កីឡាជាតិ
ជាតិ
អស្ចារ្យ! មុនមកផ្ទះវិញ U18 កម្ពុជាបានទម្លាក់ម្ចាស់ផ្ទះវៀតណាម ២-១ ជាប្រវត្តិសាស្ត្រ
× ក្រុមកីឡាកបាល់ទាត់ជម្រើសជាតិយុវជនអាយុក្រោម១៨ឆ្នាំរបស់កម្ពុជា បានហាលអាវរួចទៅហើយក្នុងព្រឹត្តិការណ៍ AFF U18 Championship ប៉ុន្តែក្រុមដែលស្ថិតក្រោមការដឹកនាំគ្រូបង្វឹកជប៉ុន Gyotoku Koji បានផ្តល់មេរៀនដ៏ខកចិត្តសម្រាប់ក្រុមម្ចាស់ផ្ទះ ក្នុងលទ្ធផល ២-១ នៅកីឡដ្ឋាន Thong Nhat ក្រុងហូជីមិញ ប្រទេសវៀតណាម។ សៀង ចន្ធា រកបានគ្រាប់បើកឆាកនៅនាទី៥០ ប៉ុន្តែកីឡាករវៀតណាម Nguyen Kim Nhat តាមស្មើវិញនៅនាទី៩០+២។ លោកអាជ្ញាកណ្តាលឡាវ Souei Vongkham ហៀបនឹងផ្លុំកញ្ចែបញ្ចប់ការប្រកួតទៅហើយ ធី លៀង បានសុ៊តបាល់បញ្ចូលទីនាំជ័យជម្នះ ២-១ ក្រោយការបញ្ជូនរបស់ ចន្ធា។
ជំនួបបីលើកកន្លងមក កម្ពុជាមិនធ្លាប់យកឈ្នះវៀតណាមឡើយដោយនៅឆ្នាំ២០០២ កម្ពុជាចាញ់វៀតណាម ៣-១ បន្ទាប់មកនៅឆ្នាំ២០០៣ និង ២០០៧ កម្ពុជាចាញ់វៀតណាមក្នុងលទ្ធផល ៥-០ ដូចគ្នា។ នេះជាជ័យជម្នះលើកដំបូងបំផុតផងដែររបស់កម្ពុជាសម្រាប់ការប្រកួតគ្រប់កម្រិតអាយុ បើគិតចាប់តាំងពីក្រោយសង្គ្រាមមក ពោលគឺដូចជាជ័យជម្នះ ៤-៣ លើថៃ យ៉ាងដូច្នោះដែរ។
ការខកចិត្តយ៉ាងខ្លាំងរបស់ម្ចាស់ផ្ទះនោះ គឺដោយសារតែ ម៉ាឡេស៊ី បានចាញ់ថៃ ១-០ ស្របពេលដែលអូស្ត្រាលីបន្តឈ្នះសិង្ហបុរី ៥-០។ សរុបការប្រកួតទាំងអស់ក្នុងពូល អូស្ត្រាលី បាន១២ពិន្ទុ ម៉ាឡេស៊ី បាន៩ពិន្ទុ ហើយត្រូវឡើងទៅវគ្គបន្ត។ វៀតណាមដែលចាញ់កម្ពុជា មានត្រឹម៧ពិន្ទុ។ កម្ពុជាមាន៦ពិន្ទុ ក្រោយឈ្នះថៃ ៤-៣ ឈ្នះម្ចាស់ផ្ទះវៀតណាម ២-១ តែចាញ់សិង្ហបុរី ១-០ និងចាញ់ម៉ាឡេស៊ី ៣-០ និងចាញ់អូស្ត្រាលី ៥-១។
នេះជាលទ្ធផលនៃសហការគ្នាជាក្រុមបានល្អ ដែលក្នុងនោះ សៀង ចន្ធា ទទួលបាននូវការចាប់អារម្មណ៍ជាពិសេស ដោយបានស៊ុតបាល់បញ្ចូលទីសរុប៤គ្រាប់ប្រចាំព្រឹត្តិការណ៍នេះ។
អវត្តមានកីឡាករឆ្នើម២នាក់៖
អ្វីដែលគួរឲ្យកត់សម្គាល់នោះ សមាជិកក្រុមជម្រើសជាតិអាយុក្រោម១៨ឆ្នាំកម្ពុជាពីររូបរួមមានកីឡាករ ប៊ុនធឿន ប៊ុណ្ណារ៉ុង និង វុធ តុលា មិនមានវត្តមានឡើយ ដោយពួកគេបានរងរបួសធ្ងន់ធ្ងរក្នុងអំឡុងពេលបំពេញបេសកកម្មក្នុងពានរង្វាន់ AFF U18 Championship នៅទីក្រុងហូជីមិញប្រទេសវៀតណាម។ បញ្ហារបួសនេះ បានធ្វើឲ្យពួកគេទាំងពីរអវត្តមានក្នុងជំនួបចុងក្រោយជាមួយវៀតណាម។
បើតាមសហព័ន្ធកីឡាបាល់ទាត់កម្ពុជា កីឡាករ ប៊ុនធឿន ប៊ុណ្ណារ៉ុង បានរងរបួសធ្ងន់ធ្ងរដោយដាច់សរសៃជង្គង់ខាងស្តាំ ខណៈកីឡាករ វុធ តុលា ដែលរកគ្រាប់បាល់បើកឆាកឲ្យកម្ពុជាក្នុងជំនួបជាមួយថៃ រងរបួសបែកឆ្អឹងជើង។ បញ្ហារបួសរបស់ពួកគេកើតឡើងក្នុងជំនួបជាមួយសិង្ហបុរី ដែលកម្ពុជាចាញ់ក្នុងលទ្ធផល ១-០។
«សហព័ន្ធកីឡាបាល់ទាត់កម្ពុជា ក្រុមការងារគ្រូបង្វឹក និងមិត្តរួមក្រុមទាំងអស់សូមថ្លែងអំណរគុណដល់កីឡាករទាំង២សម្រាប់ការខិតខំ និងលះបង់ក្នុងនាមតំណាងឱ្យកម្ពុជា ហើយសូមជូនពរឱ្យអ្នកទាំង២ឆាប់បានជាសះស្បើយ ដើម្បីវិលត្រឡប់មកចូលរួមជាមួយក្រុមសម្រាប់បេសកកម្មទៅថ្ងៃអនាគតបន្តទៀត»។ នេះជាការជូនពររបស់សហព័ន្ធកីឡាបាល់ទាត់កម្ពុជា។
ជម្រើសរបស់កម្ពុជា៖ កយ សាលីម (អ្នកចាំទី), រី លាភផេង, សឿត ណាវ៉ា, ជុង មករា, អ៊ាន ពិសី (ធី លៀង ៦៥), សៀង ចន្ធា (ប្រធានក្រុម), មិន រតនៈ, អាត អូនតូច, ចាន់ សុភា, សៀន សុភ័ក្ត្រា (កែវ ឧត្តម ៦០), មិត សាម៉ើយ (ជា សុខម៉េង ៩០)។
Tag:
AFF U18 Championship
U18 កម្ពុជា
© រក្សាសិទ្ធិដោយ thmeythmey.com