ទូរទស្សន៍ថៃផ្សព្វផ្សាយពីកម្មវិធីអប់រំគំរូនៅសាលាវត្តបូព៌ ខេត្តសៀមរាប

បទយកការណ៍ / បទសម្ភាសន៍

ទូរទស្សន៍ថៃផ្សព្វផ្សាយពីកម្មវិធីអប់រំគំរូនៅសាលាវត្តបូព៌ ខេត្តសៀមរាប

14, Sep 2017 , 8:39 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ថ្មីៗនេះ ទូរទស្សន៍ DNC របស់ថៃ បានមកផលិតវីដេអូខ្លីមួយ អំពីសកម្មភាពនានា នៃសាលាបឋមសិក្សា វត្តបូព៌។ ទូរទស្សន៍នេះបានដាក់ចំណងកម្មវិធីវីដេអូនោះថា UG5 Cambodia ដែលមានរយៈពេលជាង២នាទី។ តាមនាយកសាលារៀនវត្តបូព៌ UG5 អាចមានអត្ថន័យដូចគ្នាទៅនឹងកម្មវិធី «មនុស្សសាកល» ដែលកំពុងអនុវត្តក្នុងសាលានេះ។

កម្មវិធី «មនុស្សសាកល» របស់សាលារៀនវត្តបូព៌ គឺទី១ ធ្វើឲ្យសិស្សានុសិស្សស្អាត ទី២ មានរបៀប ទី៣ ឥរិយាបថសុភាពរាបសា ទី៤ គោរពពេលវេលាទៀងទាត់ និងទី៥ ការតាំងសមាធិ។ ការធ្វើដូច្នេះគឺដើម្បីវឹកហាត់សិស្សទាំងអស់ ឲ្យក្លាយជាមនុស្សម្នាក់ ដែលមានវិន័យ និងសីលធម៌ខ្ពស់ ទោះទៅដល់ទីណា អាចចូលចំណោមគេ ហើយធ្វើឲ្យគេចំណាំថា ជាប្រជាជនកម្ពុជា។ នេះជាការបញ្ជាក់របស់លោក នាយក ពឹង គិមឆេន។

ការអប់រំតែមួយមុខ ហើយខ្វះឥរិយាបថ វាមិនមែនជាការល្អនោះទេ។ តាមលោក ពឹង គិមឆេន ដើម្បីឲ្យក្លាយជាមនុស្សមួយរូបដែលប្រសើរទៅបាន គឺត្រូវមានធាតុផ្សំចំនួន៣ ទី១ គុណភាពការអប់រំឲ្យកាន់តែខ្ពស់ ទី២ ធ្វើឲ្យអ្នកទទួលការអប់រំមានសុខភាពល្អ និងទី៣ ធ្វើឲ្យមានឥរិយាបថល្អ។

សាលារៀនវត្តបូព៌ គឺជាសាលារៀនគំរូមួយនៅក្នុងប្រទេសកម្ពុជា ដែលមានវិន័យ និងការអប់រំ ល្អប្រសើរ។ សាលារៀននេះតែងទទួលគណៈប្រតិភូជាតិ និងអន្តរជាតិ ដើម្បីស្វែងយល់ពីការ អប់រំ និងដឹកនាំក្នុងសាលារៀនមួយនេះ។ សាលានេះក៏ធ្លាប់ទទួលគណៈប្រតិភូប្រទេសថៃ ជាពិសេសបណ្តាសាលាដែលនៅតាមខេត្តជាប់ប្រទេសកម្ពុជាជាញឹកញាប់ផងដែរ៕

ដើម្បីជ្រាបច្បាស់ពីបញ្ហានេះ សូមស្តាប់បទសម្ភាសរវាងអ្នកសារព័ត៌មានថ្មីៗ និងលោក ពឹង គិមឆេន នាយកសាលាបឋមសិក្សា វត្តបូព៌ ដូចតទៅ