COVID-19
កីឡាជាតិ
ជាតិ
បុណ្យសមុទ្រលើកទី៩ នឹងធ្វើនៅខេត្តព្រះសីហនុ ក្រោយពន្យារដោយសារ COVID-19 18, Feb 2021 , 7:59 am
× ពិធីបុណ្យសមុទ្រប្រចាំឆ្នាំលើកទី៩ ជុំទី៣នឹងរៀបចំឡើងវិញនៅខែធ្នូ ឆ្នាំ២០២១ ក្នុងខេត្តព្រះសីហនុ។ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាលើកឡើងដូច្នេះនៅក្នុងព្រឹត្តិការណ៍ «ជិះកង់នៃក្តីស្រឡាញ់» ថ្ងៃទី១៤ កុម្ភៈ ដែលធ្វើនៅខេត្តឆ្នេរសមុទ្រមួយនេះ។
ដើមឡើយពិធីបុណ្យសមុទ្រជុំទី៣ ត្រូវធ្វើនៅចុងឆ្នាំ២០២០នេះទេ ប៉ុន្តែដោយសារវិបត្តិ COVID-19 ទើបបង្ខំចិត្តពន្យារពេលវិញ។ កាលនោះ ក្រសួងទេសចរណ៍តាមរយៈទំព័រហ្វេសប៊ុកផ្លូវការរបស់ខ្លួនបានប្រកាសថានេះជាការសម្រេចចិត្តរបស់សម្តេច ហ៊ុន សែន ក្នុងគោលបំណងការពារភ្ញៀវទេសចរ និងពលរដ្ឋពីការឆ្លងជំងឺដ៏កាចសាហាវនេះ។
ឆ្លើយនឹងសំនួរអ្នកកាសែតក្រោយចប់កម្មវិធី «ជិះកង់នៃក្តីស្រឡាញ់» នៅថ្ងៃទី១៤ ខែកុម្ភៈដើម្បីយកកីឡាធ្វើជាមធ្យោបាយផ្លាស់ប្ដូរឥរិយាបទយុវវ័យនៅថ្ងៃនៃក្តីស្រឡាញ់ និងបង្ហាញសក្តានុពលទេសចរណ៍ក្នុងខេត្តដែលមានសមុទ្រនៅខេត្តព្រះសីហនុកន្លងទៅនោះ លោក វ៉ាត់ ចំរើនអះអាងថា ពិធីបុណ្យសមុទ្រប្រចាំឆ្នាំលើកទី៩ នឹងធ្វើនៅចុងឆ្នាំ២០២១នេះ។
«នៅចុងឆ្នាំ២០២១ រដ្ឋាភិបាល និងក្រសួងទេសចរណ៍បានរៀបចំត្រៀមលក្ខណៈរួចហើយដើម្បីធ្វើម្ចាស់ផ្ទះនៃពិធីបុណ្យសមុទ្រជុំទី៣ នៅខេត្តព្រះសីហនុ»។ អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានលើកឡើងដូច្នេះ មុនបន្ថែមថាព្រឹត្តិការណ៍កីឡាតំបន់ឆ្នេរលើកទី៩នេះ នឹងមានភាពសម្បូរបែបជាងឆ្នាំមុនៗទៅទៀត។
លោក វ៉ាត់ ចំរើនក៏មានជំនឿចិត្តដែរថា ក្រៅពីបុណ្យសមុទ្រ ខេត្តព្រះសីហនុដែលបានប្តូរមុខមាត់ថ្មីតាមរយៈអាគារខ្ពស់ៗ និងហេដ្ឋារចនាសម្ព័ន្ធដ៏ស្រស់ស្អាតដែលលាតសន្ធឹងពីឆ្នេរអូរឈើទាលដល់ឆ្នេររាមនោះ នឹងអាចរៀបចំព្រឹត្តិការណ៍កីឡាលំដាប់អន្តរជាតិផ្សេងៗទៀតនៅឆ្នាំ២០២០។
ពិធីបុណ្យសមុទ្រលើកទី៨ ឆ្នាំ២០១៩ នៅខេត្តកំពតទទួលបានភ្ញៀវទេសចរសរុបប្រមាណ៩០ម៉ឺននាក់ ក្នុងនោះភ្ញៀវទេសចរអន្តរជាតិប្រមាណ៦ពាន់នាក់៕
Tag:
បុណ្យសមុទ្រ
COVID-19
© រក្សាសិទ្ធិដោយ thmeythmey.com