រាជវាំង ថ្កោលទោសលោក សម រង្ស៊ី

ជាតិ

នយោបាយជាតិ

រាជវាំង ថ្កោលទោសលោក សម រង្ស៊ី

13, Sep 2019 , 1:00 pm

រូបភាព

ដោយ: ធឿន បញ្ញាឬទិ្ធ

ភ្នំពេញ៖ ក្រសួងព្រះបរមរាជវាំង ថ្កោលទោសលោក សម រង្ស៊ី មេដឹកនាំអតីតគណបក្សប្រឆាំង ដែលបានប្រើពាក្យអសុរោះធ្ងន់ៗមកលើព្រះកិត្តិនាម ព្រះករុណាព្រះបាទ សម្ដេច ព្រះបរមនាថ នរោត្តម សីហមុនី ព្រះមហាក្សត្រ។ នេះបើតាមសេចក្តីថ្លែងការណ៍ព្រះបរមរាជវាំង នៅថ្ងៃទី១៣ កញ្ញា។

ក្រសួងព្រះបរមរាជវាំង បានបញ្ជាក់ដូច្នេះថា៖«សូមប្រកាសដាច់អហង្កាថ្កោលទោសចំពោះលោក សម រង្ស៊ី ដែលចរិតជាជនក្បត់ជាតិ តែងតែពោលពាក្យប៉ះពាល់ដល់ព្រះកិត្តិនាម ព្រះករុណាព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត ដែលព្រះអង្គកំពុងគង់ប្រថាប់បំពេញព្រះរាជតួនាទីដ៏ខ្ពង់ខ្ពស់ដ៏ឧត្តុងឧត្តម ជានិមិត្តរូបនៃឯកភាពជាតិ និងនិរន្តរភាពជាតិ»។

ក្នុងកិច្ចសម្ភាសន៍ជាមួយវិទ្យុអាស៊ីសេរី កាលពីយប់ថ្ងៃទី១២ កញ្ញា លោក សម រង្ស៊ី បាននិយាយថា នយោបាយនៅកម្ពុជា គ្មានអ្នកណាម្នាក់អាចដោះស្រាយបាននោះទេ សូម្បីតែព្រះមហាក្សត្រ ។ ត្រង់ចំណុចនេះលោក សម រង្ស៊ី បានសង្កត់ធ្ងន់ថា ព្រះមហាក្សត្រ ក៏ជា «ចំណាប់ខ្មាំង» និងជា «អាយ៉ង» របស់សម្តេច ហ៊ុន សែន ដែរ ។ មេដឹកនាំអតីតបក្សប្រឆាំង ដែលកំពុងរស់នៅប្រទេសបារាំងរូបនេះ បាននិយាយយ៉ាងដូច្នេះថា៖«គ្មាននរណាអាចប្រៀបធៀបជាមួយព្រះនរោត្តម សីហនុ (ព្រះបរមរតនកោដ្ឋ ធ្លាប់កោះហៅអ្នកនយោបាយប្រជុំរកដំណោះស្រាយនយោបាយ កាលពីព្រះអង្គនៅមានព្រះជន្ម)បានទេ។ ខ្ញុំជឿថាឥឡូវនេះ មានតែសហគមន៍អន្តរជាតិទេ ពីព្រោះអ្នកដែលរស់នៅលើទឹកដីប្រទេសកម្ពុជា គឺជាចំណាប់ខ្មាំងរបស់ ហ៊ុន សែន សូម្បីតែព្រះមហាក្សត្ររបស់យើង គឺជាចំណាប់ខ្មាំងរបស់ ហ៊ុន សែន ។ ដូច្នេះលោក(ព្រះមហាក្សត្រ) អត់ហ៊ានធ្វើអ្វីទេ លោកខ្លាច ហ៊ុន សែន លោកចង់រក្សារាជបល្ល័ងលោក ដូច្នេះយើងទុកព្រះអង្គមួយអន្លើទៅ យើងមិនអាចរំពឹងព្រះមហាក្សត្រដែលជាអាយ៉ងរបស់ ហ៊ុន សែន ទេ»។

រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៧ បានចែងថា «ព្រះមហាក្សត្រកម្ពុជា ទ្រង់គ្រងរាជសម្បត្តិ ប៉ុន្តែទ្រង់មិនអាចកាន់អំណាចឡើយ ។ ព្រះមហាក្សត្រទ្រង់ជាព្រះប្រមុខរដ្ឋមួយជីវិត។ អង្គព្រះមហាក្សត្រ មិនអាចនរណារំលោភបំពានបានឡើយ»។

ច្បាប់ស្តីពីវិសោធនកម្មក្រមព្រហ្មទណ្ឌ ដែលចុះហត្ថលេខាដោយសម្ដេច សាយ ឈុំ ប្រមុខរដ្ឋស្តីទី និងជាប្រធានព្រឹទ្ធសភា កាលពីថ្ងៃទី២៧ កុម្ភៈ ឆ្នាំ២០១៨ ត្រង់មាត្រា ៤៣៧ (ស្ទួន) ពាក់ព័ន្ធនឹងបទប្រមាថចំពោះអង្គព្រះមហាក្សត្រ បានចែងថា៖ ការប្រមាថ គឺជាវាចារ សំណេរ គំនូរ ឬវត្ថុដែលប៉ះពាល់សេចក្តីថ្លៃថ្នូរនៃបុគ្គល។ ការប្រមាថចំពោះអង្គព្រះមហាក្សត្រ ត្រូវផ្ដន្ទាទោសដាក់ពន្ធនាគារពី ១ ទៅ ៥ឆ្នាំ និងពិន័យជាប្រាក់ពី ២លានរៀល ទៅ១០លានរៀល។ នីតីបុគ្គល ដែលសំដៅលើអង្គភាព ស្ថាប័ន អង្គការ ឬក្រុមហ៊ុន ជាដើម អាចនឹងត្រូវពិន័យជាប្រាក់ពី ១០លានរៀល ទៅ៥០លានរៀល ព្រមទាំងទោសផ្សេងៗទៀត ក្នុងករណីប្រមាថព្រះមហាក្សត្រ…។

គិតមកដល់ពេលនេះ លោក សម រង្ស៊ី មេដឹកនាំអតីតបក្សប្រឆាំង ដែលកំពុងនិរទេសក្រៅប្រទេស បានរងបណ្តឹងពីសម្ដេច ហ៊ុន សែន និងមន្ត្រីរដ្ឋាភិបាល មិនតិចជាង១០នោះទេ ដោយក្នុងនោះ បណ្តឹង៨ ត្រូវបានជំនុំជម្រះរួចហើយ ខណៈបណ្តឹង២ទៀត កំពុងស្ថិតក្នុងនីតិវិធីរបស់តុលាការ។ បណ្ដឹងទាំង៨ ដែលតុលាការកាត់ទោសរួចហើយនោះ តម្រូវឲ្យលោក សម រង្ស៊ី ជាប់គុកប្រមាណ១៣ឆ្នាំ និងបង់ប្រាក់ជាង១លានដុល្លារ៕