំនួយបន្ថែមជំហានទីពីរនឹងមានឧបករណ៍ចម្រោះទឹកស្អាត និង ក្រុមយោធាស្ម័គ្រចិត្តទទួលបន្ទុកកិច្ចការសាសនាម៉ាឡេស៊ី ហៅកាត់ថា Kagat។
លោកបានបន្ថែមដូច្នេះថា៖«ពួកយើងចាំបាច់យកចិត្តទុកដាក់ចំពោះជនភៀសខ្លួនដែលជួបការលំបាកនៅម៉ារ៉ាវី។ពួកយើងត្រូវដឹងពីតម្រូវការចាំបាច់របស់ពួកគេដោយដំបូងពួកយើងចាប់ផ្ដើមពីការជួយជាទឹកស្អាត និងផ្នែកសុខាភិបាលជាមុនសិន។ បើពុំដូច្នេះទេ អ្នកភៀសខ្លួនទាំងនេះចូលរួមជាមួយក្រុមភេរវជនដែស្ហ(Daesh) ឬក្រុមរដ្ឋឥស្លាម ព្រោះក្រុមភេរវជនសន្យាផ្ដល់គ្រួសារដ៏កក់ក្ដៅដល់ជនភៀសខ្លួនទាំងនេះ និងបោកប្រាស់ថាការចូលរួមជាមួយខ្លួនជាផ្លូវទៅកាន់ឋានសួគ៌។
រដ្ឋមន្ត្រីរូបនេះបន្ថែមទៀត ក្រុមសកម្មយុទ្ធដែលរត់ចេញពីតំបន់មជ្ឈិមបូព៌ាមិនត្រូវអនុញ្ញាតិឲ្យបង្កើតមូលដ្ឋានរបស់ពួកគេក្នុងតំបន់ជាដាច់ខាត។ នេះក៏ដោយសារ បណ្ដាញក្រុមភេរវជនដែស្ហ នេះមានគោលបំណងបង្កើតរដ្ឋដែលដឹកនាំតាមសាសនាឥស្លាមស្ថិតនៅប្រទេសក្នុងតំបន់រួមមាន ឥណ្ឌូណេស៊ី ម៉ាឡេស៊ី ហ្វីលីពីន សិង្ហបុរីនិងពង្រីកបន្តទៅជប៉ុនផង។
ក្រុមភេរវករដែស្ហនឹងបន្តចូលមក ប្រសិនជាពួកអាចបង្កើតសាខានៅប្រទេសណាមួយក្នុងតំបន់ ហើយស្ថានការណ៍នេះកើតឡើងដូចនៅស៊ីរី អ៊ីរ៉ាក់និងប្រទេសលោកខាងលិចមួយចំនួនដូច្នេះដែរ។
ដោយ លោករដ្ឋមន្ត្រីការពារជាតិម៉ាឡេស៊ីរូបនេះក៏បានជំរុញឲ្យហ្វីលីពីនរៀបចំកិច្ចប្រជុំពិសេសនៅទីក្រុងម៉ានីលដោយមានការចូលរួមពីសំណាក់រដ្ឋមន្ត្រីការពារជាតិរបស់ប្រទេសអាស៊ានទាំងអស់។ ហើយហ្វីលីពីនក៏អាចយកវេទិកានោះចែករម្លែកបទពិសោធន៍ និងផ្លាស់ប្ដូរព័ត៌មានចារកម្មផងដែរ។
សូមជម្រាបដែរថា ដើម្បីពង្រឹងសុវត្ថិភាពនិងសន្តិសុខក្នុងតំបន់សមុទ្រSulu ក៏ដូចជាទប់ស្កាត់ការគំរាមកំហែងនៃការរីករាលដាលរបស់ក្រុមសកម្មប្រយុទ្ធជ្រុលនិយមឥស្លាមឬក្រុមភេរវករដែស្ហ(Daesh) ម៉ាឡេស៊ី ហ្វីលីពីន ឥណ្ឌូណេស៊ីកាលពីថ្មីៗនេះបានចាប់ផ្តើមល្បាតសមុទ្ររួមគ្នា ហើយកិច្ចសហប្រតិបត្តិការនេះនឹងរួមបញ្ចូលសមាជិកបន្ថែមដូចជាប្រុយណេនិងសិង្ហបុរីផងដែរ៕
Tag:
Marawi
Hishammuddin Hussein
ដែស្ហ
ហ្វីលីពីន
ម៉ាឡេស៊ី
© រក្សាសិទ្ធិដោយ thmeythmey.com