អន្តរជាតិ
យោធាមីយ៉ាន់ម៉ា ឡើងគ្រប់គ្រងអំណាចជាថ្មី ក្នុងរដ្ឋប្រហារមិនបង្ហូរឈាម
01, Feb 2021 , 10:07 am
អគ្គបញ្ជាការកងទ័ពមីយ៉ាន់ម៉ា ឧត្តសេនីយ៍ មីន អ៊ុងឡាំង ។ រូបថត AFP
×![]()
ការិយាល័យប្រធានាធិបតីមីយ៉ាន់ម៉ា នៅថ្ងៃទី១ ខែកុម្ភៈ បានចេញសេចក្ដីថ្លែងការណ៍មួយស្ដីពីការផ្ទេរអំណាចឱ្យប្រមុខយោធា។ សេចក្ដីថ្លែងការណ៍នេះ ធ្វើឡើងក្រោយមេដឹកនាំប្រទេសមានលោកស្រី អ៊ុងសាន ស៊ូជី ប្រធានាធិបតី Win Myint និងសមាជិកសំខាន់ៗរបស់បក្សសម្ពន្ធជាតិដើម្បីប្រជាធិបតេយ្យ (NLD) ត្រូវចាប់ខ្លួនដោយយោធា។
ក្នុងសេចក្ដីថ្លែងការណ៍ដែលផ្សាយលើទូរទស្សន៍គ្រប់គ្រងដោយយោធា អំណាចរដ្ឋទាំងអស់ ត្រូវផ្ទេរឱ្យអគ្គបញ្ជាការកងទ័ពឧត្តមសេនីយ៍ មីន អ៊ុងឡាំង ។ ជាមួយគ្នានេះ មីយ៉ាន់ម៉ា ត្រូវស្ថិតក្រោមភាពអាសន្នមួយឆ្នាំ។ ប្រធានាធិបតីបណ្ដោះអាសន្ន Myint Swe ជាអ្នកចុះហត្ថលេខាលើសេចក្ដីប្រកាសនេះ។
បើតាមទីភ្នាក់ងារព័ត៌មាន AFP សេចក្ដីថ្លែងការណ៍ខាងលើបញ្ជាក់ ការត្រួតត្រាប្រទេសដោយយោធា ជារឿងចាំបាច់ដើម្បីថែរក្សាស្ថិរភាពប្រទេស។ យោធាក៏ឆ្លៀតចោទគណៈកម្មការរៀបចំការបោះឆ្នោតថា មិនព្រមដោះស្រាយភាពមិនប្រក្រតីដ៏ធំក្នុងការបោះឆ្នោតឆ្នាំមុនទៀតផង។
ការមិនពេញចិត្តនឹងការបោះឆ្នោតខែវិច្ឆិកា ឆ្នាំ២០២០ ដែលយោធាចោទថា មានការក្លែងបន្លំជាច្រើន ជាមូលហេតុនៃការដណ្ដើមអំណាចនេះ។ កាលពីសប្ដាហ៍មុន ក្រុមយោធាបានព្រមានពីការធ្វើរដ្ឋប្រហារជាបន្តបន្ទាប់បើអ្វីដែលខ្លួនមិនពេញចិត្ត មិនត្រូវបានដោះស្រាយទេនោះ មុននឹងការិយាល័យអគ្គបញ្ជាការកងទ័ពចេញមុខច្រានចោលវិញ។ រំលងពីរថ្ងៃ ការដណ្ដើមអំណាចក៏កើតមានតែម្ដងនៅថ្ងៃទី១ ខែកុម្ភៈ។
ក្រោយការឃាត់ខ្លួនលោកស្រី សូជី ដោយយោធា អាមេរិក និងអូស្ត្រាលី ក៏ចេញមុខប្រតិកម្ម និងទាមទារឲ្យដោះលែងលោកស្រីជាបន្ទាន់។ ចំណែកនៅរដ្ឋធានីណៃពិដោវិញ ទាហានមានវត្តមានតាមដងវិថី និងអាគាររដ្ឋសំខាន់ៗ រីឯប្រព័ន្ធទូរសព្ទត្រូវបានកាត់ផ្តាច់។
«យើងទាមទារឲ្យក្រុមយោធា គោរពនីតិរដ្ឋ ដោះស្រាយជម្លោះតាមយន្តការច្បាប់ និងដោះលែងជាបន្ទាន់ថ្នាក់ដឹកនាំស៊ីវិល និងអ្នកដទៃឯទៀតដែលត្រូវបានឃុំខ្លួនដោយខុសច្បាប់»។ នេះជាសេចក្តីថ្លែងការណ៍របស់រដ្ឋមន្ត្រីការបរទេសអូស្ត្រាលី ម៉ារីស ផេន ។ បន្ថែមពីនេះ អូស្ត្រាលីបញ្ជាកជំហរថាខ្លួនគាំទ្រការជួបប្រជុំរដ្ឋសភា ដែលស្របទៅនឹងលទ្ធផលនៃការបោះឆ្នោតខែវិច្ឆិកា ឆ្នាំ២០២០។
អាមេរិក តាមរយៈសេចក្តីថ្លែងការណ៍សេតវិមាន ក៏ទាមទារឲ្យដោះលែងលោកស្រីស៊ូជីផងដែរ។ បន្ថែមពីនេះ អាមេរិក ក៏ព្រមានពីការឆ្លើយតបប្រឆាំងទៅនឹងអ្នកដែលទទួលខុសត្រូវចំពោះស្ថានភាពនយោបាយថ្មីនេះដែរ បើមិនមានការផ្លាស់ប្តូរមកស្ថានការណ៍ដើម។
នៅខែវិច្ឆិកា ឆ្នាំ២០២០ មីយ៉ាន់ម៉ាបោះឆ្នោតលក្ខណៈប្រជាធិបតេយ្យជាលើកទីពីរ បន្ទាប់ពីស្ថិតក្រោមការគ្រប់គ្រងរបស់ក្រុមយោធារយៈពេល៤៩ឆ្នាំ។ លទ្ធផលនៃការបោះឆ្នោតបង្ហាញថាបក្សសម្ព័ន្ធជាតិដើម្បីប្រជាធិបតេយ្យទទួលអាសនៈចំនួន៣៩៦ ក្នុងចំណោម៤១២ ដែលបើកផ្លូវឲ្យបក្សលោកស្រីបង្កើតរដ្ឋាភិបាលបានដោយងាយ៕
Tag:
មីយ៉ាន់ម៉ា
អ៊ុងសាន ស៊ូជី
© រក្សាសិទ្ធិដោយ thmeythmey.com
