អន្តរជាតិ
មហាធៀ សន្យាផ្តល់ការអនុគ្រោះពន្ធពិសេសដល់ក្រុមហ៊ុនបរទេសដែលអាចបង្កើតការងារសម្រាប់បញ្ញវន្តម៉ាឡេស៊ី
× រដ្ឋាភិបាលម៉ាឡេស៊ីបានសន្យាផ្តល់ការអនុគ្រោះពន្ធពិសេសដល់បណ្តាអ្នកវិនិយោគបរទេសទាំងឡាយណាដែលអាចបង្កើតការងារច្រើនសម្រាប់កម្មករជំនាញខ្ពស់លើវិស័យបច្ចេកវិទ្យា ស្រាវជ្រាវ និងអភិវឌ្ឍន៍ជាដើមនៅម៉ាឡេស៊ី។ ម៉ាឡេស៊ីអាចនឹងផ្តល់ការអនុគ្រោះពន្ធយ៉ាងតិច១០ឆ្នាំសម្រាប់ក្រុមហ៊ុនវិនិយោគទាំងនោះផងដែរ។
ក្រោយបក្សប្រឆាំង Pakatan Harapan ឈ្នះឆ្នោតកាលពីខែមុន រដ្ឋាភិបាលថ្មីផ្តោតសំខាន់លើវិស័យសេដ្ឋកិច្ច និងពាណិជ្ជកម្មជាពិសេសដោះស្រាយបំណុលរដ្ឋ។ ប៉ុន្តែការលុបចោលកិច្ចព្រមព្រៀងសាងសង់ផ្លូវរថភ្លើង និងត្រួតពិនិត្យគម្រោងជាមួយចិនធ្វើឲ្យវិនិយោគិនបរទេសខ្លះបារម្ភផង។
ថ្មីៗនេះ នាយករដ្ឋមន្ត្រីវ័យ ៩២ ឆ្នាំ មហាធៀ មហាម៉ាត់ បានបញ្ជាក់ រដ្ឋាភិបាលលោកអាចធានាដល់អ្នកវិនិយោគិនបរទេសបានពីលក្ខខណ្ឌល្អប្រសើរសម្រាប់ការបណ្តាក់ទុនរកស៊ីនៅម៉ាឡេស៊ីដែលជាប្រទេសមានសេដ្ឋកិច្ចធំបំផុតលំដាប់ទីបីនៅអាស៊ាន។ មិនត្រឹមតែប៉ុណ្ណោះទេ រដ្ឋាភិបាលលោកក៏ត្រៀមអនុវត្តគោលនយោបាយពិសេសផ្សេងទៀតដើម្បីទាក់ទាញវិនិយោគិនបរទេសដូចគ្នា។
ក្នុងបទសម្ភាសន៍ជាមួយទីភ្នាក់ងារព័ត៌មាន Reuters លោកនាយករដ្ឋមន្ត្រី មហាធៀ មហាម៉ាត់ បានអះអាងថា រដ្ឋាភិបាលលោកនឹងស្វាគមន៍រាល់គម្រោងវិនិយោគបរទេសទោះមកពីចិន ឬពីទីណាក៏ដោយ។ ប៉ុន្តែលក្ខខណ្ឌសំខាន់បំផុតគឺ ក្រុមហ៊ុននោះមានលទ្ធភាពក្នុងការអនុវត្តគម្រោងដែលបង្កើតការងារមានជំនាញខ្ពស់សម្រាប់ប្រជាជនម៉ាឡេស៊ីដែលជាបញ្ញវន្តភាគច្រើនគ្របដណ្តប់លើវិស័យបច្ចេកវិទ្យា ស្រាវជ្រាវ ឬអភិវឌ្ឍផងដែរ។
«ពីមុនយើងត្រូវការការងារ ដូច្នេះហើយថា អ្នកវិនិយោគដែលមានធនធានអាចជួលកម្មករបាន យើងស្វាគមន៍។ ប៉ុន្តែឥឡូវនេះយើងចង់បានពលករដែលជាបញ្ញវន្ត»។ នេះជាការលើកឡើងរបស់លោក មហាធៀ។
មេដឹកនាំរូបនេះបង្ហើបថា ក្នុងករណីខ្លះរដ្ឋាភិបាលលោកនឹងអាចផ្តល់ការលើកលែងពន្ធសម្រាប់ក្រុមហ៊ុនទាំងនោះលើសពីដប់ឆ្នាំឯណោះ ខណៈបច្ចុប្បន្នការអនុគ្រោះពន្ធសម្រាប់ក្រុមហ៊ុនវិនិយោគនៅម៉ាឡេស៊ីមានត្រឹមចន្លោះពីប្រាំទៅ ដប់ឆ្នាំប៉ុណ្ណោះ។
ពាក់ព័ន្ធនឹងការវិនិយោគដែលរដ្ឋាភិបាលក្រុងគូឡាឡាំពួរចង់បាននៅពេលនេះ លោក មហាធៀ បានលើកយកការបណ្តាក់ទុករកស៊ីរបស់ក្រុមហ៊ុនចិន អាលីបាបា (Alibaba) របស់លោក ជេក ម៉ា នៅម៉ាឡេស៊ី។ លោក ជេក ម៉ា សម្រេចបើកការិយាល័យក្រុមហ៊ុន និងឈានទៅបើករោងចក្រនៅម៉ាឡេស៊ីសម្រាប់ផលិតទំនិញនាំចូលទៅកាន់ប្រទេសចិនវិញនៅពេលខាងមុខផង។
តាមពិតទៅ លោក ជេក ម៉ា ទើបជួបជាមួយលោក មហាធៀ នៅដើមសប្តាហ៍នេះ ហើយអ្នកទាំងពីរបានចំណាយពេលវេលាយូរល្មមពិភាក្សាគ្នាដោយផ្តោតសំខាន់លើការវិនិយោគលើវិស័យបច្ចេកវិទ្យា។ ការជួបពិភាក្សាជាមួយមេដឹកនាំម៉ាឡេស៊ីនេះ ក៏កើតឡើងបន្ទាប់ពីរដ្ឋាភិបាលម៉ាឡេស៊ីថ្មីចាប់ផ្តើមលុប និងត្រួតពិនិត្យឡើងវិញលើកិច្ចព្រមព្រៀងជាច្រើនដែលរដ្ឋាភិបាលមុនចុះជាមួយរដ្ឋាភិបាលបរទេសក្នុងនោះកិច្ចព្រមព្រៀងជាមួយចិនដែលឈានទៅសង់ផ្លូវរថភ្លើងតំបន់សមុទ្រភាគខាងកើត (East Coast Rail Line) ផងដែរ៕
Tag:
ម៉ាឡេស៊ី
វិនិយោគ
ចិន
បច្ចេកវិទ្យា
មហាធៀ មហាម៉ាត់
© រក្សាសិទ្ធិដោយ thmeythmey.com