COVID-19
ជាតិ
២នាក់ទៀតមកពីប្រទេសឥណ្ឌូនេស៊ី និងស្វីសមានកូវីដ-១៩ ខណៈម្នាក់មកពីអាមេរិកជាសះស្បើយ 06, Feb 2021 , 10:18 am
× ភ្នំពេញ៖ ក្រសួងសុខាភិបាលនាថ្ងៃទី៦ ខែកុម្ភៈ បានប្រកាសរកឃើញមនុស្ស២នាក់ទៀតឆ្លងកូវីដ-១៩។ ពួកគេម្នាក់ជាធ្វើដំណើរមកពីប្រទេសឥណ្ឌូនេស៊ី និងម្នាក់ទៀតមកពីប្រទេសស្វីស។ ទន្ទឹមនេះអ្នកជំងឺមកពីប្រទេសអាមេរិកបានជាសះស្បើយពីជំងឺកូវីដ-១៩។
ក្រសួងសុខាភិបាលបានបញ្ជាក់ថា មនុស្ស២នាក់ដែលឆ្លងជំងឺកូវីដ-១៩ នៅថ្ងៃនេះ ជាបុរសជនជាតិឥណ្ឌូនេស៊ី អាយុ៣១ឆ្នាំ មានអាស័យដ្ឋាននៅសង្កាត់ទន្លេបាសាក់ ខណ្ឌចំការមន រាជធានីភ្នំពេញបានធ្វើដំណើរពីប្រទេឥណ្ឌូនេស៊ី ហើយចូលមកកម្ពុជានៅថ្ងៃទី២៣ ខែមករា។ ចំណែកអ្នកជំងឺម្នាក់ទៀតជាស្ត្រីជនជាតិខ្មែរអាយុ៥០ឆ្នាំ ស្នាក់នៅក្នុងក្រុងតាខ្មៅ ខេត្តកណ្តាល បានធ្វើដំណើរមកពីប្រទេសស្វីស ហើយចូលមកកម្ពុជានៅថ្ងៃទី៤ ខែកុម្ភៈ។
បច្ចុប្បន្នអ្នកជំងឺទាំងពីរនាក់នោះ កំពុងសម្រាកព្យាបាលនៅមជ្ឈមណ្ឌលកំចាត់រោគរបេង និងហង់សិន។ ចំពោះអ្នករួមដំណើរជាមួយនឹងអ្នកជំងឺទាំងពីរនាក់នេះសរុបចំនួន១២៣នាក់ បានធ្វើតេស្ត ឃើញថាអវិជ្ជមានទាំងអស់ ប៉ុន្តែពួកគេត្រូវបន្តធ្វើចត្តាឡីស័កតាមសណ្ឋាគារឲ្យគ្រប់១៤ថ្ងៃសិន។
ចំពោះអ្នកជាសះស្បើយនៅថ្ងៃនេះ ជាបុរសជនជាតិខ្មែរអាយុ៧០ឆ្នាំ ស្នាក់នៅសង្កាត់ផ្សារដេប៉ូ ខណ្ឌទួលគោក រាជធានីភ្នំពេញ បានធ្វើដំណើរមកពីប្រទេសអាមេរិក ហើយចូលមកម្ពុជានៅថ្ងៃទី២០ ខែមករា។
មកដល់ពេលនេះ កម្ពុជាមានកូវីដ-១៩ ចំនួន៤៧២ករណី ដោយ៤៥៣ករណីសះស្បើយ។ ក្នុងចំណោមពលករមកពីថៃ មាន៨៧នាក់វិជ្ជមាន ហើយ៨០នាក់បានជាសះស្បើយ៕
© រក្សាសិទ្ធិដោយ thmeythmey.com