លោក សម រង្ស៊ី៖«ខ្ញុំនឹងប្រយុទ្ធផ្តាច់ព្រ័ត្រជាមួយលោក ហ៊ុន សែន នៅឆ្នាំ២០១៨»

ជាតិ

លោក សម រង្ស៊ី៖«ខ្ញុំនឹងប្រយុទ្ធផ្តាច់ព្រ័ត្រជាមួយលោក ហ៊ុន សែន នៅឆ្នាំ២០១៨»

19, Feb 2018 , 4:02 pm

រូបភាព

ដោយ: ម៉ៅ សុផា

ភ្នំពេញ៖ អតីតមេបក្សប្រឆាំង ដែលកំពុងនិរទេស កំណត់យកឆ្នាំ២០១៨ ជាដំណាក់កាលផ្តាច់ព្រ័ត្រ ក្នុងការតតាំងយកចាញ់-ឈ្នះ ជាមួយមេបក្សកាន់អំណាច។ អ្នកនាំពាក្យបក្សកាន់អំណាច ចំអកថា ជីវិតនយោបាយរបស់អតីតមេបក្សប្រឆាំង ត្រូវស្លាប់ទាំងស្រុង ក្នុងឆ្នាំ២០១៨ ដូច្នេះគ្មានឱកាស មកប្រកួតផ្តាច់ព្រ័ត្រនោះទេ។

ទោះមិនទាន់អាចចូលស្រុកក្តី តែលោក សម រង្ស៊ី អតីតប្រធានគណបក្សសង្គ្រោះជាតិ និងបច្ចុប្បន្នជាប្រធានចលនាសង្គ្រោះជាតិ ដែលទើបនឹងបង្កើតឡើងនៅក្រៅប្រទេស នៅតែចាត់ទុកខ្លួន ជាគូបដិបក្ខនយោបាយរបស់សម្តេចនាយករដ្ឋមន្ត្រី ហ៊ុន សែន ប្រធានគណបក្សប្រជាជនកម្ពុជា។ អតីតមេបក្សប្រឆាំង បានប្រកាសពីក្រៅប្រទេសមកថា កម្ពុជា នឹងមានការផ្លាស់ប្តូរនៅក្នុងឆ្នាំ២០១៨នេះ។

លោក សម រង្ស៊ី មានជំនឿថា ចលនាសង្គ្រោះជាតិ ដែលកំពុងធ្វើសកម្មភាពនៅក្រៅប្រទេស នឹងជំរុញឲ្យសហគមន៍អន្តរជាតិ ដាក់ទណ្ឌកម្មកាន់តែខ្លាំង មកលើរដ្ឋាភិបាលកម្ពុជា ហើយអាចឲ្យគណបក្សសង្គ្រោះជាតិរស់ឡើងវិញ ។ ស្ថិតនៅក្នុងក្តីរំពឹងមុតមាំបែបនេះ លោក សម រង្ស៊ី បានកំណត់ទិសដៅប្រយុទ្ធទឹកផ្ដាច់ព្រ័ត្រជាមួយសម្ដេច ហ៊ុន សែន នៅឆ្នាំ២០១៨នេះ ។

ក្នុងពិធីសំណេះសំណាលជាមួយអ្នកគាំទ្រ ដែលរៀបចំឡើងក្នុងវត្តពុទ្ធរង្សី ក្នុងទីក្រុងមែលប៊ន ប្រទេសអូស្ត្រាលី កាលពីថ្ងៃទី១៨ ខែកុម្ភៈ ឆ្នាំ២០១៨ លោក សម រង្ស៊ី បានថ្លែងយ៉ាងដូច្នេះថា៖«សម រង្ស៊ី នឹងប្រយុទ្ធ តតាំងជាមួយ ហ៊ុន សែន ផ្តាច់ព្រ័ត្រ ដើម្បីរំដោះប្រទេសជាតិ។ [….] រឿងអី្វក៏ខ្ញុំមិនចង់ដឹងដែរ។ ខ្ញុំ ចង់ដឹងតែមួយទេថា កម្លាំងយើង ចលនាយើង ការរៀបចំយើង ដល់ណាហើយ ហើយត្រូវធ្វើម៉េច ឲ្យឃើញសខ្មៅ នៅឆ្នាំ២០១៨។ [….] កម្លាំងយើង និងការងារយើងគ្រប់គ្រាន់ហើយ នៅក្នុងប្រទេសកម្ពុជា។ យើង នឹងបំផុសបំផុលឲ្យមានការផ្លាស់ប្តូរ ដែលយើងចង់បាន និងរង់ចាំយូរឆ្នាំហើយ។ ធ្វើឲ្យបានសម្រេចនៅឆ្នាំ២០១៨នេះ»។

