COVID-19
ជាតិ
សេដ្ឋកិច្ច
មនុស្សជាង២ពាន់នាក់ហើយ បានចាក់វ៉ាក់សាំងកូវីដ-១៩
16, Feb 2021 , 2:07 pm
×![]()
ភ្នំពេញ៖ គិតត្រឹមរយៈពេល៦ថ្ងៃនៃយុទ្ធនាការចាក់វ៉ាក់សាំងកូវីដ-១៩ ពោលពីថ្ងៃទី១០-១៥កុម្ភៈ មានមនុស្សចំនួន២១២២នាក់ហើយ បានចាក់វ៉ាក់សាំងកូវីដ-១៩ប្រភេទស៊ីណូហ្វាមរបស់ចិន (Sinopharm) ។ នេះបើតាមសេចក្តីជូនដំណឹងរបស់ក្រសួងសុខាភិបាល។
ក្រសួងសុខាភិបាលបានបញ្ជាក់ថា ក្នុងរយៈពេល៦ថ្ងៃកន្លងមកនេះ គឺមានអ្នកដែលស្ម័គ្រចិត្ត សរុប២,៦៧៨នាក់ ទៅចាក់វ៉ាក់សាំងកូវីដ-១៩របស់ចិននៅតាមមន្ទីរពេទ្យទាំង៥ទីតាំង នៅរាជធានីភ្នំពេញ រួមមានមន្ទីរពេទ្យកាល់ម៉ែត, មន្ទីរពេទ្យព្រះអង្គឌួង, មន្ទីរពេទ្យមិត្តភាពខ្មែរ-សូវៀត, មន្ទីរពេទ្យកុមារជាតិ និងមន្ទីរពេទ្យកេតុមាលា។ ប៉ុន្តែ ក្នុងចំណោមអ្នកស្ម័គ្រចិត្តចាក់វ៉ាក់សាំងនេះ មាន៥៥៦នាក់ ដែលគ្រូពេទ្យមិនអនុញ្ញាត្តឱ្យចាក់។
កន្លងមក រាជរដ្ឋាភិបាល ក៏ដូចក្រសួងសុខាភិបាល បានបញ្ជាក់ថា វ៉ាក់សាំងកូវីដ-១៩ប្រភេទស៊ីណូហ្វាមរបស់ចិននេះ គឺអាចចាក់បានចំពោះមនុស្សដែលមានអាយុចាប់ពី១៨ឆ្នាំ ដល់ ៥៩ឆ្នាំប៉ុណ្ណោះ ហើយអ្នកដែលស្ថិតនៅក្នុងចន្លោះវ័យនេះ បើមានសុខភាពខ្សោយ ឬមានជំងឺផ្សេងៗ ក៏មិនអាចចាក់វ៉ាក់សាំងកូវីដ-១៩ប្រភេទស៊ីណូហ្វាមនេះ បានដែរ។
អ្នកដែលមានជំងឺផ្សេងៗប្រចាំកាយ មិនអាចទទួលវ៉ាក់សាំងកូវីដ-១៩នេះបានទេ។ ប្រភេទជំងឺនោះរួមមាន អ្នកមានបញ្ហាអាឡែហ្ស៊ីផ្សេងៗ, អ្នកដែលមានបញ្ហាដង្ហើម, រលាកសរសៃឈាម អ្នកចេញកន្ទាលត្រអាក, អ្នកជំងឺរ៉ាំរ៉ៃ ,អ្នកជំងឺឆ្កួតជ្រូក ,ជំងឺរលាកស្រោមខួរ ,ជំងឺសរសៃប្រសាទ, ជំងឺតំណពូជ ,អ្នកមានសុខភាពខ្សោយ ,អ្នកកើតជំងឺអេដស៍ ,អ្នកមហារីកកូនកណ្តុរ ,អ្នកជំងឺឈាមស, អ្នកជំងឺបេះដូងសរសៃឈាមធ្ងន់ធ្ងរ ,ជំងឺថ្លើម ,ជំងឺតម្រងនោម និងជំងឺដុះដុំសាច់ធ្ងន់ធ្ងរ។ ជាពិសេសអ្នកដែលមានប្រវត្តិប្រតិកម្មក្រោយពីបានចាក់វ៉ាក់សាំងផ្សេងៗ។
សូមជម្រាប ចំពោះចំនួនពលរដ្ឋខ្មែរសរុបខាងលើ ដែលបានចាក់វ៉ាក់កូវីដ-១៩នេះ គឺមិនបានរាប់បញ្ចូលនូវចំនួនកងកម្លាំងទ័ពនានា ដែលបានចាក់វ៉ាក់សាំងនេះឡើយ។ វ៉ាក់សាំងកូវីដ-១៩ប្រភេទស៊ីណូហ្វាម ចំនួន៦០ម៉ឺនដូសរបស់ចិន បានដឹកមកដល់កម្ពុជាកាលពីថ្ងៃទី៧កុម្ភៈ ឆ្នាំ២០២១ ដោយមាន៣០ម៉ឺនដូស ប្រគល់ឱ្យក្រសួងសុខាភិបាល និង៣០ម៉ឺនដូសទៀត ប្រគល់ឱ្យក្រសួងការពារជាតិ។
គិតត្រឹមថ្ងៃទី១៦កុម្ភៈ កម្ពុជាមានអ្នកឆ្លងកូវីដ-១៩ សរុប៤៧៩នាក់។ ក្នុងនោះមាន៤៦៩ ជាសះស្បើយ និង១០នាក់ទៀតកំពុងសម្រាកព្យាបាលនៅមន្ទីរពេទ្យនានា៕
Tag:
វ៉ាក់សាំង
COVID-19
© រក្សាសិទ្ធិដោយ thmeythmey.com
