អន្តរជាតិ
អគ្គរដ្ឋទូតចិន៖ ភាពតានតឹងនៅមីយ៉ាន់ម៉ា មិនមែនជាអ្វីដែលចិនចង់ឃើញឡើយ 17, Feb 2021 , 11:10 am
ប្រជាជនមីយ៉ាន់ម៉ា ធ្វើបាតុកម្មជំទាស់នឹងរដ្ឋប្រហារយោធា។ រូបភាព៖ AFP
× ការតវ៉ាទាមទាររបស់ប្រជាជនមីយ៉ាន់ម៉ាឱ្យរបបសឹកប្រគល់អំណាចឱ្យរដ្ឋាភិបាលស៊ីវិល នៅតែបន្តកើតមាន ខណៈពេលរដ្ឋាភិបាលយោធាបញ្ជូនទាហានមកក្នុងក្រុងធំៗកាន់តែច្រើន។ ពាក់ព័ន្ធស្ថានការណ៍ភាពតានតឹងបែបនេះ អគ្គរដ្ឋទូតចិនប្រចាំនៅមីយ៉ាន់ម៉ា លោក Chen Hai បានបង្ហាញការបារម្ភជា ចិនមិនចង់ឃើញស្ថានភាពបែបនោះ។
នៅក្នុងកិច្ចសម្ភាសដែលបង្ហោះលើវេបសាយស្ថានទូតចិនប្រចាំនៅមីយ៉ាន់ម៉ា ក្នុងថ្ងៃទី១៦ ខែកុម្ភៈ លោក Chen Hai អគ្គរដ្ឋទូតចិនប្រចាំនៅមីយ៉ាន់ម៉ាបញ្ជាក់យ៉ាងដូច្នេះថា៖ «ការវិវឌ្ឍស្ថានការណ៍ក្នុងពេលបច្ចុប្បន្ននៅមីយ៉ាន់ម៉ា គឺជាអ្វីដែលចិនមិនចង់ឃើញ»។ ក្នុងន័យនេះ ប្រេសិតរបស់ចិន ចង់ឃើញរដ្ឋាភិបាលស៊ីវិល និងយោធាមីយ៉ាន់ម៉ា ដោះស្រាយបញ្ហាជាមួយគ្នា ដោយផ្អែកទៅតាមច្បាប់ និងរដ្ឋធម្មនុញ្ញ ដើម្បីរក្សាស្ថិរភាពនយោបាយនៅក្នុងប្រទេស។
មួយរយៈចុងក្រោយនេះ រដ្ឋាភិបាលមីយ៉ាន់ម៉ា បានបញ្ជូនទាហាន និងរថពាសដែកជាច្រើនគ្រឿងចូលក្នុងទីក្រុងធំៗ ស្របពេលប្រជាជននៅតែបន្តតវ៉ាជំទាស់នឹងក្រុមយោធា។ ទន្ទឹមនេះ រដ្ឋាភិបាលយោធា បានចាប់ខ្លួនអ្នកប្រឆាំងជាបន្តបន្ទាប់ និងកាត់ផ្តាច់អ៊ីនធឺណិតនៅពេលយប់។
បើតាមប្រេសិតចិនប្រចាំនៅមីយ៉ាន់ម៉ារូបនេះ កន្លងមកចិន បានចូលរួមក្នុងកិច្ចពិភាក្សា នៅក្នុងក្រុមប្រឹក្សាសន្តិសុខអង្គការសហប្រជាជាតិ ដែលបានចេញសេចក្តីថ្លែងការណ៍អំពាវនាវឱ្យមានការដោះលែងអ្នកជាប់ឃុំ, លើកទឹកចិត្តឱ្យមានការចរចា និងការបង្រួបបង្រួមនៅក្នុងប្រទេស។
ក្នុងកិច្ចសម្ភាសដដែលនេះ លោក Chen នៅតែបន្តការពារជំហររបស់រដ្ឋាភិបាលចិនដែលរងការរិះគន់។ ចិននឹងមិនជ្រៀតជ្រែក ក្នុងកិច្ចការផ្ទៃក្នុងមីយ៉ាន់ម៉ាឡើយ ព្រោះទង្វើបែបនេះ នឹងធ្វើឱ្យប៉ះពាល់ដល់ទំនាក់ទំនងប្រទេសទាំងពីរ រួមទាំងសេដ្ឋកិច្ច ពាណិជ្ជកម្ម និងកិច្ចសហប្រតិបត្តិការជាដើម។ ការមិនជ្រៀតជ្រែកកិច្ចការផ្ទៃក្នុងនេះ នឹងអាចជួយកែលម្អជីវភាពរបស់ប្រជាជនមីយ៉ាន់ម៉ា។
កន្លងមក មានពាក្យលេចឡើងថា ចិនបានដឹកជញ្ជូនសម្ភារបច្ចេកទេស និងអ្នកជំនាញអ៊ីនធឺណិតមកជួយរដ្ឋាភិបាលយោធា។ ដោយសារពាក្យលេចឡើងបែបនេះ ប្រជាជនមីយ៉ាន់ម៉ាជាច្រើននាក់ បានធ្វើបាតុកម្មមុខស្ថានទូតចិន។ ជាការឆ្លើយតបនឹងការចោទប្រកាន់ខាងលើ លោកអគ្គរដ្ឋទូតចិនបានការពារថា ជើងយន្តហោះនោះ គ្រាន់តែជាការដឹកជញ្ជូនធម្មតារវាងចិន និងមីយ៉ាន់ម៉ាប៉ុណ្ណោះ ដែលមាន ៥ជើងក្នុងមួយថ្ងៃ។ ជើងយន្តហោះនោះ រួមមានការដឹកជញ្ជូនទំនិញ និងគ្រឿងសមុទ្រពីមីយ៉ាន់ម៉ា ទៅចិនផងដែរ៕
© រក្សាសិទ្ធិដោយ thmeythmey.com