​នា​ការប្រកួត​វគ្គ​ជម្រុះ កាលពី​ថ្ងៃ​ចន្ទ ទី​២១ ខែសីហា សុខ ចាន់​មាន បានទទួល​ចំណាត់ថ្នាក់​លេខ​១​នៅក្នុង​ពូ​ល​របស់ខ្លួន ក្រោយ​យកឈ្នះ​កីឡាករ​សិង្ហ​បុរី Cheng Zhi Ming ១៣-៤ ឈ្នះ កីឡាករ​ថៃ Kiatkong Tanong ១៣-៤ និង​ឈ្នះ​កីឡាករ​ហ្វីលីពីន Aristides Samia ១៣-០ ។​

 

​នៅ​វគ្គ​ពាក់កណ្តាល​ផ្តាច់ព្រ័ត្រ សុខ ចាន់​មាន ប្រឹង​តាម​វាយបក​ពីក្រោយ​កីឡាករ​ម៉ាឡេស៊ី Muhamad Hafizuddin Bin Mat Daud​។ ប៉ុន្តែ​ទីបំផុត​កីឡាករ​ម្ចាស់ផ្ទះ​បាន​យកឈ្នះ​ក្នុង​លទ្ធផល ១៣-១០ ។​

 

​សម្រាប់​ការប្រកួត​ជម្រុះ​វិញ្ញាសា​ឯកត្តជន​នារី​វិញ អ៊ុន ស្រី​យ៉ា បាន​យកឈ្នះ​កីឡាការិនី​ឡាវ Xayaseng Khamlek ១៣-៩ ឈ្នះ​កីឡាការិនី​មី​យ៉ាន់​ម៉ា Kyaw Yin ១៣-៩ និង​កីឡាការិនី​ម៉ាឡេស៊ី Suhartatisera Binti Zamri ១៣-៩ ដូចគ្នា​។​

 

​នៅ​វគ្គ​ពាក់កណ្តាល​ផ្តាច់ព្រ័ត្រ អ៊ុន ស្រី​យ៉ា បាន​ចាញ់​កីឡាការិនី​វៀតណាម Nguyen Thi Thi ៥ ទល់នឹង​១៣ ។​

​បរាជ័យ​នៅ​វគ្គ​ពាក់កណ្តាល​ផ្តាច់ព្រ័ត្រ​នាំ​ឲ្យ សុខ ចាន់​មាន និង អ៊ុន ស្រី​យ៉ា ទទួលបាន​មេដាយ​សំរឹទ្ធ​ពី​ព្រឹត្តិការណ៍​កីឡា​ស៊ី​ហ្គេម​លើក​ទី​២៩៕

 

​