កីឡាជាតិ
ជាតិ
ពានរង្វាន់សម្តេច ហ៊ុន សែន លើកទី១៥ ចាប់ផ្តើមជំនួបថ្នាក់ខេត្តនៅថ្ងៃនេះ 16, Feb 2021 , 9:53 am
× គណៈកម្មការប្រកួតបាល់ទាត់ជាតិកម្ពុជា (CNCC) បើកការប្រកួតថ្នាក់ខេត្តសប្តាហ៍ទីមួយនៃពានរង្វាន់សម្តេច ហ៊ុន សែន លើកទី១៥ ឆ្នាំ២០២១ នាថ្ងៃអង្គារ ទី១៦ ខែកុម្ភៈនេះ។ ជំនួបប្រព្រឹត្តទៅនាវេលាម៉ោង៣រសៀល លើទីលាន៥ផ្សេងៗគ្នា។
ក្នុងពូល A ភ្នំពេញហ្គាឡាក់ស៊ី ប្រកួតតទល់ជាមួយមន្ទីរ អយកខេត្តកំពង់ស្ពឺ នៅទីលានវិទ្យាល័យច្បារអំពៅ។ នៅទីលានវិទ្យាល័យ ហ៊ុន សែន កណ្តៀង ស.យ.ស.ស ខេត្តពោធិ៍សាត់ ស្វាគមន៍ ខេត្តបន្ទាយមានជ័យសម្រាប់ជំនួបពូល B។
រីឯពូល C ក្រុមឧត្តរមានជ័យ ទៅជួបជាមួយម្ចាស់ផ្ទះ កងរាជអាវុធហត្ថ ខេត្តកំពង់ធំ នៅទីលានវិទ្យាល័យកំពង់ធំ ស្របពេលដែលកោះកុងអែហ្វស៊ី ទទួល មន្ទីរ អយក ខេត្តកែប នៅទីលានវិទ្យាល័យកោះកុង សម្រាប់ជំនួបពូល E។
នៅពូល F មន្ទីរអយក ខេត្តត្បូងឃ្មុំ ប្រើប្រាស់ទីលានវិទ្យាល័យ ប៊ុនរ៉ានី ហ៊ុន សែន មេមត់ ដើម្បីស្វាគមន៍ អធិរាជដំរីឦសាន ខេត្តរតនគិរី។ រីឯ៤ប្រកួតនៃពូលផ្សេងទៀត នឹងប្រព្រឹត្តទៅនៅថ្ងៃពុធ ទី១៧ ខែកុម្ភៈ។
នៅឆ្នាំនេះ ក្រុមដែលចូលរួមប្រកួតប្រជែងពានរង្វាន់សម្តេច ហ៊ុន សែន ថ្នាក់ខេត្ត មាន២១ក្រុមដោយចែកជា៦ពូល។ ពូល A, B និង G មាន៤ក្រុម រីឯពូល C, D និង H មាន៣ក្រុម។
ការប្រកួតថ្នាក់ខេត្តចាប់ផ្តើមពីថ្ងៃទី១៦ ខែកុម្ភៈ ដល់ ថ្ងៃទី១៦ ខែមិថុនា រីឯថ្នាក់ជាតិចាប់ផ្តើមពីថ្ងៃទី៧ ខែកក្កដា ដល់ថ្ងៃទី២៩ ខែកញ្ញា ឆ្នាំ២០២១។
ក្រុមដែលទទួលបានជើងឯក ក្រុមចំណាត់ថ្នាក់លេខ២ និងលេខ៣ ទទួលបានកៅអីបន្តទៅវគ្គ១៦ក្រុមចុងក្រោយនៃពានរង្វាន់ថ្នាក់ជាតិ ដោយមាន១៣ក្រុមទៀតនៃពានរង្វាន់មិត្តហ្វូនខេមបូឌានលីគ រង់ចាំរួចជាស្រេច។
កាលពីរដូវកាលមុន ខេត្តព្រៃវែងជាម្ចាស់ពានរង្វាន់សម្តេច ហ៊ុន សែន ថ្នាក់ខេត្ត ក្រោយយកឈ្នះត្បូងឃ្មុំ ១-០ នៅវគ្គផ្តាច់ព្រ័ត្រ កែបទទួលបានចំណាត់ថ្នាក់លេខ៣ ក្រោយជ័យជម្នះ ៣-០ លើសៀមរាប៕
© រក្សាសិទ្ធិដោយ thmeythmey.com