អន្តរជាតិ
ប៉ូលិសមីយ៉ាន់ម៉ា ចោទលោកស្រី ស៊ូជី មួយករណីទៀត
16, Feb 2021 , 11:29 pm
×![]()
ដោយ: ធៀន ភារិន្ទ
ប៉ូលីសមីយ៉ាន់ម៉ា នៅថ្ងៃទី១៦ ខែកុម្ភៈ បានចោទលោកស្រីអ៊ុងសាន ស៊ូជី លើករណីមួយទៀតទាក់ទងការបំពានច្បាប់គ្រោះមហន្តរាយធម្មជាតិ។ ការចោទប្រកាន់នេះ ធ្វើឡើងមួយថ្ងៃមុន បញ្ជាឃុំខ្លួនរបស់លោកស្រី ស៊ូជី លើការចោទប្រកាន់មុន ត្រូវអស់សុពលភាព។ 
លោក Khin Maung Zaw មេធាវីរបស់លោកស្រី អ៊ុងសាន ស៊ូជី មេដឹកនាំបក្សសម្ព័ន្ធជាតិដើម្បីប្រជាធិបតេយ្យប្រាប់សារព័ត៌មានក្នុងស្រុកថា កូនក្ដីរបស់លោក ត្រូវបានប៉ូលិសចោទជាលើកទីពីពាក់ព័ន្ធបទបំពានច្បាប់មហន្តរាយធម្មជាតិ។ លើបទចោទលើកទីមួយ លោកស្រី ស៊ូជី ត្រូវបានចោទពីបទ នាំចូលវិទ្យុ និងឧបករណ៍ទាក់ទងខុសច្បាប់។
បើតាមលោកមេធាវី មេដឹកនាំរដ្ឋាភិបាលស៊ីវិលរូបនេះ បានជួបជាមួយចៅក្រមរួចហើយ តាមប្រព័ន្ធវីដេអូ ដែលមិនមានមេធាវីចូលរួមឡើយ។ សវនាការរបស់លោកស្រីស៊ូជីបន្ទាប់នឹងធ្វើនៅថ្ងៃទី១ ខែមីនា ខាងមុខ។ នេះបើតាមការផ្សាយរបស់ទីភ្នាក់ងារព័ត៌មាន Reuters ។
ស្របពេលនឹងការចោទប្រកាន់នេះ រដ្ឋាភិបាលយោធាឯណោះវិញ បានសន្យាជាថ្មីជុំវិញការរៀបចំបោះឆ្នោត និងប្រគល់អំណាចឱ្យបក្សឈ្នះ។ បើតាមលោកឧត្តមសេនីយ៍ត្រី Zaw Min Tun អ្នកនាំពាក្យរបបយោធា គោលបំណងរបស់យោធា គឺការបោះឆ្នោត។ ការលើកឡើងជាថ្មីរបស់ក្រុមយោធាបែបនេះ ទំនងធ្វើឡើងដើម្បីកាត់បន្ថយកំហឹងរបស់ប្រជាជនមីយ៉ាន់ម៉ា ដែលបានតវ៉ានៅស្ទើតែទូទាំងប្រទេស។
កន្លងមក ក្រុមយោធា បានសន្យារថា ខ្លួននឹងរៀបចំការបោះឆ្នោតដោយសេរីឡើងវិញ នៅពេលស្ថានភាពអាសន្ន ត្រូវបានបញ្ចប់។ របបយោធាដែលឡើងកាន់អំណាចនៅដើមខែកុម្ភៈ ប្រកាសដាក់ប្រទេសក្នុងភាពអាសន្នមួយឆ្នាំ។
នៅព្រឹកថ្ងៃទី១៦ ខែកុម្ភៈ ប្រជាជនមីយ៉ាន់ម៉ា ដោយរួមទាំងព្រះសង្ឃផងនោះ នៅតែបន្តចេញមកបាតុកម្មជំទាស់នឹងក្រុមយោធា នៅក្នុងទីក្រុងយ៉ាងហ្គោន និងតំបន់ផ្សេងទៀត ទោះរដ្ឋាភិបាលបានបញ្ជូនកម្លាំងទាហានបន្ថែមមកក្នុងក្រុងធំៗក៏ដោយ។ បាតុកម្មរបស់ប្រជាជន បានឈានចូលដល់ថ្ងៃទី១១ ហើយ៕
Tag:
មីយ៉ាន់ម៉ា
© រក្សាសិទ្ធិដោយ thmeythmey.com
