ផ្អែកលើករបាយការណ៍ស្តីពីសម្ភារផ្ទាល់ខ្លួន បានបង្ហាញថា ពលរដ្ឋជាង៣៦ម៉ឺនគ្រួសារ ឬ១០.១៤ភាគរយក្នុងចំណោមគ្រួសារទាំងអស់ មានរថយន្តសម្រាប់ប្រើប្រាស់ផ្ទាល់ខ្លួន ឬរថយន្តដឹកទំនិញធុនតូច/ធុនធំ។

 

ក្នុងចំណោមនោះ គ្រួសារនៅទីប្រជុំជន ១៨.១៤ភាគរយ មានរថយន្តសម្រាប់ប្រើប្រាស់ផ្ទាល់ខ្លួន ឬរថយន្តដឹកទំនិញធុនតូច/ធុនធំ រីឯជនបទ មាន៥.១៧ភាគរយ។

 

លទ្ធផលជំរឿន បានបញ្ជាក់ថា ម៉ូតូនៅតែជាមធ្យោបាយធ្វើដំណើរដ៏ពេញនិយមជាងគេនៅកម្ពុជា ដោយមាន៨០.១១ភាគរយក្នុងចំណោមគ្រួសារសរុប។ នៅទីប្រជុំជន គ្រួសារ ៨៥.១ភាគរយ មានម៉ូតូប្រើប្រាស់ផ្ទាល់ខ្លួន រីឯនៅជនបទមាន៧៧.១៣ភាគរយ។

 

ចំណែកកង់វិញ ៤៩.២ភាគរយនៃគ្រួសារនៅទីប្រជុំ និង៥៨.៨ភាគរយនៃគ្រួសារនៅជនបទ  មានកង់ប្រើប្រាស់ជាកម្មសិទ្ធិផ្ទាល់ខ្លួន។

 

សម្ភារប្រើប្រាស់ផ្សេងទៀត ដូចជា ទូក/កាណូត ត្រាក់ទ័រធុនតូច/ធំ គោយន្ត ក៏ត្រូវបានធ្វើជំរឿនផងដែរ។

 

តាមរបាយការណ៍ជំរឿន កម្ពុជាមានពលរដ្ឋជាង១៥.៥៥លាននាក់ ដោយបុរសមានជាង៧.៥៧លាននាក់ និងស្ត្រីជិត៨លាននាក់។ ក្នុងនោះដែរ គ្រួសារនៅកម្ពុជាមានជាង៣.៥៥លានគ្រួសារ ដោយក្នុងនោះជាង១.៣២លានគ្រួសារនៅទីប្រជុំជន និងជាង២.២២លានគ្រួសារនៅទីជនបទ៕