អន្តរជាតិ
ប្រាយុទ្ធ ថា លោកមិនបានផ្ដល់តំណែងដើម្បីអូសទាញអ្នកនយោបាយឲ្យគាំទ្រលោកឡើយ រូបភាព AFP
× នាយករដ្ឋមន្ត្រីថៃ ប្រាយុទ្ធ ចន្ទអូចា បានទាត់ចោលការលើកឡើងដែលថា លោកបានផ្ដល់តំណែងឲ្យអ្នកនយោបាយជាថ្នូរនឹងការចូលរួមក្នុងបក្សនយោបាយថ្មីដែលបង្កើតដោយយោធា ដើម្បីគាំទ្ររូបលោកជានាយករដ្ឋមន្ត្រីក្រោយការបោះឆ្នោតឆ្នាំ២០១៩ ។ លោក ប្រាយុទ្ធ ក៏បានប្រាប់ឲ្យបក្សនយោបាយនានា ការពារសមាជិករបស់ខ្លួនឲ្យជាប់ ហើយការចាកចេញណាមួយ ក៏មិនជាប់ពាក់ព័ន្ធរូបលោកឡើយ។
មួយរយៈពេលចុងក្រោយនេះ មានលេចឮព័ត៌មានថា របបយោធាថៃកំពុងលួងលោមបក្សនយោបាយតូច និងមធ្យម ក៏ដូចជាអ្នកនយោបាយឲ្យគាំទ្របក្សនយោបាយដែលបង្កើតដោយយោធា ដើម្បីគាំទ្រលោក ប្រាយុទ្ធ ចន្ទអូចា ជានាយករដ្ឋមន្ត្រីក្រោយការបោះឆ្នោតឆ្នាំ២០១៩ ។ នៅដើមសប្ដាហ៍នេះ មេបក្សប្រជាធិបតេយ្យលោក Abhisit Vejjajiva បានទម្លាយថា របបយោធាបានផ្ដល់តំណែងជាជំនួយការរដ្ឋមន្ត្រីដើម្បីអូសទាញ។
ជុំវិញបញ្ហាខាងលើ លោកនាយករដ្ឋមន្ត្រី ប្រាយុទ្ធ បានទាត់ចោលការលើកឡើងខាងលើ និងបាននិយាយថា លោកមិនជាអ្នកស្រូបយកអ្នកណាឡើយ ហើយក៏គ្មានអំណាចអ្វីបង្ខំឲ្យអ្នកដទៃចូលរួមដែរ។ នេះបើតាមការផ្សាយរបស់កាសែតបាងកកនៅថ្ងៃទី២៥ ខែមេសា។ លោក ប្រាយុទ្ធ បដិសេធសំណួររបស់អ្នកសារព័ត៌មានដែលសួរលោកពីផែនការអូសទាញអ្នកគាំទ្រត្រកូល Chidchob នៅខេត្តបុរីរម្យដែរ។
ជំនួសមកវិញ មេដឹកនាំរបបយោធាថៃរូបនេះបែរជាប្រាប់ឲ្យក្រលេកមើលសមិទ្ធផលរបស់បក្សនយោបាយទៅវិញ ហើយមានបានអនុវត្តនយោបាយតាមការចង់របស់ប្រជាជនទៅវិញ។ ដោយមិននិយាយចំឈ្មោះអ្នកណា លោក ប្រាយុទ្ធ បន្តថា លោកយល់ពីជំហររបស់អ្នកនយោបាយទាំងអស់ដែលចង់ធ្វើការដើម្បីប្រទេសជាតិ ប៉ុន្តែបំណងរបស់ពួកគេជួបបញ្ហាដោយសារនយោបាយរបស់បក្ស ឬក៏មេបក្សផ្ទាល់តែម្ដង។
ពាក់ព័ន្ធបញ្ហានេះ គេត្រូវមើលច្បាប់ថ្មីរបស់ថៃសិន។ បើតាមច្បាប់ពាក់ព័ន្ធការបោះឆ្នោត នាយករដ្ឋមន្ត្រីថ្មីអាចមិនមែនជាតំណាងរាស្ត្រ ឬក៏ជាបេក្ខជនគ្មានឈ្មោះក្នុងបញ្ជីបេក្ខភាពនាយករដ្ឋមន្ត្រីដែលស្នើដោយបក្សមានសំឡេងក្នុងសភា។ នេះក៏ព្រោះតែច្បាប់ថៃចែងថា ក្នុងករណីរដ្ឋសភាមិនអាចជ្រើសរើសនាយករដ្ឋមន្ត្រីថ្មីបាន ព្រឹទ្ធសភានឹងចូលរួមក្នុងការបោះឆ្នោតជ្រើសរើសនាយករដ្ឋមន្ត្រីជាមួយរដ្ឋសភាដែរ។
ដោយសារហេតុផលខាងលើ ទើបរបបយោធាព្យាយាមអូសទាញអ្នកយោបាយឲ្យចូលរួមជាមួយបក្សដែលគាំទ្រលោក ប្រាយុទ្ធ ដ្បិតគេរំពឹងថា វានឹងមិនមានបក្សណាអាចឈ្នះសំឡេងគ្រប់គ្រាន់ក្នុងការជ្រើសរើសនាយករដ្ឋមន្ត្រីដោយខ្លួនឯងឡើយ។ នេះក៏មានន័យថា លោក ប្រាយុទ្ធ អាចត្រឡប់ធ្វើជានាយករដ្ឋមន្ត្រីម្ដងទៀតក្រោយការបោះឆ្នោតខែកុម្ភៈ ឆ្នាំ២០១៩ នោះ។ មកទល់ពេលនេះ គេឃើញមានបក្សនយោបាយតូចៗមួយចំនួនប្រកាសគាំទ្របេក្ខភាពលោក ប្រាយុទ្ធ រួចស្រេចទៅហើយ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com