ជាតិ
អុំទូក៖ ក្រសួងការងារ ប្រាប់ឲ្យម្ចាស់សហគ្រាស អនុញ្ញាតឲ្យបុគ្គលិកឈប់សម្រាក ដោយគិតប្រាក់ឈ្នួលធម្មតា
× ភ្នំពេញ៖ ក្រសួងការងារ និងបណ្ដុះបណ្ដាលវិជ្ជាជីវៈ បានចេញសេចក្ដីជូនដំណឹងដល់នាយក ម្ចាស់សហគ្រាស និងគ្រឹះស្ថានទាំងអស់ ស្ដីពីការឈប់សម្រាកដែលមានប្រាក់ឈ្នួល ដល់កម្មករនិយោជិត ក្នុងព្រះរាជពិធីបុណ្យអុំទូកខាងមុខនេះ។ ក្នុងព្រះរាជពិធីបុណ្យអុំទូកខាងមុខនេះ កម្មករនិយោជិត នឹងបានឈប់សម្រាករយៈពេល៣ថ្ងៃ ចាប់ពីថ្ងៃទី ០២-០៤ វិច្ឆិកា។ នេះបើតាមសេចក្ដីជូនដំណឹងរបស់ក្រសួងការងារ និងបណ្ដុះបណ្ដាលវិជ្ជាជីវៈ។
ក្រសួងការងារ និងបណ្ដុះបណ្ដាលវិជ្ជាជីវៈ បានជម្រាបជូនដំណឹងដល់នាយក ម្ចាស់សហគ្រាស និងគ្រឹះស្ថានទាំងអស់ អំពីការឈប់សម្រាកដែលមានប្រាក់ឈ្នួលក្នុងឱកាសព្រះរាជពិធីបុណ្យអុំទូក ដល់កម្មករនិយោជិតទាំងអស់។ បើតាមសេចក្ដីជូនដំណឹង ដែលចុះហត្ថលេខាដោយរដ្ឋមន្ត្រីក្រសួងការងារ កាលពីថ្ងៃទី ១៩ តុលា នៅថ្ងៃបុណ្យអុំទូកខាងមុខនេះ កម្មករនិយោជិតទាំងអស់ នឹងត្រូវឈប់សម្រាករយៈពេល ៣ថ្ងៃ គឺចាប់ពីថ្ងៃទី ០២-០៤ ខែវិច្ឆិកា ហើយការឈប់សម្រាកនេះ ដោយមានប្រាក់ឈ្នួល។
ក្រសួងការងារ បានបញ្ជាក់ថា ក្នុងករណីចាំបាច់បំផុត ដែលសហគ្រាស គ្រឹះស្ថាន មិនអាចបញ្ឈប់សកម្ភាពរបស់ខ្លួនបានក្នុងឱកាសបុណ្យអុំទូកខាងមុខនេះ ម្ចាស់នាយកសហគ្រាស គ្រឹះសា្ថន ត្រូវសម្របសម្រួលជានមួយកម្មករនិយោជិតឲ្យមានការស្ម័គ្រចិត្តព្រមទាំងបែងចែកពេលវេលា និងថ្ងៃឈប់សម្រាកបុណ្យបានសមស្រប។
ក្នុងសេចក្ដីជូនដំណឹងខាងលើ ក្រសួងការងារ លើកឡើងថា៖ «កម្មករនិយោជិតដែលធ្វើការថ្ងៃឈប់នៅថ្ងៃបុណ្យនេះ មានសិទ្ធិទទួលនូវប្រាក់បំណាច់បន្ថែមដែលមានចំនួនស្មើនឹងប្រាក់ឈ្នួលថ្ងៃធ្វើការធម្មតា»។ នេះបើតាមសេចក្ដីជូនដំណឹងដដែល៕
© រក្សាសិទ្ធិដោយ thmeythmey.com