អន្តរជាតិ
អូស្ត្រាលី អាស៊ានពង្រឹងកិច្ចសហប្រតិបត្តិការប្រឆាំងលំហូរហិរញ្ញវត្ថុរបស់ក្រុមភេរវជនតំបន់
× អូស្ត្រាលីនិងបណ្តាប្រទេសអាស៊ានពង្រឹងកិច្ចសហប្រតិបត្តិការដើម្បីកាត់ផ្តាច់ចរន្តហិរញ្ញវត្ថុរបស់បណ្តាញក្រុមសកម្មប្រយុទ្ធនៅក្នុងតំបន់ ស្របពេលដែលការបារម្ភថាក្រុមភេរវជនរដ្ឋឥស្លាមឬដែស្ហអាចពង្រឹងកម្លាំងរបស់ខ្លួននៅក្នុងតំបន់។ កិច្ចសហការថ្មីនេះផ្តោតសំខាន់លើការចែករម្លែករបាយការណ៍ចារកម្មលំហូរហិរញ្ញ។
បញ្ហាសន្តិសុខជាពិសេសចលនាជ្រុលនិយម និងភេរវកម្មក្លាយជាបញ្ហាប្រឈមធំបំផុតសម្រាប់តំបន់អាស៊ីអាគ្នេយ៍ និងអូស្ត្រាលីផងដែរ។ ដើម្បីដោះស្រាយបញ្ហានេះ អូស្ត្រាលី និងអាស៊ានសម្រេចបង្កើតកិច្ចសហប្រតិបត្តិការថ្មីដើម្បីជំរុញការកាត់ផ្តាច់ហិរញ្ញវត្ថុរបស់បណ្តាក្រុមភេរវជនក្នុងតំបន់ផងដែរ។
យោងតាមទីភ្នាក់ងារព័ត៌មាន AFP គំនិតផ្តួចផ្តើមនេះត្រូវបានដាក់ចេញនៅក្នុងវេទិកាសន្តិសុខដែលរៀបចំឡើងនៅក្រុងគូឡាឡាំពួរប្រទេសម៉ាឡេស៊ី។ រដ្ឋមន្ត្រីយុត្តិធិម៌អូស្ត្រាលីMichael Keenan មានវត្តមាននៅក្នុងកិច្ចប្រជុំនេះផងដែរ។
គំនិតផ្តួចផ្តើមថ្មីដែលត្រូវបានគាំទ្រដោយបណ្តាតំណាងប្រទេសអាស៊ាន និងអូស្ត្រាលីផងនោះមានឈ្មោះថា ក្រុមការងារអាស៊ីអាគ្នេយ៍ដើម្បីប្រឆាំងហិរញ្ញវត្ថុរបស់ក្រុមភេរវជន។ វាជាគំនិតផួចផ្តើមថ្មីមួយដែលជំរុញ និងលើកកម្ពស់កិច្ចសហប្រតិបត្តិការថ្នាក់តំបន់ដើម្បីបោសសម្អាតចលនាជ្រុលនិយមនិងភេរវជនផងដែរ។
រដ្ឋមន្ត្រីដែលផ្តល់ប្រឹក្សាដល់នាយករដ្ឋមន្ត្រីអូស្ត្រាលី Malcolm Turnbull ពាក់ព័ន្ធការប្រឆាំងភេរវកម្មនេះបានប្រាប់អ្នកសារព័ត៌មានថា កិច្ចសហប្រតិបត្តិការរវាងអូស្ត្រាលី និងអាស៊ាននេះមានគោលដៅសំខាន់កាត់ផ្តាច់ហិរញ្ញវត្ថុរបស់ក្រុមភេរវជន ហើយចំណាត់ការសំខាន់របស់គេគឺចែករម្លែករបាយការណ៍ចារកម្មលំហូរហិរញ្ញវត្ថុ។
«ស្ថិរភាព និងសន្តិសុខតំបន់អាស៊ីអាគ្នេយ៍ជារឿងសំខាន់បំផុតសម្រាប់ប្រទេសអូស្ត្រាលី។ រដ្ឋាភិបាលអូស្ត្រាលីប្តេជ្ញាចិត្តក្នុងការឈានទៅយកជ័យជម្នះលើរាល់ការគំរាមកំហែងដែលបង្កដោយក្រុមភេរវជនរាប់ទាំងក្រុមដែស្ហផង»។ នេះជាការលើកឡើងរបស់រដ្ឋមន្ត្រីអូស្ត្រាលីខាងលើ។
បញ្ហាភេរវកម្មគ្របដណ្តប់កិច្ចប្រជុំអាស៊ាននៅហ្វីលីពីនកន្លងមក ដោយសារអាស៊ីអាគ្នេយ៍បន្តរងគ្រោះដោយសារចលនានេះ។ ដូចឃើញស្រាប់កាលពីចុងខែឧសភា ក្រុមមានភក្តីភាពចំពោះភេរវជនដែស្ហឬក្រុមរដ្ឋឥស្លាមបានវាយដណ្តើមកាន់កាប់ទីក្រុង ម៉ារ៉ាវី នៅកោះមិនដាណាវ ដោយពួកគេមានមហិច្ឆតាបង្កើតរដ្ឋមានរចនាសម្ព័ន្ធដឹកនាំតាមបែបឥស្លាមនៅក្នុងតំបន់អាស៊ីអាគ្នេយ៍។ មនុស្សយ៉ាងហោចណាស់ មួយពាន់នាក់ស្លាប់ក្នុងការប្រយុទ្ធរំដោះក្រុងម៉ារ៉ាវីមកវិញ ហើយប្រតិបត្តិការនេះទទួលបានជោគជ័យដោយមានការជួយជ្រោមជ្រែងពីប្រទេសជាមិត្តជាពិសេសអូស្ត្រាលីផងដែរ៕
Tag:
អូស្ត្រាលី
អាស៊ាន
ដែស្ហ
Michael Keenan
© រក្សាសិទ្ធិដោយ thmeythmey.com