ព្រះសង្ឃដែលលុតជង្គង់ចំពោះមុខសម្ដេច ហេង សំរិន៖ អាត្មាទន់ជង្គង់ ភ្លេចថាខ្លួនជាសង្ឃ

ជាតិ

ព្រះសង្ឃដែលលុតជង្គង់ចំពោះមុខសម្ដេច ហេង សំរិន៖ អាត្មាទន់ជង្គង់ ភ្លេចថាខ្លួនជាសង្ឃ

18, Feb 2019 , 10:20 am

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ព្រះសង្ឃមួយអង្គ ដែលលុតជង្គង់ចំពោះមុខសម្ដេច ហេង សំរិន ប្រធានរដ្ឋសភានោះ បានចេញសង្ឃដីកាបកស្រាយមូលហេតុ តាមរយៈវីដេអូឃ្លីបមួយ ក្រោយពីមានការរិះគន់យ៉ាងខ្លាំងពីសំណាក់ប្រជាពលរដ្ឋ ជាពិសេសអ្នកប្រើប្រាស់បណ្ដាញសង្គមហ្វេសប៊ុក។

តាមរយៈវីដេអូឃ្លីប ដែលចែកចាយតគ្នានៅលើហ្វេសប៊ុកនេះ គេឃើញមានព្រះសង្ឃមួយអង្គ ដែលបាននិមន្តជួបសម្ដេច ហេង សំរិន បានចេញសង្ឃដីកាបកស្រាយថា រូបភាពព្រះអង្គលុតជង្គង់នោះ ជាទង្វើអចេតនាទេ ព្រោះតែព្រះអង្គរំភើបចំពោះទឹកចិត្តសម្ដេច ហេង សំរិន ដែលផ្ដល់ថវិកាប្រគេនព្រះអង្គ សម្រាប់យកទៅកសាងព្រះវិហារនៅព្រំដែនកម្ពុជា-វៀតណាម។ ដោយសារសេចក្តីត្រេកអរពេកនេះហើយ ទើបធ្វើឲ្យព្រះអង្គ ភ្លេចខ្លួនឯងថា ជាសង្ឃហើយទន់ជង្គង់ចុះនៅចំពោះមុខប្រធានរដ្ឋសភាតែម្ដង។

សូមស្តាប់សង្ឃដីកា៖

ព្រះអង្គ មានសង្ឃដីកាបកស្រាយយ៉ាងដូច្នេះថា៖«សម្ដេច មានប្រសាសន៍ថា ជួយកសាងព្រះវិហារ ដូច្នេះខ្ញុំព្រះករុណា អាត្មាភាពទន់ជង្គង់ ដោយមិនដឹងនូវខ្លួនឯងថាជាព្រះសង្ឃ ដូច្នេះសម្ដេច លោកមិនបានឲ្យខ្ញុំព្រះករុណាអាត្មាភាពលុតជង្គង់នោះទេ គឺថាសម្ដេចលោកមិនឲ្យធ្វើអ៊ីចឹងទេ។ ដូច្នេះហើយខ្ញុំព្រះករុណាអត្មាភាព មានចិត្តរំភើបពេក ដោយសារឮប្រសាសន៍របស់សម្ដេចថា ជួយកសាងព្រះវិហារនៅតំបន់ក្រីក្រចុងកាត់មាត់ញក នៅជាប់ព្រំដែនវៀតណាម ដូច្នេះហើយគឺថា ខ្ញុំព្រះករុណាអត្មាភាពទន់ជង្គង់ដោយមិនដឹងខ្លួនថាជាសង្ឃនោះទេ»។

អមជាមួយសង្ឃដីកាបកស្រាយខាងលើនេះ ព្រះអង្គ ក៏បានសុំការអធ្យាស្រ័យពីសំណាក់ប្រជាពលរដ្ឋ ជាពិសេសអ្នកប្រើប្រាស់បណ្ដាញសង្គមហ្វេសប៊ុក ឈប់បកស្រាយក្នុងន័យបន្តុះបង្អាប់ចំពោះរូបភាព ដែលបង្ហាញពីសកម្មភាពខុសដោយអចេតនានេះ ដែលនាំឲ្យធ្លាក់ចុះនូវវិស័យព្រះពុទ្ធសាសនា៕