អន្តរជាតិ
ប្រជាជនមីយ៉ាន់ម៉ា៣នាក់ត្រូវចាប់ខ្លួន បន្ទាប់ពីបាតុកម្មប្រឆាំងក្រុមយោធា
04, Feb 2021 , 3:15 pm
ប្រជាជនមីយ៉ាន់ម៉ា បាតុកម្មនៅក្នុងទីក្រុងMandalay។ រូបភាព៖ AFP
×![]()
ដោយ: ធៀន ភារិន្ទ
ប្រជាជនមីយ៉ាន់ម៉ាមួយក្រុម ដែលមានគ្នាប្រមាណ ២០នាក់ នៅថ្ងៃទី៤ ខែកុម្ភៈ បានលើកបដា និងស្រែកជំទាស់នឹងរដ្ឋប្រហារយោធា នៅក្នុងទីក្រុង Mandalay ដែលជាទីក្រុងធំទីពីររបស់ប្រទេស។ យ៉ាងហោចណាស់ មនុស្ស ៣នាក់ត្រូវបានចាប់ខ្លួន បន្ទាប់ពីបាតុកម្មនេះ។ 
ជាលើកទីមួយ ចាប់តាំងពីរដ្ឋប្រហារយោធា ប្រជាជនមីយ៉ាន់ម៉ាប្រមាណ ២០នាក់ បានធ្វើបាតុកម្មនៅតាមដងផ្លូវនៅក្នុងតំបន់មួយក្នុងទីក្រុង Mandalay ដើម្បីប្រឆាំងនឹងការដណ្តើមអំណាចរបស់ក្រុមយោធា ពីរដ្ឋាភិបាលស៊ីវិល។
«ដោះលែងមេដឹកនាំរបស់យើងពេលនេះ»។ ប្រជាជនមីយ៉ាន់ម៉ាទាំងនោះ បានស្រែកបែបនេះ ជាមួយនឹងដៃកាន់បដា នៅខាងក្រៅសកលវិទ្យាល័យវេជ្ជសាស្ត្រ Mandalay។
មនុស្សយ៉ាងហោចណាស់ចំនួន ៣នាក់ត្រូវបានខ្លួន បន្ទាប់ពីបាតុកម្មប្រឆាំងនឹងរដ្ឋប្រហារ។ ការចាប់ខ្លួននេះ ត្រូវបានបញ្ជាក់ដោយសកម្មជននិស្សិត ដែលមានមូលដ្ឋាននៅក្នុងទីក្រុង Mandalay និងទីក្រុងយ៉ាំងហ្គោន។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។
កន្លងទៅ ប្រជាជននៅក្នុងទីក្រុងយ៉ាំងហ្គោន បានគោះខ្ទះ និងឆ្នាំង ដើម្បីបង្ហាញការមិនពេញចិត្តរបស់ខ្លួនលើការដឹកនាំរបស់យោធាមីយ៉ាន់ម៉ា ខណៈពេលក្រុមគ្រូពេទ្យច្រើនជាង ១ពាន់នាក់ នៅមន្ទីរពេទ្យចំនួន ៧០ កន្លែង ក៏ធ្វើកូដកម្ម មិនធ្វើការផងដែរ។ ក្រៅពីនោះ ប្រជាជនមីយ៉ាន់ម៉ាមួយចំនួន បានបំផុសយុទ្ធនាការឈប់ទិញទំនិញ ដែលផលិតដោយក្រុមហ៊ុនទាក់ទិននឹងយោធាថែមទៀត។
សូមបញ្ជាក់ថា បន្ទាប់ពីធ្វើរដ្ឋប្រហារយោធាលើរដ្ឋាភិបាលស៊ីវិល ក្រុមយោធា បានរងសម្ពាធពីសហគមន៍អន្តរជាតិយ៉ាងខ្លាំង។ អាមេរិក អឺរ៉ុប អង់គ្លេស សុទ្ធតែទាមទារឱ្យដោះលែងលោកស្រី អ៊ុងសាន ស៊ូជី, ប្រធានាធិបតី លោក Win Myint និងអ្នកជាប់ឃុំផ្សេងទៀត។ ចំណែក លោក អាន់តូនីញ៉ូ ហ្គូតេរ៉េស បានអះអាងថា លោកនឹងធ្វើគ្រប់យ៉ាង ដើម្បីដាក់សម្ពាធឱ្យកាន់តែធ្ងន់លើក្រុមយោធា ដែលធ្វើរដ្ឋប្រហារលើរដ្ឋាភិបាលស៊ីវិល៕
Tag:
មីយ៉ាន់ម៉ា
© រក្សាសិទ្ធិដោយ thmeythmey.com
