COVID-19
ជាតិ
អ្នកជំងឺបរទេស៣នាក់នៅកម្ពុជា មានវីរុសកូវីដ-១៩ បំប្លែងខ្លួនថ្មី 15, Feb 2021 , 5:16 pm
អ្នកស្រី ឱ វណ្ណឌីន អ្នកនាំពាក្យក្រសួងសុខាភិបាល
× ក្រសួងសុខាភិបាលនាល្ងាចថ្ងៃចន្ទ នេះ បានចេញសេចក្តីប្រកាសព័ត៌មានពីករណីអ្នកជំងឺបរទេស៣នាក់ ដែលមានវីរុសកូវីដ-១៩ បំប្លែងខ្លួនថ្មី។ អ្នកជំងឺទាំងនោះមានបុរសឥណ្ឌាអាយុ២៨ឆ្នាំ ស្ត្រីឥណ្ឌាអាយុ២៣ឆ្នាំ និងស្ត្រីចិនអាយុ២៦ឆ្នាំ។ បច្ចុប្បន្នពួកគាត់ត្រូវបានដាក់ឲ្យសម្រាកព្យាបាលនៅមជ្ឈមណ្ឌលជាតិកំចាត់រោគរបេង និងហង់សិន។
បុរស និងស្ត្រីឥណ្ឌា បានធ្វើដំណើរមកពីប្រទេសខ្លួន ដោយឆ្លងកាត់សិង្ហបុរី និងមកដល់កម្ពុជានៅថ្ងៃទី៣ ខែកុម្ភៈ រីឯស្ត្រីចិន មកពីប្រទេសខ្លួន ដោយឆ្លងកាត់កូរ៉េខាងត្បូង ហើយមានដល់កម្ពុជានៅថ្ងៃទី៧ ខែកុម្ភៈ។
តាមអង្គការសុខភាពពិភពលោក (WHO) គិតត្រឹមថ្ងៃទី១៥ ខែកុម្ភៈ នេះ ករណីឆ្លងវីរុសកូវីដ-១៩ ដែលបានបំប្លែងខ្លួនថ្មី (ប្រភេទ B.1.1.7) រាលដាលដល់ប្រមាណ៨០ប្រទេស ហើយជាង៣០០ករណី ត្រូវបានរកឃើញនៅ១០ប្រទេសនៅតំបន់ប៉ាស៊ីហ្វិកខាងលិច និង៨ប្រទេស/តំបន់ មានករណីបំប្លែងខ្លួនថ្មី (ប្រភេទ 501Y.V2 Variant) ដោយលើសពី៨០ករណី ក្នុងនោះមានបណ្តាប្រទេសនៅតំបន់អាស៊ានផងដែរ។
«សូមបងប្អូនប្រជាពលរដ្ឋកម្ពុជា មានការប្រុងប្រយ័ត្នខ្ពស់ ការពារខ្លួន កុំធ្វេសប្រហែសឲ្យសោះ និងមិនត្រូវមើលរំលងពីលទ្ធភាពនៃការចម្លងវីរុសកូវីដ-១៩ ប្រភេទបំប្លែងថ្មីទាំងនេះ មកក្នុងសហគមន៍កម្ពុជាយើងនោះឡើយ»។ នេះជាការក្រើនរំលឹករបស់ក្រសួងសុខាភិបាល។
៣ករណីដែលកម្ពុជាបានរកឃើញនេះ មានការឆ្លងការវិភាគមន្ទីរពិសោធន៍នៅថ្ងៃទី១៤ ខែកុម្ភៈ ដោយវិទ្យាស្ថានប៉ាស្ទ័រ។ វាជាករណីវីរុសកូវីដ-១៩ថ្មី ដែលបានបំប្លែងខ្លួនថ្មី (ប្រភេទ UK Variant 20I/501Y.V1, VOC 202012/01 និង B.1.1.7)៕
© រក្សាសិទ្ធិដោយ thmeythmey.com