អ្នកស្រី មូរ សុខហួរ៖ ខ្ញុំ បានលាកូនចៅរួចហើយ [សម្រាប់មាតុភូមិនិវត្ត]

ជាតិ

នយោបាយជាតិ

អ្នកស្រី មូរ សុខហួរ៖ ខ្ញុំ បានលាកូនចៅរួចហើយ [សម្រាប់មាតុភូមិនិវត្ត]

15, Oct 2019 , 5:59 pm

រូបភាព

រូបពី AFP

ដោយ: ថ្មីៗ

អ្នកស្រី មូរ សុខហូរ អនុប្រធាននៃអតីតគណបក្សសង្គ្រោះជាតិ និងបច្ចុប្បន្នត្រូវបានតែងតាំងជាប្រធានគណៈកម្មការរៀបចំមាតុភូមិនិវត្ត បញ្ជាក់ជំហរជាថ្មីថា លោក សម រង្ស៊ី និងថ្នាក់ដឹកនាំក្រុមប្រឆាំង នឹងមកកម្ពុជានៅតាមការគ្រោងទុក នៅថ្ងៃទី៩ ខែវិច្ឆិកា ឆ្នាំ២០១៩។

លោកជំទាវ លាកូនលាចៅហើយឬនៅ ត្រៀមខ្លួនហើយឬនៅ ដើម្បីត្រឡប់ទៅប្រទេសកម្ពុជាវិញ? អ្នកស្រី មូរ សុខហួរ ឆ្លើយទៅលោក ជុន ច័ន្ទបុត្រ ក្នុងកិច្ចសម្ភាសរបស់វិទ្យុអាស៊ីសេរី នៅថ្ងៃទី១៥ ខែតុលា ឆ្នាំ២០១៩ យ៉ាងដូច្នេះថា៖«ខ្ញុំ បានលាកូនលាចៅខ្ញុំហើយ ហើយអារម្មណ៍ខ្ញុំស្ងប់ហើយ ស្ងប់ឈានទៅប្រទេសជាតិយើងវិញ ស្ងប់ដើម្បីបន្តបម្រើប្រជាពលរដ្ឋយើងវិញ។ អ្វីដែលខ្ញុំបានប្រាប់ទៅកូនខ្ញុំ ហើយចៅខ្ញុំទាំងពីរ គឺឈាមយើង ឈាមកូន ឈាមចៅ គឺឈាមខ្មែរ...»។

លោក អ៊ូ ច័ន្ទរ័ត្ន អតីតតំណាងរាស្ត្រគណបក្សប្រឆាំង ដែលកំពុងរស់នៅក្នុងស្រុក ប្រាប់សារព័ត៌មានថ្មីៗ តាមទូរស័ព្ទ នៅរសៀលថ្ងៃទី១៥ ខែតុលា ថា កូនចៅរបស់អ្នកស្រី មូរ សុខហូរ សុទ្ធតែរស់នៅឯបរទេស។ លោក បញ្ជាក់ថា៖«កូនចៅគាត់ ជាកូនកាត់ ដូច្នេះ គ្មានអ្នកណារស់នៅស្រុកខ្មែរទេ។ តាមខ្ញុំដឹង គឺនៅអាមេរិក»។

យ៉ាងណាក៏ដោយ លោក អ៊ូ ច័ន្ទរ័ត្ន នៅតែមិនទាន់ជឿថា លោក សម រង្ស៊ី និង ថ្នាក់ដឹកនាំក្រុមប្រឆាំង ហ៊ានមកកម្ពុជាវិញ។ លោក ថ្លែងថា៖«បើគាត់មកតំបន់អាស៊ី គឺអាច តែបើមកកម្ពុជា ខ្ញុំ មិនឃើញថា គាត់មានលទ្ធភាពនោះទេ»។

អតីតតំណាងរាស្ត្របក្សប្រឆាំងរូបនេះ យល់ថា ការរៀបចំផែនការអំពីការធ្វើមាតុភូមិនិវិត្តនេះ នៅមិនទាន់ច្បាស់លាស់នោះទេ។ លោក លើកឡើងថា៖«យើង សួរអ្នកគាំទ្រនៅក្រៅប្រទេស ដូចនៅកូរ៉េ ជាដើម ថាពួកគាត់ ហ៊ានបោះបង់ការងារ ដើម្បីមកកម្ពុជាទេ? ខ្ញុំ ថាពួកគាត់ ត្រូវពិចារណា។ សូម្បីតែសកម្មជនឆ្នើមៗ ក៏ត្រូវសួរគ្នាដែរ មិនទាន់ទុកចិត្តគ្នាទេថា អ្នកណាមក អ្នកណាមិនមក»។

កាលពីថ្ងៃទី២ ខែតុលា លោក សម រង្ស៊ី បានបញ្ជាក់ជាថ្មីតាមវីដេអូឃ្លីប ពីការប្តេជ្ញាចិត្តក្នុងការវិលមកកម្ពុជា ដោយគ្មានការប្រែប្រួលឡើយ។ លោក និងថ្នាក់ដឹកនាំបក្សប្រឆាំង៨នាក់ផ្សេងទៀត ត្រូវចោទពីបទឧបឃាត (ការរៀបចំគម្រោងធ្វើរដ្ឋប្រហារ) ខណៈអ្នកគាំទ្រក្នុងប្រទេស ត្រូវបានចោទប្រកាន់ជាហូរហែពីបទរួមគំនិតក្បត់ជាតិ (ចូលរួមគាំទ្រគម្រោងធ្វើរដ្ឋប្រហារ)៕