ជាតិ
សេដ្ឋកិច្ច
លោក Bill Longhurst ៖ ក្រុមហ៊ុនអង់គ្លេសរកស៊ីនៅកម្ពុជា ព្រោះកម្ពុជាមានកំណើនសេដ្ឋកិច្ចខ្ពស់
អគ្គរាជទូតចក្រភពអង់គ្លេសប្រចាំកម្ពុជាលោក Bill Longhurst
×![]()
ដោយ: តន ចាន់រិទ្ធារ៉ា
ភ្នំពេញ៖អគ្គរាជទូតចក្រភពអង់គ្លេសប្រចាំកម្ពុជាលោក Bill Longhurst និយាយថា ក្រុមហ៊ុនអង់គ្លេសបានមកបណ្ដាក់ទុនរកស៊ីនៅកម្ពុជា ព្រោះកម្ពុជាមានកំណើនសេដ្ឋកិច្ចខ្ពស់ និងសម្បូរកម្លាំងពលកម្ម។ ខណៈជិតចប់អាណត្តិការទូតនៅកម្ពុជាដែរនោះ លោក Longhurst បញ្ជាក់ថា អង់គ្លេសនឹងបន្តជួយកម្ពុជាទៀត។ លោក Bill Longhurst និយាយបែបនេះក្នុងពិធីអបអរចម្រើនព្រះជន្មមហាក្សត្រីយានីអេលីហ្សាបេត្សទី២ នៅថ្ងៃទី២៦ ខែមេសា។ 
ស្ថានទូតចក្រភពអង់គ្លេសប្រចាំកម្ពុជា នៅថ្ងៃទី២៦ ខែមេសា បានរៀបចំពិធីចម្រើនព្រះជន្មមហាក្សត្រីយានីអេលីហ្សាបេត្សទីពីរ ដោយមានការចូលរួមពីភ្ញៀវមកពីគ្រប់មជ្ឈដ្ឋានជាង៥០០នាក់។ ឆ្លៀតឱកាសនេះ លោក Bill Longhurst អគ្គរាជទូតចក្រភពអង់គ្លេស ដែលជិតចប់អាណត្តិ បានរៀបរាប់ពីសមិទ្ធផលជាច្រើនក្នុងរយៈពេលបំពេញការងារជាង៤ឆ្នាំ ដែលផ្ដោតខ្លាំងលើវិស័យអប់រំ យុវជន បរិស្ថាន និងបញ្ហាមីននៅកម្ពុជា។
លោក Longhurst និយាយថា អង់គ្លេសបានបណ្ដុះបណ្ដាល និងផ្សាភ្ជាប់ទំនាក់ទំនងជិតស្និទ្ធជាមួយអ្នកដឹកនាំអនាគត ទាំងក្នុងវិស័យពាណិជ្ជកម្ម រដ្ឋបាល នយោបាយ។ លោកបន្តថា នៅប៉ុន្មានឆ្នាំចុងក្រោយ លោកបានយកចិត្តទុកដាក់លើវិស័យអប់រំ និងមុខជំនាញដែលចាំបាច់សម្រាប់ការអភិវឌ្ឍនៅកម្ពុជា ជាពិសេសមុខជំនាញ STEM ។
សម្រាប់ការផ្ដល់ជំនួយអភិវឌ្ឍវិញ អគ្គរាជទូតដែលធ្វើដំណើរដល់ខេត្ត-រាជធានីចំនួន២៤នៅទូទាំងកម្ពុជា អះអាងថា ក្នុងរយៈពេល២៦មកនេះ អង់គ្លេសបានផ្ដល់ជំនួយច្រើនដល់វិស័យដោះមីនរបស់កម្ពុជា ហើយអង់គ្លេសនឹងបន្តជួយលើការងារនេះទៀត។ ក្រៅពីការដោះមីន អង់គ្លេសក៏បានជួយផ្ដល់ហិរញ្ញវត្ថុសម្រាប់ការពារបរិស្ថានប្រកបដោយចីរភាព និងទប់ស្កាត់ការជួញដូរសត្វព្រៃ។ ក្នុងក្របខណ្ឌសហភាពអឺរ៉ុប អង់គ្លេសក៏បានពង្រឹងថ្នាក់មូលដ្ឋានផងដែរ។
ជុំវិញពាណិជ្ជកម្មទ្វេភាគីវិញ ទំហំពាណិជ្ជកម្មរវាងកម្ពុជា និងអង់គ្លេសមានលើសមួយពាន់លានដុល្លារ។ ទំនិញកម្ពុជាដែលភាគច្រើនជាផលិតវាយនភណ្ឌបាននាំចូលទីផ្សារអង់គ្លេស ច្រើនជាងទំនិញអង់គ្លេសនាំចូលមកកម្ពុជា ហើយក្រុមហ៊ុនអង់គ្លេសជាច្រើនក៏បានចូលមករកស៊ីនៅកម្ពុជាផង។ បើតាមលោក Longhurst ក្រុមហ៊ុនអង់គ្លេសមកវិនិយោគនៅកម្ពុជា ព្រោះកម្ពុជាមានកំណើនសេដ្ឋកិច្ចខ្លាំង សម្បូរកម្លាំងពលកម្មក្មេងៗ និងពោរពេញដោយឱកាសវិនិយោគ។
ខណៈនៅសល់ពីរខែទៀតត្រូវបញ្ចប់បេសកកម្មការទូតនៅកម្ពុជា លោក Longhurst លើកឡើងថា លោកនឹងលើកទឹកចិត្តឲ្យអគ្គរាជទូតថ្មីបន្តការយកចិត្តទុកដាក់លើវិស័យអប់រំ និងការអភិវឌ្ឍវិជ្ជាជីវៈ។ កាន់តែសំខាន់ទៅទៀត លោកនឹងជំរុញឲ្យតំណាងអង់គ្លេសដែលជាស្ត្រី បន្តផ្សារភ្ជាប់ជាមួយមេដឹកនាំអនាគត ព្រោះពួកគេមានសក្តានុពលសម្រាប់អភិវឌ្ឍន៍កម្ពុជា៕
Tag:
កម្ពុជា
អង់គ្លេស
Bill Longhurst
© រក្សាសិទ្ធិដោយ thmeythmey.com
