អន្តរជាតិ
យោធាមីយ៉ាម៉ាបញ្ជូនរថពាសដែកចូលក្រុងធំៗ ស្របពេលបាតុកម្មបន្តកើតមានស្ទើរទូទាំងប្រទេស
15, Feb 2021 , 11:08 am
រថពាសដែក ដែលមានវត្តមាននៅក្នុងទីក្រុងយ៉ាំងហ្គោន នៅថ្ងៃទី១៤ ខែកុម្ភៈ។ រូបថត AFP
×![]()
ដោយ: ធៀន ភារិន្ទ
គិតត្រឹមថ្ងៃទី១៥ ខែកុម្ភៈ បាតុកម្មនៅមីយ៉ាន់ម៉ា បានឈានចូលដល់ថ្ងៃទី១០ ហើយ ខណៈពេលមនុស្សចូលរួមមានជាច្រើនម៉ឺននាក់ នៅស្ទើរទូទាំងប្រទេស។ ស្របគ្នានេះ របបសឹក បានបញ្ជូនរថពាសដែកប៉ុន្មានគ្រឿងមកក្នុងទីក្រុងធំៗរបស់មីយ៉ាន់ម៉ា ដែលធ្វើឱ្យមានការបារម្ភពីការបង្ក្រាបលើការតវ៉ារបស់ប្រជាជន។
ប្រជាជនមីយ៉ាន់ម៉ាមកពីគ្រប់ស្រទាប់នៅស្ទើរតែទូទាំងប្រទេស នៅតែបន្តចេញមកបាតុកម្ម និងកាន់តែមានចំនួនច្រើនជាងមុន។ ពួកគេនៅតែទាមទាររបបសឹកប្រគល់អំណាចឱ្យរដ្ឋាភិបាលស៊ីវិល ស្របពេលចលនាជំទាស់យោធា ដែលចូលរួមដោយបុគ្គលិករដ្ឋ កាត់តែមានទំហំធំ។ សម្រែក «ដោះលែងម៉ែស៊ូ» នៅតែបន្តលើកឡើង។ លោកស្រី អ៊ុងសាន ស៊ូជី ត្រូវបានប្រជាជនមីយ៉ាន់ម៉ាភាគច្រើនចាត់ទុកដូចជាម៉ែ។
នៅក្នុងរដ្ឋ Kachin ដែលស្ថិតនៅភាគខាងជើងនៃប្រទេស រដ្ឋាភិបាលយោធា បានបញ្ជូនកម្លាំងប៉ូលិសជាច្រើននាក់ ទៅបំបែកក្រុមប្រជាជនតវ៉ា នៅរោងចក្រអគ្គិសនី។ ក្នុងបាតុកម្មនេះ ប៉ូលិសបានបាញ់កាំភ្លើងដាក់ក្រុមប្រជាជន ដើម្បីបំបែកការតវ៉ា។ យ៉ាងណាមិញ គេមិនទាន់ដឹងច្បាស់នៅឡើយទេ ថាតើប៉ូលិសបានបាញ់គ្រាប់កាំភ្លើងពិត ឬគ្រាប់ជ័រ។ អ្នកសារព័ត៌មានចំនួន ៥នាក់ ដែលមានវត្តមាននៅក្នុងបាតុកម្មនេះ និងថតវីដេអូបង្ហោះលើបណ្តាញសង្គមFacebook ត្រូវបានចាប់ខ្លួនផងដែរ។ នេះបើតាមការចុះផ្សាយរបស់សារព័ត៌មាន Reuters។
ស្របពេលបាតុកម្មទ្រង់ទ្រាយធំមាននៅស្ទើរទូទាំងប្រទេស អាជ្ញាធរមីយ៉ាន់ម៉ា បានបញ្ជូនរថពាសដែកប៉ុន្មានគ្រឿង ចូលក្នុងទីក្រុងធំៗ ដូចជាក្រុងយ៉ាំងហ្គោន, ក្រុងMyitkyina និងក្រុងSittwe។ ការបញ្ជូនរថពាសដែកបែបនេះ ទំនងជាចង់បង្ហាញពីភាពអស់ការអត់ធ្មត់របស់ក្រុមយោធា និងសញ្ញានៃការបង្ក្រាបទ្រង់ទ្រាយធំលើក្រុមបាតុករ អាចកើតឡើងឆាប់ៗ ក្នុងពេលខាងមុខ។ កន្លងមក រដ្ឋាភិបាលយោធាមីយ៉ាន់ម៉ា បានបំបែកក្រុមបាតុករ ក្នុងទ្រង់ទ្រាយតូចប៉ុណ្ណោះ ដូចជាការបាញ់ទឹក និងបាញ់គ្រាប់កាំភ្លើងជ័រជាដើម។
បន្ថែមពីលើនេះ ការបញ្ជូនរថពាសដែកខាងលើ ធ្វើឡើងតែមួយថ្ងៃប៉ុណ្ណោះ មុនការអស់សុពលភាពនៃការឃុំខ្លួនលើលោកស្រីស៊ូជី មេដឹកនាំបក្សសម្ព័ន្ធជាតិដើម្បីប្រជាធិបតេយ្យ ដែលត្រូវបានឃុំខ្លួន១៤ថ្ងៃ ពីការនាំចូលវិទ្យុ និងឧបករណ៍ទាក់ទងខុសច្បាប់ ។
បន្ទាប់ពីមានបាតុកម្មទ្រង់ទ្រាយធំកើតឡើងបែបនេះ របបសឹក បានកាត់ផ្តាច់អ៊ីនធឺណិតស្ទើរតែទាំងស្រុងនៅក្នុងប្រទេស។ ចាប់ពីពាក់កណ្តាលយប់ចូលថ្ងៃទី១៥ ខែកុម្ភៈ ប្រជាជនមីយ៉ាន់ម៉ា មិនអាចប្រើប្រាស់អ៊ីនធឺណិតរបស់ក្រុមហ៊ុនទូរគមនាគមន៍ចំនួន៤ នៅមីយ៉ាន់ម៉ាបានឡើយ។ អ៊ីនធឺណិត អាចនឹងដាច់ពីចន្លោះម៉ោង ១យប់ រហូតដល់ ៩ព្រឹក។
ទន្ទឹមនេះ ស្ថានទូតសហភាពអឺរ៉ុប អង់គ្លេស និងកាណាដា បានចេញសេចក្តីថ្លែងការណ៍នៅថ្ងៃទី១៤ ខែកុម្ភៈ ដោយអំពាវនាវឱ្យក្រុមប៉ូលិសមីយ៉ាន់ម៉ា ចៀសវាងប្រើប្រាស់ហិង្សាដាក់ក្រុមបាតុករ និងប្រជាជនស៊ីវិល។ ចំណែកស្ថានទូតអាមេរិក អំពាវនាវប្រជាជនខ្លួនរកកន្លែងជ្រកកោន ស្របពេលរដ្ឋាភិបាលចល័តរថពាសដែកចូលក្នុងទីក្រុងធំៗ៕
Tag:
មីយ៉ាន់ម៉ា
© រក្សាសិទ្ធិដោយ thmeythmey.com
