ជាតិ
នយោបាយជាតិ
សម្ដេច ស ខេង បញ្ជាឱ្យអភិបាលរាជធានី-ខេត្ត ពិនិត្យមើលអាកប្បកិរិយាស្មៀនឃុំ-សង្កាត់ ជាបន្ទាន់ 05, Feb 2021 , 11:11 am
× ភ្នំពេញ៖ រដ្ឋមន្ត្រីក្រសួងមហាផ្ទៃ សម្ដេច ស ខេង បញ្ជាឱ្យអភិបាលរាជធានី-ខេត្ត ត្រួតពិនិត្យលើអាកប្បកិរិយាស្មៀនឃុំ-សង្កាត់ជាបន្ទាន់ ចំពោះការបំពេញភារកិច្ចបម្រើប្រជាពលរដ្ឋតាមមូលដ្ឋាន។ សម្ដេច ស ខេង ចេញបញ្ជាបែបនេះ នៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២០ និងលើកទិសដៅការងារ ឆ្នាំ២០២១ នារសៀលថ្ងៃទី៤ ខែកុម្ភៈ ឆ្នាំ២០២១ នៅទីស្តីការក្រសួងមហាផ្ទៃ។
សម្ដេច ស ខេង បានទទួលពាក្យបណ្ដឹងពីពលរដ្ឋជាបន្តបន្ទាប់ តាមរយៈហ្វេសប៊ុកផ្លូវការខ្លួន ជុំវិញការបំពេញភារកិច្ចរបស់ស្មៀនឃុំ-សង្កាត់។ ព័ត៌មានដែលសម្ដេច ស ខេង ទទួលបាននោះ គឺស្មៀនឃុំ-សង្កាត់ មួយចំនួន មានឫកពាមិនសមរម្យ ខណៈពេលដែលប្រជាពលរដ្ឋទៅទទួលយកសេវាសាធារណៈនៅក្នុងមូលដ្ឋានរបស់ពួកគេ។
«សូមផ្ដាំឲ្យមើលស្មៀន ផ្តាំពីទីកន្លែងនេះទៅ ឯកឧត្តម លោកជំទាវ អភិបាលរាជធានី-ខេត្ត ព្រោះស្មៀនខ្លះគាត់ឬកធំសម្បើមណាស់។ យន្ដការនៅឃុំ-សង្កាត់ ហ្នឹង គឺមានសិទ្ធិរឹងមាំដោយសារបោះឆ្នោតតាមគោលការណ៍ប្រជាធិបតេយ្យ។ អ៊ីចឹងមានក្រុមប្រឹក្សា មានមេឃុំ មានជំទប់ ក្រៅពីហ្នឹងមានគណៈកម្មាធិការ មន្ដ្រីផ្សេងៗទៀត ហើយស្មៀនមិនមែនជាមន្ដ្រីនយោបាយទេ។ មន្ដ្រីនយោបាយ គឺក្រុមប្រឹក្សា បោះឆ្នោតដោយប្រជាជនផ្ទាល់»។ នេះជាបញ្ជារបស់រដ្ឋមន្ត្រីក្រសួងមហាផ្ទៃ។
លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា យល់ឃើញថា ក្រៅពីពិនិត្យមើលអត្តចរិតស្មៀន ក៏ត្រូវតាមដានលើសកម្មភាពពួកគេផងដែរ។ ត្រង់នេះ លោក សន ជ័យ ចង់ពន្យល់ថា ស្មៀនខ្លះ មានអំណាចធំជាងមេឃុំ និងចៅសង្កាត់ទៀត ។ បានន័យថា នៅពេលមេឃុំចុះហត្ថលេខាលិខិតស្នាមអ្វីមួយហើយ បែរជាស្មៀនមិនព្រមបោះត្រាលើលិខិតស្នាមនោះទៅវិញ។ សម្រាប់សកម្មភាពបែបនេះ ត្រូវបានលោក សន ជ័យ សង្កត់ធ្ងន់ថា ស្មៀនខ្លះ អាចរកលុយតាមរយៈការបោះត្រាលើលិខិតស្នាមអ្វីមួយ ដែលពលរដ្ឋស្នើសុំ ឬគម្រោងវិនិយោគមូលដ្ឋានទៀតផង។
