ភរិយានិងកូនប្រុសទាំង៥នាក់របស់លោក កែម ឡី បានទៅដល់អូស្ត្រាលី

ជាតិ

ភរិយានិងកូនប្រុសទាំង៥នាក់របស់លោក កែម ឡី បានទៅដល់អូស្ត្រាលី

20, Feb 2018 , 10:50 am

រូបភាព

អ្នកស្រី ប៊ូ រចនា និងកូនប្រុសទាំង៥រូប បានទៅដល់ប្រទេសអូស្ត្រាលី។ រូបថត ហ្វេសប៊ុក Chun Chanboth

ដោយ: ថ្មីៗ

លោកស្រី ប៊ូ រចនា ភរិយារបស់លោកបណ្ឌិត កែម ឡី បាននាំកូនប្រុសទាំង៥នាក់ ចាកចេញពីប្រទេសថៃ ហើយបានទៅដល់ទីក្រុងមែលប៊ន ប្រទេសអូស្ត្រាលី កាលពីថ្ងៃទី១៧ ខែកុម្ភៈ ឆ្នាំ២0១៨។ នេះបើតាមការចុះផ្សាយរបស់វិទ្យុអាស៊ីសេរី។

វិទ្យុអាស៊ីសេរី បានដឹងទៀតថា លោក ហុង លីម តំណាងរាស្ត្រអូស្ត្រាលី ដែលមានដើមកំណើតជាជនជាតិខ្មែរ ជាមនុស្សម្នាក់ ដែលខ្នះខ្នែង ក្នុងការធានាឲ្យភរិយានិងកូនៗរបស់លោក កែម ឡី បានទៅរស់នៅក្នុងប្រទេសអូស្ត្រាលី។ លោក ហុង លីម បានប្រាប់វិទ្យុអាស៊ីសេរីថា ជំហ៊ានបន្ទាប់ គឺត្រូវខិតខំរកជម្រកដ៏សមរម្យសម្រាប់គ្រួសាររបស់លោក កែម ឡី និងជួយទំនុកបម្រុងកូនៗ ឲ្យបានរៀនសូត្រជ្រៅជ្រះ។

ក្រោយលោក កែម ឡី អ្នកវិភាគនយោបាយដ៏ល្បី ត្រូវបានបាញ់សម្លាប់កាលពីថ្ងៃទី១០ ខែកក្កដា ឆ្នាំ២០១៦ លោកស្រី ប៊ូ រចនា ដែលកាលនោះកំពុងមានផ្ទៃពោះ បាននាំកូនប្រុសទាំង៤នាក់ ចាកចេញពីប្រទេសកម្ពុជា ទៅរស់នៅក្នុងប្រទេសថៃជាបណ្តោះអាសន្ន។ ក្រោយទៅដល់ប្រទេសថៃអស់មួយរយៈ កូនប្រុសចុងក្រោយរបស់លោកស្រី ក៏ប្រសូត។ លោកស្រី និងកូនៗ បានរស់នៅក្នុងប្រទេសថៃអស់រយៈពេលជិត២ឆ្នាំ មុននឹងទទួលបានការធានាឲ្យទៅរស់នៅក្នុងប្រទេសអូស្ត្រាលីនាពេលនេះ។

សារព័ត៌មានថ្មីៗ មិនអាចទាក់ទងក្រុមគ្រួសាររបស់លោក កែម ឡី នៅក្នុងប្រទេសកម្ពុជាបានទេ ដោយសារតែហៅទូរសព្ទមិនចូល។

កាលពីអំឡុងខែមីនា ឆ្នាំ២0១៧ លោក អឿត អាង ហៅជួប សម្លាប់ ត្រូវបានកាត់ទោសឲ្យជាប់ពន្ធនាគារមួយជីវិត ដោយរងការចោទប្រកាន់ថា បានបាញ់សម្លាប់លោក កែម ឡី។ យ៉ាងណាក៏ដោយ លោកស្រី ប៊ូ រចនា រួមទាំងសហគមន៍អន្តរជាតិមួយចំនួន ហាក់មិនសូវជឿនោះទេថា ជួប សម្លាប់ ពិតជាឃាតក។ ពួកគេ នៅតែចង់ឲ្យសមត្ថកិច្ចបន្តស្វែងរកអ្នកជាប់ពាក់ព័ន្ធផ្សេងទៀត៕

អត្ថបទទាក់ទង

ជួប សម្លាប់ ត្រូវបានកាត់ទោសឲ្យជាប់ពន្ធនាគារមួយជីវិត ក្នុងរឿងឃាតកម្មលោក កែម ឡី

កូនប្រុសចុងក្រោយរបស់លោក កែម ឡី បានប្រសូតហើយ