អន្តរជាតិ
ឥណ្ឌាបារម្ភថា ទូរស័ព្ទចិនអាចលួចទិន្នន័យព័ត៌មានឯកជនរបស់ប្រជាជនខ្លួន
× ម៉ូឌែលទូរស័ព្ទចិនកន្លងមកបានវាយលុកទីផ្សារឥណ្ឌាជាងពាក់កណ្ដាលរួចទៅហើយ។ ដោយសារបញ្ហានេះហើយ ឥណ្ឌាចាត់វិធានការមួយចំនួន ព្រោះខ្លួនបារម្ភថា ចិនអាចលួចទិន្នន័យផ្ទាល់ខ្លួនរបស់អ្នកប្រើប្រាស់ ព្រោះប្រព័ន្ធផ្ទុកទិន្នន័យទូរស័ព្ទចិនស្ថិតនៅក្រៅប្រទេស។
រដ្ឋាភិបាលឥណ្ឌាបានណែនាំរោងចក្រផលិតទូរស័ព្ទចល័តចំនួន ២១ នៅឥណ្ឌារួមមានក្រុមហ៊ុនទូរស័ព្ទចល័តចិន និងប្រទេសផ្សេងៗទៀតពាក់ព័ន្ធសុវត្ថិភាពព័ត៌មានឯកជននៃអ្នកប្រើប្រាស់ទូរស័ព្ទ។ ការណែនាំនេះធ្វើឡើង ដោយសារឥណ្ឌាព្រួយបារម្ភថា ទូរស័ព្ទចិនរួមមាន Oppo, Vivo និង Xiaomi អាចលួចទិន្នន័យផ្ទាល់ខ្លួនរបស់អ្នកប្រើប្រាស់ទូរស័ព្ទ។
នៅថ្ងៃទី១៤ខែសីហា រដ្ឋមន្ត្រីទូរគមនាគមន៍ឥណ្ឌាលោក Manoj Sinha បានជួបប្រជុំជាមួយអ្នកជំនាញជាច្រើនរូបទៀតដើម្បីត្រួតពិនិត្យឡើងវិញនូវការនាំចូលគ្រឿងបន្លាស់អេឡិចត្រូនិច និងការលេចធ្លាយព័ត៌មានឯកជនជាដើម។ បន្ទាប់មក ក្រសួងព័ត៌មាន និងបច្ចេកវិទ្យាឥណ្ឌាបានណែនាំ រួមទាំងសាកសួរក្រុមហ៊ុនទូរស័ព្ទចល័ត ទាក់ទិននីតិវិធី និងដំណើរដែលពួកគេប្រើប្រាស់ដើម្បីធានារក្សាទុកទិន្នន័យផ្ទាល់ខ្លួនម្ចាស់ទូរស័ព្ទដោយសុវត្ថិភាព។
យោងតាមសារព័ត៌មានរុស្ស៊ី Sputnik មន្ត្រីរដ្ឋាភិបាលឥណ្ឌាដែលមិនបានបង្ហាញអត្តសញ្ញាណបានបញ្ជាក់ដូច្នេះថា៖«ក្រុមហ៊ុនទូរស័ព្ទចល័តទាំងនេះមានពេលយ៉ាងយូរត្រឹមថ្ងៃទី២៦ខែសីហា ដោយពួកគេត្រូវប្រាប់ពីនីតិវិធីនិងដំណើការនានាផ្នែកសន្តិសុខដែលអាចធានាបានថា ការរក្សាទុកទិន្នន័យផ្ទាល់ខ្លួនរបស់ម្ចាស់ទូរស័ព្ទមានសុវត្ថិភាព។ ប្រសិនជាក្រុមហ៊ុនទាំងនេះមិនព្រមធ្វើតាមទេនោះ ពួកគេនឹងត្រូវផ្ដន្ទាទោសតាមមាត្រា ៤៣ នៃច្បាប់ស្តីពីព័ត៌មានវិទ្យា»។
សូមជម្រាបផងដែរថា មាត្រា៤៣ នៃច្បាប់ព័ត៌មានវិទ្យាចែងថា ក្រុមហ៊ុនទូរស័ព្ទត្រូវតែទទួលខុសត្រូវនិងធានារក្សាឲ្យបាននូវការរក្សាទុកទិន្នន័យផ្ទាល់ខ្លួនរបស់អ្នកប្រើប្រាស់ជាសម្ងាត់។ បើមិនដូច្នេះទេ ក្រុមហ៊ុននឹងត្រូវផាកពិន័យ៧៥ម៉ឺនដុល្លារ និងត្រូវបង់ប្រាក់សំណងទៅជនរងគ្រោះតាមចំនួននៃការកំណត់របស់រដ្ឋផង៕
Tag:
ឥណ្ឌា
ចិន
Manoj Sinha
© រក្សាសិទ្ធិដោយ thmeythmey.com