ជាតិ
សេដ្ឋកិច្ច
រដ្ឋាភិបាលឈប់កំណត់តម្លៃលក់រាយសម្រាប់សាំងស៊ុបពែរ!
× ភ្នំពេញ៖ ប្រកាសអន្តរក្រសួងថ្មី ដែលចេញផ្សាយនៅថ្ងៃទី២២ខែកញ្ញា បានបញ្ជាក់ថា រដ្ឋាភិបាលនៅតែបន្តកំណត់តម្លៃអតិបរមាលក់រាយប្រេងឥន្ធនៈសម្រាប់ប្រេងសាំងធម្មតា និងប្រេងម៉ាស៊ូត ប៉ុន្តែសម្រេចដកសាំងស៊ុបពែរពីការកំណត់ទាំងនេះ។
រដ្ឋាភិបាល ចាប់តាំងពីខែមីនាឆ្នាំ២០១៦មក បានអន្តរាគមន៍លើតម្លៃលក់រាយប្រេងទាំងបីប្រភេទ ដែលរួមមានប្រេងសាំងស៊ុបពែរ ប្រេងសាំងធម្មតា និងប្រេងម៉ាស៊ូត ដោយមិនអនុញ្ញាតឲ្យលក់ប្រេងឥន្ធនៈលើសតម្លៃដែលកំណត់តាមរូបមន្តប្រកាសអន្តរក្រសួងរបស់ក្រសួងសេដ្ឋកិច្ចនិងហិរញ្ញវត្ថុ ក្រសួងរ៉ែនិងថាមពល និងក្រសួងពាណិជ្ជកម្មឡើយ។
យោងតាមប្រកាសអន្តរក្រសួងថ្មី ដែលចុះហត្ថលេខានៅថ្ងៃទី១៥ខែកញ្ញា សាំងស៊ុបពែរត្រូវបានដកចេញពីការកំណត់តម្លៃលក់រាយសម្រាប់ទីផ្សារកម្ពុជា។ ប្រកាសថ្មីនេះមិនបានបញ្ជាក់ពីមូលហេតុការដែលរដ្ឋាភិបាលលែងបន្តកំណត់តម្លៃលើប្រេងសាំងស៊ុបពែរនោះឡើយ។
បើតាមអ្នកនាំពាក្យក្រសួងពាណិជ្ជកម្ម កញ្ញា សឹង សុផារី ការឈប់កំណត់តម្លៃសាំងស៊ុបពែរនៅពេលនេះ ព្រោះរដ្ឋាភិបាលចង់បន្ថយការអន្តរាគមន៍របស់ខ្លួន។ កញ្ញាលើកឡើងយ៉ាងដូច្នេះថា៖«ព្រោះយើងមិនចង់អន្តរាគមន៍ច្រើនពេក។ ទីផ្សារសេរី កាលណារដ្ឋកាន់តែអន្តរាគមន៍ គឺកាន់តែខុស ហើយរដ្ឋជាអ្នករែកបន្ទុក»។
អ្នកនាំពាក្យក្រសួងពាណិជ្ជកម្មរូបនេះបន្តទៀតថា ទោះយ៉ាងណារដ្ឋាភិបាលនៅតែបន្តគ្រប់គ្រងលើតម្លៃប្រេងសាំងធម្មតា ដែលពលរដ្ឋទូទៅប្រើប្រាស់។ កញ្ញាបន្ថែមថា តាមរយៈប្រកាសថ្មីនេះ រដ្ឋាភិបាលបានបន្ថយថ្លៃ Premium (ជាតម្លៃមួយប្រភេទដែលដាក់បញ្ចូលក្នុងរូបមន្តកំណត់ថ្លៃប្រេង) ចំនួនមួយសេន។
ការចេញផ្សាយតម្លៃលក់រាយសម្រាប់ប្រេងសាំងធម្មតា និងប្រេងម៉ាស៊ូត នឹងត្រូវអនុវត្តជាធម្មតា រៀងរាល១០ថ្ងៃមួយដងក្នុងខែនីមួយៗ៕
© រក្សាសិទ្ធិដោយ thmeythmey.com