ជាតិ
អូស្ត្រាលី ផ្តល់ជំនួយ ៦២លានដុល្លារ ដល់កម្ពុជា ដើម្បីអភិវឌ្ឍលើវិស័យនានា សម្តេច ហ៊ុន សែន នាយករដ្ឋមន្ត្រីកម្ពុជា ចាប់ដៃជាមួយលោក Malcolm Turnbull នាយករដ្ឋមន្ត្រីអូស្ត្រាលី នៅស៊ីដនី កាលពីកន្លងមក។ រូបថត AFP
× ប្រទេសអូស្ត្រាលី នឹងផ្តល់ជំនួយអភិវឌ្ឍន៍ផ្លូវការ (ODA) ដល់កម្ពុជាចំនួន ៨៣,៧លានដុល្លារអូស្ត្រាលី (ប្រហែលជា ៦២លានដុល្លារអាមេរិក) សម្រាប់ឆ្នាំ២០១៨-២០១៩ ដើម្បីរួមចំណែកកាត់បន្ថយភាពក្រីក្រ នៅកម្ពុជា។ នេះបើយោងតាមសេចក្តីប្រកាសរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី ១៤ ខែមិថុនា ឆ្នាំ២០១៨។
ជំនួយអភិវឌ្ឍន៍ខាងលើ ដែលប្រទេសអូស្ត្រាលីផ្តល់ឲ្យកម្ពុជាសម្រាប់ឆ្នាំ២០១៨-២០១៩នេះ មានមូលនិធិទ្វេភាគីជិត៤២លានដុល្លារអាមេរិក សម្រាប់គម្រោងនានាប្រចាំកម្ពុជា និងប្រមាណជា ២០លានដុល្លារអាមេរិក ត្រូវបានផ្តល់តាមរយៈបណ្តាញថ្នាក់តំបន់ និងបណ្តាញដទៃ។
ប្រទេសអូស្ត្រាលី បាននិងកំពុងសហការជាមួយរដ្ឋាភិបាលកម្ពុជាលើផ្នែកឯកជន និងផ្នែកដទៃទៀត ពិសេសលើវិស័យងាយរងគ្រោះ ដែលជាអាទិភាព រួមមាន ការកែលម្អលទ្ធភាពប្រើប្រាស់ហេដ្ឋារចនាសម្ព័ន្ធ ការបង្កើនទន្និផលកសិកម្មនិងចំណូលសម្រាប់កសិករ និងការលើកកម្ពស់ភាពប្រសើរនៃសុខភាពនិងលទ្ធផលអប់រំ សម្រាប់ជួយប្រជាពលរដ្ឋកម្ពុជា៕
Tag:
អូស្ត្រាលី
កម្ពុជា
អភិវឌ្ឍន៍
© រក្សាសិទ្ធិដោយ thmeythmey.com