ជាតិ
សង្គមជាតិ
ទិវាវប្បធម៌ជាតិ ៣មីនា នឹងធ្វើឡើងក្រោមប្រធានបទ «យុវជនដើម្បីវប្បធម៌ជាតិ»
× «យុវជនដើម្បីវប្បធម៌ជាតិ» គឺជាប្រធានបទនៃទិវាវប្បធម៌ជាតិ លើកទី២០ នៅថ្ងៃទី៣ ខែមីនា ឆ្នាំ២០១៨ ខាងមុខ។ ការជ្រើសរើសយកប្រធានបទនេះ គឺរដ្ឋាភិបាលជំរុញឲ្យយុវជនចូលរួមអនុវត្តកាន់តែសកម្មដើម្បីលើកកម្ពស់ការអភិរក្ស និងអភិវឌ្ឍវប្បធម៌ជាតិ ក៏ដូចជាវប្បធម៌ចំរុះនៅកម្ពុជា។
ទិវាវប្បធម៌ជាតិ៣មីនា ជាទិវាដ៏សំខាន់មួយរបស់ប្រទេសជាតិ ដែលជានិច្ចកាល រាជរដ្ឋាភិបាលបានយកចិត្តទុកដាក់រៀបចំប្រារព្ធពិធីនេះ ជារៀងរាល់ឆ្នាំ ដើម្បីរម្លឹកដល់គុណូបការៈ និងស្នាដៃដ៏វិសេសវិសាលនៃបុព្វបុរសខ្មែរ ដែលបានបន្សល់ទុកនូវកេរមរតកវប្បធម៌ និងតម្លៃមិនអាចកាត់ថ្លៃបានដល់កូនចៅជំនាន់ក្រោយ។ នេះបើតាមសារាចរណែនាំ សម្ដេច ហ៊ុន សែន ចុះថ្ងៃទី២៣ ខែមករា ឆ្នាំ២០១៨។
បើតាមសម្តេចនាយករដ្ឋមន្ត្រី ការប្រារព្ធទិវាវប្បធម៌ជាតិ ជាការជំរុញ និងផ្សព្វផ្សាយ ផ្ទេរចំណេះដឹង ចំណេះធ្វើ ជំនាញបច្ចេកទេស ហើយនិងទេពកោសល្យវប្បធម៌ ក៏ដូចជាការក្រើនរម្លឹក បំផុសស្មារតីស្រឡាញ់វប្បធម៌ជាតិ ដល់ប្រជាពលរដ្ឋទាំងអស់ ជាពិសេសយុវជនដែលជាទំពាងស្នងឬស្សី។
ប្រមុខរដ្ឋាភិបាលបានលើកឡើងថា៖ «លើកស្ទួយការប្រើប្រាស់សក្ដានុពលវប្បធម៌ ក្នុងន័យបង្កើនការងារ និងកាលានុវត្តភាពដល់ប្រជាពលរដ្ឋទាំងអស់ ជាពិសេស យុវជនឲ្យខិតខំបង្កបង្កើតស្នាដៃវប្បធម៌ថ្មីៗប្រកបដោយគុណភាព»។
ជាមួយគ្នានេះ សម្តេចបានណែនាំ ក្រសួង និងស្ថាប័នរដ្ឋ ឲ្យសហការ ជាមួយ ស្ថាប័នឯកជនជាតិ-អន្តរជាតិ ដើម្បីប្រារព្ធទិវាវប្បធម៌ជាតិនេះ ឲ្យបានអធិកអធម រួមទាំងផ្សព្វផ្សាយនូវខ្លឹមសារទេសចរណ៍វប្បធម៌ បំផុសចលនា ហើយ និងរៀបចំប្រកួតប្រជែងនានា ដោយផ្តោតលើប្រធានបទ «យុវជនដើម្បីវប្បធម៌»៕
© រក្សាសិទ្ធិដោយ thmeythmey.com