លោក សុខ ឥសាន អ្នកនាំពាក្យគណបក្សប្រជាជនកម្ពុជា និយាយបែបចំអកថា នៅឆ្នាំ២០១៨នេះ មិនមែនជាដំណាក់កាលផ្តាច់ព្រ័ត្រ ដែលលោក សម រង្ស៊ី ត្រូវប្រកួតប្រជែងជាមួយសម្តេច ហ៊ុន សែន នោះទេ។ ប៉ុន្តែជាដំណាក់កាលចុងក្រោយ ដែលជីវិតនយោបាយរបស់លោក សម រង្ស៊ី ត្រូវបញ្ចប់ទាំងស្រុង។ អ្នកនាំពាក្យបក្សកាន់អំណាចរូបនេះ ប្រាប់សារព័ត៌មានថ្មីៗយ៉ាងដូច្នេះថា៖«វគ្គផ្តាច់ព្រ័ត្រហ្នឹង គឺត្រូវហើយ គឺជាវគ្គផ្តាច់ព្រ័ត្រនៃជីវិតនយោបាយចុងក្រោយរបស់គាត់។ ឆ្នាំ២០១៨ ជីវិតនយោបាយរបស់គាត់ គឺស្លាប់១០០ ភាគរយ»។

លោក សុខ ឥសាន បន្តថា ការទាមទារឲ្យដោះលែងលោក កឹម សុខា និងបើកផ្លូវឲ្យគណបក្សសង្គ្រោះជាតិ ធ្វើសកម្មភាពឡើងវិញ គឺគ្រាន់តែជាការស្រមើស្រមៃប៉ុណ្ណោះ។ លោក ប្រាប់ទៅលោក សម រង្ស៊ី ថា ចលនាសង្គ្រោះជាតិ ក៏មិនមានការគាំទ្រពីប្រជាពលរដ្ឋកម្ពុជា និងបរទេសដែរ។ លោក បានហៅសកម្មភាពនយោបាយរបស់លោក សម រង្ស៊ី ថាជាការធ្វើវិទ្ធង្សនា ដែលប្រឆាំងនឹងប្រយោជន៍ជាតិ។

មកដល់ពេលនេះ សញ្ញាវិជ្ជមាន ដែលនាំឲ្យគណបក្សសង្គ្រោះជាតិ រស់ឡើងវិញ នៅមិនទាន់បង្ហាញនៅឡើយទេ ខណៈការបោះឆ្នោតជ្រើសតាំងតំណាងរាស្ត្រ នាអាណត្តិទី៦ កាន់តែខិតជិតមកដល់។ បក្សប្រឆាំង បានខកខានការបោះឆ្នោតមួយហើយ គឺការបោះឆ្នោតជ្រើសតាំងសមាជិកព្រឹទ្ធសភា នាអាណត្តិទី៤នេះ ដែលនឹងប្រព្រឹត្តទៅនៅថ្ងៃទី២៥ ខែកុម្ភៈ ឆ្នាំ២0១៨។

អ្វីដែលកាន់តែយ៉ាប់យ៉ឺននោះ គឺលោក កឹម សុខា ដែលក្លាយជាប្រធានគណបក្សសង្គ្រោះជាតិ បន្ទាប់ពីលោក សម រង្ស៊ី កំពុងជាប់ឃុំក្នុងពន្ធនាគារ ក្រោមការសង្ស័យរបស់តុលាការថា បានប្រព្រឹត្តអំពើក្បត់ជាតិ ព្រោះលួចឃុបឃិតជាមួយបរទេស ដើម្បីផ្តួលរំលំរដ្ឋាភិបាលកម្ពុជា។ ចំណែកលោក សម រង្ស៊ី ក៏ហ៊ុមព័ទ្ធទៅដោយបណ្តឹង ហើយមិនអាចវិលមកកម្ពុជាវិញ។

បច្ចុប្បន្ន កម្លាំងនិងសកម្មភាពរបស់អតីតក្រុមអ្នកប្រឆាំង មានតែនៅក្រៅប្រទេសប៉ុណ្ណោះ។ តុលាការ កំពុងស៊ើបអង្កេតលើចលនាសង្គ្រោះជាតិនេះ ក្រោយទទួលពាក្យបណ្ដឹងពីសំណាក់ក្រសួងមហាផ្ទៃ៕