កីឡាជាតិ
ជាតិ
NOCC នឹងរៀបចំព្រឹត្តិការណ៍ «ជិះកង់នៃក្តីស្រឡាញ់» ដើម្បីប្តូរការគិតយុវវ័យថ្ងៃ១៤ កុម្ភៈ 03, Feb 2021 , 8:59 am
× គណៈកម្មាធិការជាតិអូឡាំពិកកម្ពុជា(NOCC) និងក្រសួងទេសចរណ៍សហការជាមួយសហព័ន្ធខ្មែរកីឡាទោចក្រយាន គ្រោងរៀបចំព្រឹត្តិការណ៍កីឡាទេសចរណ៍តំបន់ឆ្នេរ ដែលឱ្យឈ្មោះថា «ជិះកង់នៃក្តីស្រឡាញ់» ថ្ងៃទី១៤ ខែកុម្ភៈ ឆ្នាំ២០២១។ កម្មវិធីនេះបង្កើតឡើង ដើម្បីយកកីឡាធ្វើជាមធ្យោបាយផ្លាស់ប្ដូរឥរិយាបទយុវវ័យនៅថ្ងៃនៃសេចក្តីស្រឡាញ់ និងបង្ហាញសក្តានុពលទេសចរណ៍ក្នុងខេត្តព្រះសីហនុ។
ព្រឹត្តិការណ៍នេះ នឹងមានវិញ្ញាសាចំនួន៣ក្នុងកីឡាជិះកង់ដើម្បីដាក់ឱ្យប្រជែងគ្នា។ ទី១ សម្រាប់អ្នកជិះកង់អាជីពអាចចូលរួមប្រណាំងកង់ភ្នំចម្ងាយ៤០គីឡូម៉ែត្រ ដែលចាប់ផ្ដើមចេញដំណើរពីឆ្នេរអូឈើទាលឆ្ពោះទៅឆ្នេររាម ហើយត្រឡប់មកឆ្នេរអូឈើទាលវិញ។ ទី២ ប្រភេទ Fun Ride គឺជាការជិះកង់កម្សាន្តឆ្នេរសមុទ្រថ្មី ចម្ងាយ២៥គីឡូម៉ែត្រ ដោយចេញដំណើរពីឆ្នេរអូឈើទាលឆ្ពោះទីអូរត្រេះហើយត្រឡប់មកវិញ។ និងទី៣ Family Couple Ride គឺការជិះកង់ជាលក្ខណគ្រួសារ និងគូស្នេហ៍ចម្ងាយ១៥គីឡូម៉ែត្រ តាមផ្លូវក្នុងទីក្រុងថ្មី និងឆ្នេរសមុទ្រ។
គោលបំណងក្នុងការបង្កើតកម្មវិធីកីឡា «ជិះកង់នៃក្តីស្រឡាញ់» នេះឡើង លោក វ៉ាត់ ចំរើនអគ្គលេខាធិការនៃគណៈកម្មាធិការជាតិអូឡាំពិកកម្ពុជាលើកឡើងថា គឺដើម្បីចង់ផ្លាស់ប្តូរឥរិយាបទរបស់យុវវ័យដែលពួកគេយល់ច្រឡំនៃអត្ថន័យនៃបុណ្យនៃក្តីស្រឡាញ់។
«កន្លងមកមានយុវវ័យមួយចំនួនបានយល់ច្រឡំថាថ្ងៃបុណ្យនៃសេចក្ដីស្រឡាញ់ គឺជាពេលដែលត្រូវលះបង់នូវព្រហ្មចារីយ៍ដល់គូស្នេហ៍របស់ខ្លួន។ ពេលនេះក្រសួងទេសចរណ៍ និង NOCC បង្កើសកម្មភាពកីឡាមួយ ដើម្បីផ្លាស់ប្ដូរឥរិយាបទដែលពួកគេយល់ច្រឡំកន្លងមក ក៏ដូចជានាំយុវជន និងមហាជនបានចូលរួមក្នុងសកម្មភាពកីឡា ដើម្បីសុខភាព មិត្តភាព និងសាមគ្គីភាព និងលើកកម្ពស់ដល់វិស័យទេសចរណ៍នៅតំបន់ឆ្នេរសមុទ្រទៀតផង»។ នេះជាការបញ្ជាក់របស់លោកវ៉ាត់ ចំរើន តាមរយៈក្នុងសេចក្តីប្រកាសរបស់ NOCC នៅថ្ងៃទី២ ខែកុម្ភៈនេះ។
លោក វ៉ាត់ ចំរើន បន្ថែមថាព្រឹត្តិការណ៍នេះ ក៏ដើម្បីជួយផ្សព្វផ្សាពីសក្តានុពលទេសចរណ៍ និងប្រតិបត្តិករទេសចរក្នុងខេត្តព្រះសីហនុ ដែលរងផលប៉ះពាល់ដោយសារវិបត្តិ COVID-19 និងវត្តមានជនជាតិចិនដ៏ច្រើនលើសលប់ កាលពីពេលកន្លងទៅ។
សម្រាប់ព្រឹត្តិការណ៍នេះគណៈកម្មការរៀបចំ នឹងរៀបចំកន្លែងបោះតង់តាមឆ្នេរសមុទ្រសម្រាប់អ្នកចូលរួមទាំងអស់ ដោយធានាសុវត្ថិភាព សណ្ដាប់ធ្នាប់ និងអនាម័យផងដែរ។
នេះមិនមែនជាលើកទី១ឡើយ ដែល NOCC សហការជាមួយក្រសួងទេសចរណ៍រៀបចំព្រឹត្តិការណ៍កីឡាក្នុងខេត្តជាប់មាត់សមុទ្រ ពោលគឺភាគីទាំងពីរធ្លាប់រៀបចំព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិ ប្រណាំងកង់អន្តរជាតិ និងព្រឹត្តិការណ៍កីឡាជាច្រើន ពិសេសបុណ្យសមុទ្រ៕
© រក្សាសិទ្ធិដោយ thmeythmey.com