ថ្លែងប្រាប់សារព័ត៌មានថ្មីៗ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជារូបនេះ បាននិយាយដូច្នេះថា៖« នៅពេលដែលពលរដ្ឋមករកសេវានៅកន្លែងឃុំ-សង្កាត់ ដែលជាសេវាផ្ដល់អំណាច ផ្ដល់សិទ្ធិដោយក្រសួងមហាផ្ទៃ ជាពិសេសដូចជា(សេវា)អត្រានុកូលដ្ឋានអីជាដើម នៅជាបញ្ហានៅឡើយ។ (បញ្ហា) រឿងថ្លៃសេវាមួយចំនួន ដែលមិនតម្រូវឱ្យមានការបង់ថ្លៃ តែយើងនៅតែឮថាពលរដ្ឋនៅតែមានការបង់លុយ។ អ៊ីចឹងសួរថាតើការបង់លុយនេះ វាបណ្ដាលមកពីអ្នកណា មកពីស្មៀន(ទារលុយ) ឬបណ្ដាលមកពីអី? ហើយរឿងខ្លះទៀត ថាតើការបោះត្រារបស់ស្មៀនហ្នឹង មានឥទ្ធិពល ដែលនាំឱ្យពលរដ្ឋគាត់បង្ខំចិត្តបង់លុយកាក់ដែរឬទេ? »។
ត្រង់ចំណុចនេះ លោក សន ជ័យ ស្នើឱ្យក្រសួងមហាផ្ទៃពិនិត្យមើលឥទ្ធិពលស្មៀន លើចំណុច៣យ៉ាង ទី១ គឺទំនាក់ទំនងរវាងស្មៀន ជាមួយនឹងមេឃុំ , ទី២ ទំនាក់ទំនងស្មៀនជាមួយអ្នកម៉ៅការ ក្នុងគម្រោងអភិវឌ្ឍន៍ភូមិឃុំ និងទី៣ ទំនាក់ទំនងស្មៀនជាមួយនឹងពលរដ្ឋ ដើម្បីចាត់វិធានការលុបបំបាត់អំណាចស្មៀន ដែលធ្វើឱ្យប៉ះពាល់ផលប្រយោជន៍មូលដ្ឋាននេះ។
ស្មៀនឃុំ-សង្កាត់ គឺជាមន្ដ្រីមុខងារសាធារណៈប៉ុណ្ណោះ ដូច្នេះក្រសួងមហាផ្ទៃ ក៏មានសិទ្ធិដក ឬដាក់មន្ដ្រីស្មៀនដែរ។ ប៉ុន្ដែនៅផ្នែកខ្លះ ក្រុមប្រឹក្សា ក៏ជាអ្នកតែងតាំងស្មៀន ហើយស្មៀន ត្រូវធ្វើការងារផ្ទាល់ជាមួយក្រុមប្រឹក្សា។ នេះបើតាមសម្ដេច ស ខេង។
ដ្បិតមានស្មៀនខ្លះ មានអត្តចរិតមិនល្អក្តី ប៉ុន្តែក៏មានស្មៀននៅតំបន់ផ្សេងទៀត ប្រកបការងារដោយក្រមសីលធម៌បម្រើប្រយោជន៍ដល់ប្រជាពលរដ្ឋដែរ។ រដ្ឋមន្ត្រីមហាផ្ទៃ ក៏ឆ្លៀតលើកទឹកចិត្តចំពោះស្មៀនឃុំ-សង្កាត់ទាំងនោះ ឱ្យបន្តខិតខំបំពេញការងារបម្រើ និងដោះស្រាយបញ្ហាជូនពលរដ្ឋតាមមូលដ្ឋានថែមទៀត៕
© រក្សាសិទ្ធិដោយ thmeythmey.com