កញ្ញា ឡុង រស្មីឆពណ្ណ គឺជាស្ថាបនិកហត្ថកាលឡេប-Hathkal lab ។ ក្រុមហ៊ុន ហត្ថកាល ដែលកំពុងផលិត និងចែកចាយប្រេងធម្មជាតិដកចេញពីស្លឹកគ្រៃ ម្អម និងដូង នៅក្នុងទីផ្សារ។ កញ្ញា ឡុង រស្មីឆពណ្ណ បានប្រាប់សារព័ត៌មានថ្មីៗថា នាងបានចាប់ផ្តើមការស្រាវជ្រាវផលិតប្រេងធម្មជាតិ ដែលយកចេញពីវត្ថុធាតុដើមកសិកម្ម តាំងពីឆ្នាំ២០១៦មកម្ល៉េះ។ យុវតីរូបនេះ បានចំណាយពេលជាង២ឆ្នាំ នៅក្នុងការងារស្រាវជ្រាវ។ ហើយនៅចុងឆ្នាំ២០១៩ ឆពនណ្ណ ក៏អាចម្រាញ់បានសារធាតុប្រេងធម្មជាតិចេញពីក្រូច ក្រូចសើច និងផ្កាម្លិះ។   

 

ដ្បិតជោគជ័យក្នុងការស្រាវជ្រាវ ប៉ុន្តែយុវតីដែលមានជំនាញវិស្វកម្មគីមី និងបច្ចេកទេសអាហារ និងជំនាញអប់រំភាសាអង់គ្លេសរូបនេះ មិនទាន់ផលិតលក់នៅលើទីផ្សារនោះទេ គឺនាងត្រូវការពេលវេលាបន្ថែមទៀត ដើម្បីស្រាវជ្រាវផលិតប្រេងចេញពីវត្ថុធាតុដើមធម្មជាតិផ្សេងទៀត ស្វែងរកអ្នកផ្គត់ផ្គង់វត្ថុធាតុដើម សិក្សាទីផ្សារ ស្វែងរកដៃគូវិនិយោគ ព្រមទាំងសិក្សាពីឧបករណ៍ផលិតផងដែរ។

 

លុះដល់ពាក់កណ្តាលឆ្នាំ២០២០ ទើបកញ្ញា ឡុង រស្មីឆពណ្ណ សម្រេចចិត្តផលិតប្រេងធម្មជាតិផ្គត់ផ្គង់ក្នុងទីផ្សារ ដោយចាប់ផ្តើមពីផលិតផលប្រេងស្លឹកគ្រៃ ប្រេងម្អម និងប្រេងដូង ក្រោមការផ្គត់ផ្គង់វត្ថុធាតុដើមពីកសិករនៅក្នុងខេត្តកណ្តាល ព្រៃវែង  កំពង់ស្ពឺ និងកំពត។ ដ្បិតទើបប្រឡូកចូលក្នុងទីផ្សារ ប៉ុន្តែសហគ្រិនស្ត្រីវ័យក្មេងរូបនេះ អះអាងថាផលិតផលរបស់ខ្លួន ទទួលបានការគាំទ្រគួរសមពីអតិថិជន។ 

 

អាជីវកម្មដំណើរការល្អគឺជារឿងគួរឲ្យរីករាយមួយសម្រាប់សហគ្រិនរូបនេះ។ កញ្ញា រស្មីឆពណ្ណ ក៏កាន់តែត្រេកអរផងដែរ នៅពេលដែលអាជីវកម្មខ្លួន កំពុងចូលរួមលើកកម្ពស់ការប្រើប្រាស់ផលិតផលកម្មដោយប្រយោល និងជួយជំរុញសេដ្ឋកិច្ចកសិករដែលផ្គត់ផ្គង់វត្ថុធាតុដើមមកឲ្យក្រុមហ៊ុនខ្លួនដោយផ្ទាល់តែម្តង។  កញ្ញា ឡុង រស្មីឆពណ្ណ បន្ថែម៖«ការផលិតប្រេងរុក្ខជាតិទាំងនោះ វាជាការរួមចំណែកមួយដែរ។ ការបំប្លែងផលិតផលនោះវាជួយរកកសិករមានទីផ្សារដែរ។ ទីផ្សារស្លឹកគ្រៃវាមាន តែវាតម្លៃថោក។ ខ្ញុំអាចចិញ្ចឹម និងរកទីផ្សារឲ្យអ្នកភូមិ ដែលគាត់ដាំស្លឹកគ្រៃហ្នឹង និងខេត្តផ្សេងៗ ដែលគាត់ដាំអ្វីផ្សេងៗទៀត»។ 

 

សហគ្រិនរូបនេះ ក៏មានមហិច្ឆតានាំចេញផលិតប្រេងធម្មជាតិ និងផលិតផលផ្សេងៗទៀតពីកម្ពុជា ទៅទីផ្សារក្រៅប្រទេសផងដែរ នៅថ្ងៃអនាគត។ «គោលដៅរបស់ខ្ញុំ គឺចង់ចម្រាញ់ផលិតផលកសិកម្មរបស់ខ្មែរ ធ្វើជាផលិតផលប្រើប្រាស់ សម្រាប់នាំចេញពីស្រុកក្រៅ ដើម្បីលើកមុខមាត់ប្រទេសកម្ពុជាយើងដែរ»។ នេះជាការរៀបរាប់របស់ កញ្ញា ឡុង រស្មីឆពណ្ណ ដោយនាងបានបន្តអះអាងថា ក្រុមហ៊ុនខ្លួន នឹងខិតខំពង្រឹងគុណភាពប្រេងធម្មជាតិនេះ ឲ្យមានស្តង់ដារ ដើម្បីអាចសម្រេចបានមហិច្ឆតានាំចេញនេះ។ កញ្ញា ឡុង រស្មី ឆពណ្ណ បន្ថែម៖«ខ្ញុំចង់ផលិតប្រេង ដែលអាចឈរលើទីផ្សារអន្តរជាតិ ពីព្រោះខ្ញុំជឿ លើផលិតផលកសិកម្មរបស់ខ្មែរ»៕