ជាតិ
សេដ្ឋកិច្ច
ព្រលានយន្តហោះថ្មីនៅខេត្តសៀមរាបតម្លៃជិត៩០០លានដុល្លារ នឹងត្រូវសាងសង់ហើយ នៅឆ្នាំ២០២៣ 08, Feb 2021 , 9:39 pm
រូបថត៖ រដ្ឋបាលខេត្តសៀមរាប
× ភ្នំពេញ៖ អាកាសយានដ្ឋានអន្តរជាតិសៀមរាប-អង្គរ ដែលមានចម្ងាយប្រមាណ៥០គីឡូម៉ែត្រពីទីក្រុងសៀមរាបនិង៤០គីឡូម៉ែត្រពីប្រាសាទអង្គវត្ត នឹងត្រូវសាងសង់រួចរាល់ នៅពាក់កណ្តាលខែមីនា ឆ្នាំ២០២៣។ អាកាសយានដ្ឋានអន្តរជាតិសៀមរាប-អង្គរថ្មី តម្លៃ៨៨០លានដុល្លារនេះ សាងសង់ដោយក្រុមហ៊ុនAngkor International Airport Investment(AIAI)។
បើតាមការចុះផ្សាយរបស់រដ្ឋបាលខេត្តសៀមរាប កាលពីថ្ងៃទី៦កុម្ភៈ តាមផែនការសម្រាប់ឆ្នាំ២០២១នេះ ការសាងសង់គម្រោងទាំងមូល នឹងសម្រេចឱ្យបានប្រមាណ៦៧ភាគរយ។ ក្នុងនោះ ការសាងសង់ស្ថានីយ៍អ្នកដំណើរគ្រោងសម្រេចឱ្យបាន៧៨ភាគរយ, ការកសាងតំបន់ហោះហើរគ្រោងសម្រេចឱ្យបាន៤៥ភាគរយ និង សំណង់ហេដ្ឋារចនាសម្ព័ន្ធទូទៅរបស់អាកាសយាដ្ឋាន នឹងសម្រេចឱ្យបាន៥០ភាគរយ។
ក្នុងផែនការឆ្នាំ២០២១ដដែល ក្រុមការងារនឹងពន្លឿនការសាសង់អាកាសយានដ្ឋានអន្តរជាតិសៀមរាប-អង្គរនេះ ឱ្យបាន៦៧ភាគរយនិងបញ្ចប់ការសាងសង់ ឈានទៅបំពេញលក្ខខណ្ឌប្រតិបត្តិការរបស់អាកាសយានដ្ឋាន នាពាក់កណ្តាលខែមីនា ឆ្នាំ២០២៣ខាងមុខ។
សូមជម្រាបថា អាកាសយានដ្ឋានអន្តរជាតិសៀមរាបនេះ គឺមានផ្ទៃដី១,៧០០ហិកតា ស្ថិតនៅក្នុងឃុំតាយ៉ែក ស្រុកសូទ្រនិគម ខេត្តសៀមរាប។ អាកាសយានដ្ឋានអន្តរជាតិថ្មីនេះ ចាប់ផ្តើមសាងសង់កាលពីថ្ងៃទី១៥ មីនា ឆ្នាំ២០២០ ហើយគ្រោងនឹងបញ្ចប់នៅថ្ងៃទី១៤មីនា ឆ្នាំ២០២៣ ដែលមានរយៈពេលសាងសង់៣៦ខែ។ ឆ្នាំ២០២៣នេះ ក៏ជាឆ្នាំនៃការបញ្ចប់គម្រោងសាងសង់ព្រលានយន្តហោះអន្តរជាតិភ្នំពេញថ្មីនៅក្នុងខេតកណ្តាលផងដែរ។
ក្រៅពីព្រលានយន្តហោះអន្តរជាតិទាំងពីរខាងលើនេះ កម្ពុជាក៏កំពុងអភិវឌ្ឍ និងគ្រោងអភិវឌ្ឍលើព្រលានយន្តហោះក្នុងស្រុកផ្សេងៗទៀត។ ដូចជា ព្រលានយន្តហោះនៅក្នុងខេត្តកោះកុង ខេត្តបាត់ដំបង ខេត្តបន្ទាយមានជ័យ និង ខេត្តមណ្ឌលគិរី ជាដើម៕
Tag:
អាកាសយានដ្ឋាន
សៀមរាប
© រក្សាសិទ្ធិដោយ thmeythmey.com